চুক্তি তুই!
হিলর নুয়ো রাঙাবেল,
জনম তর ২রা ডিসেম্বর
১৯৯৭
ঢুলে ডগরে নকবাচ্যা
মানেইয়্য হাদে
বর্মা বিষ্ণু শিব নারায়ণ
বঝনে,
লিঘি দিলাক ত’ ভাগ্য।
হিলর গাচ্-বাজে, নানাঙ
পশু-পকি্খ
রিঝেং-তানঝাং, মোন-মুরি,
চেঙে মিঙিনি কাজালং শঙ্খ
মাতামহুরী ফেনি বগুত
খুউজিয়ে তবোল বেয় যায়
ত’জনম পুরে।
অধিকার নেই মানেইয়ে,
লেং-আদুর পরান বলায়ে
রেঙ দিলাক, উবগীদে ভরি
তুলিলাক্ চিদ আরিয়ে।
জুম্মউনে ধুদুক হেঙগরঙ
চিঙে বেই বেই
আদামে আদামে গীদে রেঙে
তুলন ভরি।
চাদে চাদে ২০বয়জ অলে,
কারর মুহত হাজি ন
ফুদেলে!
বেগরে দিলে এক বুক
আভিল্যাচ।
চুক্তি তুই!
বানা কাগজত আঘচ,
কালে কালে সাক্ষী অই থেবে।
তরে রক্ষে গরিবাত্তে এক ঝাক লরবো লরদন,
হিলর আভা ফিরে
আনিবাত্তে।
নেইয়্যা নাধা দুগী
মানুজর ভাগ্য বদলেবাত্তে।
২০ বজরে এয ফুল ন
ফুদিলাক,
মোন-মুরো তাক্কুল,
রিঝেং-তানঝাং সুধো
উগুম্যা দেবা সান; দরদর
থরথর গরি জীংহানি গঙাদন।
