হিল চাদিগাঙত দোল আভা বেই যেব- ইনজেব চাঙমা

বাপ-ভেই, ম-ভোনলক! 

 তুমি নুয়ো মন মানসিকতা অথাত এম এন লারমা নীতি আদর্শলোই জাগি উদ।তোমার দরেবার কিচছু নেই, তোমা লগে হিলর মানেউন আঘন । তুমি পোতপোততে বোম্বা আহ্’দত লোই মুজুঙে আককোই জ’। তোমারে কন’ জনে দোঙে ন 'পারিবাক।জয় তোমার খামাক্কাই অভ’।
তোমা জাদর মানেউনর জীবনর দুগ, পেরাশানি,তচ্যা, আঝা, সবন জিংকানি লারেই,জয় পরাজয়  বেক আমল গরি ভাবিবার অক্ত এস্যে।তে জাগী উদ’।

জাদর মরন কাভুক কাপ্তে গদাআনে কারি নিল জাদর সুক -শানতি।ভাঙি দিল মনর অতালিয়ে সবন। অলং ছিত্তিরিং পাত্তারাং।পুত্তো-পারা অই ছিদি পচ্যেই নেপা, বারমা, মিজোরাম সুমুত্ত কোণা কুণি, গোনা গুণি ছেরে;নানাঙ কিত্তেত। মা ' আহ্’রেল তা 'আওজর পুঅ, বাপে আরেল তা 'আওজর ঝি। ইক্যে গরি নেগে মোকে পারক অই বাকী জীংকানি বুক দিবেদিপ্যা, বে -সুনজুক গরি, এক বুক আভিল্যাচ্ছোই দিন কাল তোরে পিয়ন, তোরাদন।ইয়ান আমা চাঙমা জাদর বাস্তব চিত্র।কালা বিজক।এচ্যে যারা দেচ কুলত আঘি খুউব গম নেই, তিগুচচে দর দর -থর থর। ভেইয়ে ভেইয়ে মারা মারি নানাঙ পেরাশানিত আঘি। আ ইক্যে জুম্মউন যে বুদ্ধিজীবি বা লেঘিয়্যা কবিউন আঘন তারাও ফারক অভার অক্ত।

এ বেক ভুলানি, মিলেকুত্তুরি, কুদুম্মোইন্দি বাজানা ইআনি বরগাঙ লামুনি ভাজেই দিই বেক্কুন আমি চাঙমা এধক্যে মন বুগত বানি পারিলে এগদিন গাজে গাজে ফুল ফুদিবাক, পেইখে গীদ শোনেবাক।ফাওনো আভা ফিরিবো।হিল চাদিগাঙত দোল আভা বেই যেব।সে অভাত বেগে মিজি যেই আহ্’লুলো-দুলুল্লো জীংকানি গঙে দিবং।

কোচপানা আর’ এক নাঙ ধুন্দুক- ইনজেব চাঙমা

জীংকানি দিঘলী পত কারর সুগর নয়। সুক দুক আহ্’জি কানানা নিনেই মানেই জীংকানি। জীংকানি ভালেদ’ পধে আহ্’ধি যাদে গধেল গধেল মোন-মুড়, তারেঙ-রিঝেঙ আ আরাচাক দি’ খুচ ফেলে যা পরে। কন’ জন সাল্যেঙত লুমন আ কন’ জন সাল্যেঙত লুমি ন’ পারানা আহ্’ল পাগল ওই আধা পদত বাক থুম গরন। এ আগাথ্যা পদে এক বুক সবন-আঝা নিনেই অনসুর মুজুঙে আক্কোই যান বুগর আঝা বোম্বা জালেই।
এ চান-তারা, দিন-বেল মা মেদিনিরে সাক্খী রাঘেই কঙর- চিজি, তরে কায় রাঘেই এ জীংকানি পার গরি আর’ এক জীংকানিত তর ওই জনম লোম। পোতপোত্যা জুন’ পহ্’রত ইজোর মাধাত জিত্তো কাবিলি করত পরি এ কধান কল’। জিত্তো কধা নাল আধেই কাবিলি কল’- দাধা, পিত্তিমী নাঙে গ্রহবোত যারে নিনেই জীংকানি গমে দিবার অতালিয়ে সবন আঘে সে বান্দাবো অলে তুই। তুইয়্য কধা দে এ পিত্তিমী গুলি গেলেয়্য আমা এ সত্য আন গুলি ন’ যেব’।
 সে রেত তারা দি’  জনে লগর সমারী অবার তিন সত্য দি দি গরলাক। আ সে রেত এল’ তারার এক্কো ইধোত গাদে রাঘেবার রেত। যক্যে পোত্তে আমল পুরি এল’ রাদাবো দাক কারের আ ভান্তে শিলে কর তারা দি’ জনে ফারক অই যা ঘরত তে গেলাক।
জিত্তো রাজনীতি গরে। বালক বঝর বিদি যানা পর দিন মাধান এক্কা গম ওই এলে তে তারা ঘরত বুড় মা বাপ চা এল’। এধক দিন সং জিত্তোলই কাবিলি বানা ফেসবুকত কধা কোই কোই এত্তন। অক্তে অক্তে কাবিলি জু পেলে জিত্তো দেঘা গরা যাই। মাত্তর মন’ কধা মুজুঙ মুজুঙি গরি বোই কনা ন’ অয়। এচ্যে তারা মন পারন খুলি কধা কলাক।
কয়েক দিন পর জিত্তো তা কামত গেল’। এক দিন এল’ তারা এক্কো সমাবেশ। সে সমাবেশত আর’ দাঘি হামলা গচ্ছোন। সিয়োত জিত্তো মরি গেল’। তার পেদত গুলি লাগি রাঙা লোয়ে নালে বেই চেঙে গাঙর লামুনি বর গাঙত মিজি যেল’। এ অক্তত কাবিলি ভাত খার কন্না যেন ফোন গরি কল’ জিত্তো গুলি খেই মুরি যেল’। কাবিলি পরানান চিগুত গরি উদিলেয়্য তে বিশ্চেস যেই ন’ পারে জিত্তো মরি যেব’। তা বিশ্চেস জিত্তো বাজি আঘে।
   
[ধারাদিঘলী চলিব]