সুনানু ইনজেব চাঙমাদাঘিত্তুন মুজুঙর
পুজোর জোপ [1] লোইয়ে চাঙমা র’ চ্যানেলর সুনানু হেলেন দেবানদাঘি।
সুনানু হেলেন দেবান: Jhu Jhu da. Twr Chi porichoy janibar chang?
ইনজেব চাঙমা: ঝু ঝু। ম’ নাঙান ইনজেব চাঙমা। মাত্তর! ইয়ান মর ছলং বদল্যা নাঙ। মর ঘর পাদা জাগা চাঙমা সার্কেল, ২৯ নং ছোট মেরুং মুইজ বাজেই ছড়া নাঙে আদামত। ইক্যে মুই ৩১ নং বেয়ালখালী মুউজ দিঘীনালা কাত্তোলি মুড়ত থাং আ মুই চাঙমা সাহিত্য বাহ্ নাঙে সাহিত্য জধাবোত জধানানু ইজেবে আঘং।
সুনানু হেলেন দেবান: Changma lega Sigebar belaai polim hingiri se chide aan monot baja dilo?
ইনজেব চাঙমা:পার্বত্য চুক্তিত লেঘা থেলেয়্যা গণপ্রজাতন্ত্রী বাংলাদেশ সরকারে মা-ভাঝে লেঘা শেঘেবার অন গরচ মনে ন’ গরে। পাবর্ত চুক্তি এক যুক পর মহান জাতীয় সংসদত ২০১০ সালত জাতীয় শিক্ষানীতি ঘোষণা গচ্ছে। সিয়োত দেঝর যা আদিবাসী আঘন যা যা মা ভাচ্ছোই লেঘা শেঘেবার কধা এল। আ কো কোইয়ে- ২০১৪ সালত্তুন ধুরি পল্যাদি বাংলাদেঝর ছ’য়ান আদিবাসী ভাচ্চোই লেঘা শিঘিবার। মাত্তর! ২০১৪ সাল এনেই দেঘা গেল বাজেট নেই। সেনে কামান চালে ন’ পাত্তন। এ অক্তত কয়েক্কো এনজিও মুজুঙে আক্কোই এলে সংশ্লিষ্ট লেঘিয়্যাউনরে ঢাকাত নিনেই বই বানা ধরল। সক্যেও কো অয়ে ১৫ সালত্তন ধুরি ধরি বই আহ্’দত তুলি দিব’। সে ১৫ সালতও কন বই দেঘা নেই। আর কো কল ১৬ সাল কধা। সক্যেও দেঘা নেই বই।
ইন্দি বাংলা ভাচ্চান মরা মচ্যে গরি ভগে দের। দিন দিন আমা ভাচ্ছান চাংলা আ চাংলিশ অই যার। আমি দ’ সরকার আঝায় বোই থেলে ন’ অভ। ইয়ান আমার কাম। আমাত্তুন গরা পরিব’। এধক্যে এক্কান ভাপ উদি ২০১৪ সালত্তুন ধুরি এগামার গরি এ চাঙমা লেঘা শেঘানা কামান গরি যেল।
সুনানু হেলেন দেবান: Ikkunu Hingiri Tw Changma lega Sigebar Haam chalei nezor?
ইনজেব চাঙমা:আজলে বানা মুই নয়। ইয়োত আমি ১৭৮ জন কাম গরি, সে বাদেয়্যা পিত্তিমিত ছিদি পরি আঘি ১০ লাক চাঙমা। তারা বেক্কুন চাঙমা সাহিত্য বাহ্ সাবাঙ্গি মুই মনে গরং আ বিশ্চেস গরঙ। যা ওক, কন’ কাম উচ্চ নয়, আগাথ্যা। ইয়ান বেগে খবর পেই। আমা চাঙমা সাহিত্য বাহ্ সাবাঙ্গিদাঘিরে নিজরে কোচপান। এ নিজরে কোচপানাত্তুন বুঝি পারন মুই এ পিত্তিমি বুগত মাধা উজু, নাক অজল গরি বাজিবার চেলে মর কি কি গরচ আঘে। এ গরজত্তুন জাত্তোরে কোচপান, কোচপান দেচ্ছানরে। জাত্তোরে কোচপানা বলে লেঙে লেঙে, ফোবে ফোবে কাম গরি যাদন। সিত্তে তারাদাঘিরে এ মাধানত ইধোত তুলি ঝু ঝু আ পাত্তুরুতুরু গজাঙর।
অক কধা অহ্’লদে আমি আজলে এয’ বুঝি ন’ পারি এক্কো জাত কেনে পিত্তিমি বুগত বাজি থায়। আ পিত্তিমি বুগত বাজিবার চেলে এক্কো জাত ইজেবে পল্যা আমার কি দরগার। সেনে আমার মদ খাদে, জুয়া খেলাদে তেঙা থান মাত্তর! এক্কো চাঙমা সাহিত্য বই কিনদে তেঙা ন’ থান। বা মদ খাদে, জুয়া খেলাদে সময় পান মাত্তর, চাঙমা লেঘা শিঘদে সময় ন’ পান। সেনে কাম গত্তে ভারি আগাথ্যা। আ যারারে আমি অজল দাঙর দেঘি, ভাবি তারা দ’ একমুয়ে বিয়াল্লিচ ভাচ। এধক্যে গরি লারে গরি লেঙে লেঙ, ফোবে ফোবে অলেও কামান চালে নেযা পরে, পরিব।
আ ম’ কধা যুনি কং- এ কামানত্যাই মুই এচ্যে আত্থুব’। দাঙর এক্কান কলঙ্গ মাধাত গুরি আঘং। এ দুচ বা বজং/ভুল বেক মর। কিত্তে, চাঙমা সাহিত্য বাহ্ যক্যে দ্বি দশক পূর্তি অদ’ যেব তার আগেত্তুন ধুরি ম’ সমারিবো, ম’ ঘরনিবো অসুক। ইরুক খাগাড়াছড়ি এমপি মাচাং কুজেন্দ্র লাল ত্রিপুরারে আমা ফাংশানত পেবার আঝায় অনসুর পুর লামা অর। তা সিধু যেলে এচ্যে নয় আর এক দিনে এচ্ছো। এধক্যে গরি বেচ ৩/৪বার যেনেইও ত্যুঅ কয় অমুক বারে এচ্চো। এধক্যে নানাঙ কামে ম’ মক্কো অসুগ’ সময়ত কায় থেই ন’ পারং, যেধক্যে সময় দিবার কধা সময় দি ন’ পারং। পরে মুরি যেল। সেনে ইক্যে তে ন’ থানা ম’ দেন আহ্’ত্তান ভাঙি যেল। তে থাক্কে ঘর-সংসার চিদে মর গরা ন’ পত্ত। একবাজ্যা গরি এ কামন গরি পাত্তুং। পুঅ/ঝিউন লেঘা পড়া খরচ, বাজার খরচ অর্থাৎ ঘর-সংসারত তে এল মুকপাত্তি। ইক্যে মর বেক্কানি চিদে গরা পরের।
সুনানু হেলেন দেবান: Bekk milinei hoi jonore Changma legai janiye banei parile ejabot?
ইনজেব চাঙমা: গোদা পিত্তিমি যক্যে করোনা দংগা বেদিয়্যা ভরি যেল সক্যে আমা কামানও ধিমে ধিমে অহ্’ল। ত্যুঅ চাঙমা সাহিত্য বাহ্ সাবাঙ্গিদাঘি বোই ন’ এলাক। তারা যিয়োত যেংরি পারন কাম গরি যিয়োন দংগা পিড়ে করোনা অক্ততও। ২০০৪ সালত্তুন ধুরি ২০২০ সাল সং আমি ১০,০০৩ জনরে আ ২১ সালত জুলাই –সেপ্টেম্বর তিনমাজ্যা প্রতিবেদন রিপোর্ট (অক্টোবর- ১৫) মজিম ৯০৭ জনরে চাঙমা লেঘা শেঘেলং।মুধেমাধে ১০৯১০ জনরে চাঙমা লেঘা শেঘেই পাচ্যাই। ইক্যে তমার পুজোর অলদে, লেঘি পড়ি জানেয়্যা কয় কন বানে পারিলে? আজলে ইয়ান এধক্যে গরি কোই পাং, গেল্লে ২০১৬ সালত আদিবাসী লেখক সম্মেলনত নকবাচ্য গরবা এল আঞ্চলিক পরিষদর চেয়ারম্যান আ জেএসএসর জধানানু সুনানু সন্তু লারমা কোইয়ে- আগেদি তারা চাঙমা লেঘালোই চিদি দি দি গরিদাক মাত্তর ইক্যে এক্কো শব্দ পড়দে ভালক্কন সময় লাগে।
আর এক্কান উদাহরণ দি পারং- ২০০৪ সালত রাঙামাত্যা ইধু পিটিআই ট্রেনিঙত চাঙমা লেঘা শিঘি সার্টিফিকেট পিয়ে বাজেইছড়া প্রাইমারি ইক্কুলর মাচতর সুনানু শান্তি জীবন চাঙমা। গেল্লে ১৭ সালত তারলোই চাঙমা লেঘা পোইদ্যানে কধা কোই গরিনেই খবর পেলুং। মাত্তর তে কল- ইক্যে মর চাঙমা লেঘা বই পড়দে দাত ভাঙিবার অক্ত অয়।
আ মুই শিক্কোং ১৯৯৩ সালত। ইক্যে আমি ১৭৮ জন মানুচ কাম গরির। চাঙমা লেঘাসুমুত্ত নানান সাহিত্য সংস্কৃতি কাম গরি যের। ইয়ান নিজ উগুর ভর দ্যে। চচযা থেলে বেগে পারিবাক।
সালেন মুই কি বুঝে পারিলুং?
সুনানু হেলেন দেবান: Mujungo dinot arw he guribar Darooz aage?
ইনজেব চাঙমা:চাঙমা সাহিত্য বাহ্ এক্কো চাকমা ভাষা, সাহিত্য ও সংস্কৃতির প্রচারে নিবেদিত একটি সাহিত্য ও ভাষাগত সংগঠন, যুনি বাংলাদি কোই।
আমার কাম অহ্’লে চাঙমা সাহিত্যরে বিশ্ব সাহিত্য ইজেবে থিদ’ গরানা। চাঙমা একাডেমি থিদ গরানা। চাঙমা পিডিয়া বানানা। চাঙমা আরকাইভ সেন্টার থিদ’ গরানা। ঘরে ঘরে এযেত্তে ২০৫০ ভিদিরে চাঙমা লেঘা বই পরিরে কাবিল গরানা। চাঙমা লেঘা বই ফগদাঙিত্যা এক্কান ছাপানা খানা থিদ গরানা। এ পোইদ্যানে কাবিল মানুচ বানেবাত্তে জাগায় জাগায় কবিদ্যা কনা খলা জুগল গরানা, পাঠচক্র আ চাঙমা সাহিত্য বই পড়ানা খলা জুগল গরানা। এ কামানি ডিসেম্বর মাঝত্তুন ধুরি ফাং গরিবার এক্কা আঝা আঘে। চাঙমা লেঘা শিঘিনা কামান আ কবিদ্যা কনা খলা দ’ আগেত্তুন ধুরি গরি যের। আ পত্তিক হাই ইক্কুলত এক্কো মাচতর দিবার চেরেষ্টা গরির । আঝা গরি পারি খামাক্কাই পারিবং বেগর এজালে। যিদিক্যে গরি আমা কায় থেনেই, এজাল দিনেই এচ্যে আমি ২১ বঝর পার অই যের। সে এজাল বেগত্তুন তবনা গরির। বেক্কুনরে ঝু ঝু।
