চাঙমা সাহিত্য পত্রিকা ডেস্ক: নিজর, জাদর, দেঝর দোল দোল পাজানি ধরি রাঘেবাত্তে যার যার ভাচ, ওক্কোর, সাহিত্য আ রিদিসুদোমানি বেচ বেচ গরি লারচার গরানা গরচ আঘে কধা আন কোইয়োন কাচালং সরকারি ডিগ্রি কলেজত চাঙমা লেঘা পর্বোয়াউনরে সার্টিফিকেট দেনা পোইদ্যানে আহ্’জিল অইয়ে কধগীউনে।
গেলে ২৬ জুলাই ২০১৯ খ্রি: রাঙামাত্যা জেলাত বাঘাইছড়ি উপজেলাত নিধুকতুক্যা বিদ্যা ঘর কাচালং সরকারি ডিগ্রি কলেজত চাঙমা সাহিত্য বাহ্- বাঘাইছড়ি উপজেলা আ কাজালং সরকারি ডিগ্রি কলেচ ধেলা উদ্দোগে চাঙমা লেঘা পর্বোয়াউনরে সার্টিফিকেট দেনা পোইদ্যানে এক্কান দাঙর কেজ্জো অই যেল’।
কেেেজ্জা আনত নকবাচ্যা গরবা- দাঙগু দেব প্রসাদ দেবান (অধ্যক্ষ, কাচালং সরকারি কলেজ), আ মুলুক গরবা- চাঙমা সাহিত্য বাহ্’র সল্লাদার, লেঘিয়্যা, কবি, কাচালং কলেজ’ সাত্থু দাঙগু লালন কান্তি চাঙমা, কাচালং মডেল গার্লস হাই ইক্কুল দাঙর সাত্থু (প্রধান শিক্ষক), কবি দাঙগু ভদ্র সেন চাঙমা, বিটি হাই ইক্কুল দাঙর সাত্থু দাঙগু ধর্ম রাজ চাঙমা, চাঙমা সাহিত্য বাহ্ গরা কমিতি দাঙর কাবিদ্যাঙ দাঙগু ইনজেব চাঙমা আ ইন্টান্যাশনাল ইন্ডিজিনিয়াস হিউম্যান রাইটস অর্গানাইজেশন অফ কানাডা সংস্থার কাবিল কাবিদ্যাঙ (সদস্য সচিব) দাঙগুবি রুপসী চাঙমা রুপাদাঘী।
বেন্যা মাধান ১০ টা কেজ্জোআন আরকানি গরা অয়। এ কেজ্জোআনত খলানানু চাঙমা সাহিত্য বাহ্ বাঘাইছড়ি উপজেলা ধেলা জধানানু দাঙগুবি স্বর্ণা চাঙামা। এক্কো চাঙমা গান গেইনে কেজ্জোআন আরকানি গরা অইয়ে। এ পরেদি পাত্তুরুতুরু কধগী দাঙগু অন্তর চাাঙমা কধা কনা আ পর্বোয়াউন মন’ কধা ভাঙি কনা আ নকবাচ্যা গরবা কধগীর কধা থুম অনার সমারে ১৯৬ জন পর্রোয়ারে সার্টিফিকেট আ ১২ জনরে (যারা পজিশন ১-৩) সার্টিফিকেট দেনা সমারে বুকশিচ দিয়্যা অইয়ে।
শেজেদি খলানানু দাঙগুবি স্বর্ণা চাঙমা বেক্কুনরে, যারা ঘর’ সাত কাম ফেলে এ কেজ্জোআন সরিত অই ভালেদি গজ্জোন তারারে আ যারা এ কামানিত এজাল দেদন তারারেয়্য ইধোত তুলি বারবাঙানে নাঙ গিনি পাত্তুরুতুরু আ ঝু ঝু জানেই খলা থুম গরি দিল’।
