আমাহ্ জাত্তোরে পিত্তিমী বুগত বাজে রাঘেবাত্তেই আ পোতপোত্তে গরি ফুদি রাঘেবাত্তেই, জাদ' গরা আন দর'মর' গরিবাত্যাই- আমাহ্ মা ভাচ্চান খামাক্কাই শিঘি রাঘানা গরচ আঘে- সুনানু মুনিয়া চাঙমা। জাতীয় কবি কাজী নজরুল ইসলাম বিশ্ববিদ্যালয়ত্ ফিন্যান্স এন্ড ব্যাংকিং বিভাগত্ পর্বোয়া।

মুই মুনিয়া চাঙমা। জাতীয় কবি কাজী নজরুল ইসলাম বিশ্ববিদ্যালয়ত্ ফিন্যান্স এন্ড ব্যাংকিং বিভাগত্ পর্বোয়া। মুই যক্কে কলেজত এলুঙ সক্কে ম' সমাজ্জে কয়েক জনরে তারা নাঙানি আমাহ্ চাঙমা লেঘাদি লিঘদে দিঘিনেই মত্তনু আমাহ্ মা-ভাচ শিঘিবার ভজমান আওচ উয়ে। মাত্তর দুঘর কধা, মুই সে সময়ত আমাহ্ চাঙমা অহ্'রক্কুন শিঘিবার জু ন' পাঙ। দংগা পিরেহ্ করোনাত্যাই ঘরত ফিরি এ পেইনেই ম' আওচ্চান পূরণ গরিবার জু অহ্'য়। আর এ জু'আন গরি দিয়্যা সুনানু লিটন চাঙমা আ সুনানু কিংশুক চাঙমা দা দাঘি। তে গেলদে ২০২০ সালর নভেম্বর মাঝত 'চাঙমা সাহিত্য বাহ্' তপ্পেত্তুন আমাহ্ 'কুকিছড়া' আদামত্ 'কুকিছড়া দ্যা হিলম্যান যুব ক্লাব'ত ১২ দিনর চাঙমা লেঘা সার্টিফিকেট কোর্স ফাং গরা অহ্'য়। তে মুই সে কোর্সত চাঙমা লেঘা শিঘিবার আওচ্চান পূরণ গরি পাজ্জুং। ইক্যে মুই আমাহ্ মা-ভাচ্, আমাহ্ চাঙমা অহ্'রক্কুন চিনং, লেঘি জানং, পরিহ্ পারং। সিত্যাই মুই 'চাঙমা সাহিত্য বাহ্' আ 'কুকিছড়া দ্যা হিলম্যান ক্লাব' রে জু জু আহ্ ভালেদি জানাঙর। চাঙমা লেঘা শিঘিনেই, ম' আওচ্চান পূরণ গরি পারিনেই মর' ভজমান গম' লাগিল’ যিয়ান মুই লিঘিনেই বা কোইনেই ফগদাং গরি ন' পারিম। মুই ইক্কু কোই পারিম, "মুই চাঙমা। তজিমপুর জাত। আমার আঘে নিজ' ভাচ্, নিজ' লেঘা, নিজ' রিদিসুধোম, নিজ' উরন-পিনন." জাদর ভাচ্ অহ্'লদে এক্কো জাদর নিঝেনী। যে জাদর নিঝেনী থেব', সে জাত্তু কন' দিন ন' লুগেব'। মাত্তর, দুগর অলহ্'দে এচ্যে আমাহ্ সেই ভাচ্, ওক্কোর, রিধিসুধোম আনি লুগে যাল্লোই। ইক্কু যনি আমি আমাহ্ ভাচ্চান্ শিঘি ন' রাঘেই, রিধিসুধোম আনি ধরি ন'রাঘেই, আমাহ্ পরেন্দি যে পিরিহ্'উন্ এবাক্ তারায়ু ন' পারিবাক। আমাহ্ জাত্তোর পিত্তিমীত্তুন লুগে যেবার দরআন থেব’। সিনাত্যাই, আমাহ্ জাত্তোরে পিত্তিমী বুগত বাজে রাঘেবাত্তেই আ পোতপোত্তে গরি ফুদি রাঘেবাত্তেই, জাদ' গরা আন দর'মর' গরিবাত্তেই- আমাহ্ মা ভাচ্চান খামাক্কাই শিঘি রাঘানা গরচ আঘে। 

সে লগে কুজোলি থেব' আমাহ্ জাদর চিগোন-দাঙর বেগ ইদু, "আমাহ্ চাঙমা অঝাপাত্ শিঘানা আন সাতকাম ধরিনেই বেগে শিঘি রাঘেই আহ্ আমাহ্ পরেন্দি উদন্দি পিরিহ্ উনরেয়্য শিঘিবাত্তেই জিত তুলি দি।"

ইক্কে মুই কোই পারং দাঙর মু গরি, ম’ নিজ' মা ভাচ মাদে পারং লিঘি পারং- সুনানু টন্নী তালুকদার মাষ্টার্স ১ম বর্ষ, রাষ্ট্রবিজ্ঞান বিভাগ, রাঙামাত্যা সরকারি কলেজ ।

সুনানু টন্নী তালুকদার মাষ্টার্স ১ম বর্ষ, রাষ্ট্রবিজ্ঞান বিভাগ, রাঙামাত্যা সরকারি কলেজত পরেহ্। গেল্লে ডিসেম্বর ২০২০ইং চাঙমা লেঘা শিঘি নিজরে চাঙমা আ শিক্ষিত ভিলেন দাবি গরে। যারা মা- ভাচ আ নিজ’ ওক্কোরলোই দুরত আঘন তারারে শিক্ষিত মনে ন’ গরে।

তাত্তুন (চাঙমা সাহিত্য বাহ্ জধানানু, সুনানু ইনজেব চাঙমাদাঘি) পুজোর গরা অইয়ে- কি ভাপ উদি এধক দেরি গরি চাঙমা লেঘা শিঘিল? চাঙমা লেঘা শেঘি নিজরে কেঝান লাঘে? আ চাঙমা লেঘা শিঘানা পোইদ্যানে কাররে কি কবার আঘে?  

তে কল’- “মুই পল্যে ঝু জানাং চাঙমা সাহিত্য বাহ্ রে। দোল চেহারায়ান আমারে একদিন সারি যেব, মাত্তর, জ্ঞান আমারে সারি যেদ’ নয়। মর খুপ আওচ এল’ চাঙমা লেগা সিগানা ম’ মা ভাচ শিগানা । নিজ মা ভাচ্ছোই কারর মা ভাচ তুলনা গরা ন’ যায় । এক্কো তজিমপুর জাত ইজেবে আমার ওক্কোর, ভাচ আ এক্কো জাদর যে দরপ্পানি থায় আমার কন’ উন’ নেই। সেনে আমি  চাঙমা  কোলেই, চাঙমা নাঙ দিই কেনেই চাঙমা লেঘা শিঘিবং, সে চদনাত্তুন মর দেরি অলেয়্য চাঙমা লেঘা শিঘানা। মা-ভাচ যে কন’ জাদর  দাঙর আহ্ত্যার, একজনলোই আর’ একজনে মাদামাদি গত্তে, সুক, দুগর কধা ফগদাং গত্তে যিয়ান সাতকাম সিয়ান অলদে মা-ভাচ। 

মুই একদিন শুননং মহালছড়ি কলেজত নায়ি চাঙমা লেঘা শিঘান। করোনা এনেই মর শিঘানা নঅয়, গেলদে ২০২০ সালর ডিসেম্বর মাঝত কায়াংঘাট আদামত কায়াংঘাট করুনাদয় বৌদ্ধ বিহারত দাঙর চিগোন ভেই বোনসুমুত্ত এক সমারে মর চাঙমা লেঘা শিঘানা জু অইয়ে। গুর ভেই-ভোনদোই এক সমারে লেঘা শিঘানা ইয়ান আর এক্কান দাঙর খুজি। 

চাঙমা লেঘা শিঘানার জু গুরিদি শুক্রমনি তালুকদার। তারে মুই এ্যাংকুর জানাঙর। আরো জু জানাঙর চাঙমা সাহিত্য বাহ্ মানুচ্ছূনরে। আ সুনানু ইনজেব দা দাঘি আ সুনানু সুপায়ন দা দাঘিরে। তারার এজালে মুই নিজো মা ভাচ্চান শিঘি পাজ্জুং। আগে মুই চাঙমা লেগা অহ্’রক্কুন ন’ চিনিদুং, ইক্কে মুই মাদে জানং লিঘি জানং। ইক্কে মুই কোই পারং দাঙর মু গরি ম’ নিজ মা ভাচ মাদে পারং লিঘি পারং। 

যারা নুও উদন্দি ভেই-বোন আঘন তারা ইদু চাঙমা লেঘা চিনপচ্যা গরিদি পারিবং আ চাঙমা জাত্তরে বাজেই রাঘে পারিবং। সেনত্তে চাঙমা লেঘা শিঘানা। আমার বেক্কুনর দায়িত্ব নিজো মা ভাচ্চান ধরি রাঘেবার নিজো জাত্তুরে বাজেবার, চাঙমা ভাচ্চান শিঘোদে লিঘোদে বেক্কুনে ন’ লাজেবং, ন’ দরে বং, বেক্কনে উজেয় যেবং আদাম্মে পারাল্লে আজু নানু, মা বাপ,ভেই বোন লক।”

"ন' লাজেবং ন' দরেবং, উযেই এজ ভেই বোনলক। আমি বেগে চাঙমা লেঘা শিঘিবং, চাঙমা মা-ভাচ্চানরে মুজুঙেন্দি- আক্কোই নেজেবং- সুনানু পরেশ চাঙমা, চট্টগ্রাম বিশ্ববিদ্যালয়

মা-ভাচ আ চাঙমা লেঘা আমা চাঙমা জাদর দাঙর আহ্ত্যার। মর ভজমান গরচ এল চাঙমা লেঘা শিঘিবার। আর এ পোইদ্যানে গেলদে ২০২০ সালর নভেম্বর মাঝত কুকিছড়া আদামত 'কুকিছড়া দ্যা হিলম্যান ক্লাবত' চিগোন দাঙর বেগে সমারলোই মর চাঙমা লেঘা শিঘানার জু অইয়ে আর এ চাঙমা লেঘা শিঘিবাত্যাই মরে জু গরি দিয়্যা সুনানু লিটন চাঙমা দা দাঘি। তারে ম' তরপত্তুন কোচপানা আ এ্যাংকুর জানাঙর। সে সমারে "চাঙমা সাহিত্য বাহ'র" জধানানু, সুনানু ইনজেব চাঙমা দা, সুনানু লব্ধ চাঙমা দা, সুনানু সুপায়ন চাঙমা দা দাঘিরেও এ্যাঙ্কুর জানঙর। তারার এজালে মুই চাঙমা লেঘা শিঘানার জু পিয়োং। আ চাঙমা লেঘা শিঘিবার আগে চাঙমা অহরক কারে কয় সিয়ান মুই খবর ন' পেদুং। ইক্কে মুই অঝাপাত কারে কয় খবর পাং। অঝাপাত পরিহ্ জানং, লিঘি জানং। ইক্কে মুই কোই পারং নাক অজল গরি, বুক দাঙর গরি মুই চাঙমা লেঘা পারং; লিঘি পারং। আ সেনত্তে চাঙমা লেঘা সমারে আমা বেগর চাঙমা মা-ভাচ আ জাত্তোরে কোচপাহ্ পরিহবো। জাত্তোরে কোচপেনেয়, জাদর চাঙমা লেঘানর চিনপচ্যা গরিবাত্যাই আমা বেগর চিগোন-দাঙর ভেই বোনুনরে উজে এনেই চাঙমা লেঘা শিঘা পরিহ্বো। চাঙমা লেঘা শিঘিবাত্যা যেনেই আমার জাদর মুজুং দি পরিবো। জাদর নিঝেনী অইনেই চাঙমা লেঘানরে পিত্তিমির মুজুঙোত আক্কোই নেযা পরিহ্’ব। কিত্যাই, একদিন আমি আমা মা-ভাচর অহরক্কুন জাদর উধন্দি ভেই বোনুন' ইধু চিনপচ্যা গরি দি পারিবং, জাত্তোরে বাজেই রাঘে পারিবং। সেনত্তে বেগর চাঙমা লেঘা শিঘা পরিহবো। আ এ পোইদ্যানে মর চাঙমা লেঘা শিঘানা। "ন' লাজেবং ন' দরেবং, উযেই এজ ভেই বোনলক। আমি বেগে চাঙমা লেঘা শিঘিবং, চাঙমা মা-ভাচ্চানরে মুজুঙেন্দি- আক্কোই নেজেবং।

মুই চাঙমা লেঘা লিঘি জানঙ, চাঙমা অহ্’রক্কুন মাদে জানঙ। ম’ ইধু ইক্যে চুচ্যাঙ্যা- কা, গুজঙ্যা- খা অহ্’রক্কুন খুব সদর সদর লাগদন- সুনানু ইলি চাঙমা, চট্টগ্রাম বিশ্ববিদ্যালয়,বাংলা বিভাগ।

সুনানু ইলি চাঙমা

সুনানু ইলি চাঙমা চট্টগ্রাম বিশ্ববিদ্যালয় পর্বোয়া । তে চাঙমা সাহিত্য বাহ্’রে কল’ - “চাঙমা লেঘা আহ্ চাঙমা ভাচ ম’ ইদু খুব কোচপানার এক্কান জাগা জুরিহ্ থায়।মুই যক্যে কলেজত পরিহ্’দুং সক্কেত্তুন ধরি তে মর ম' জাত আ ম’ ভাঝর অহ্’রক নিনেই ধারণা অয়।শিগিবার মন চেলেয়্য শিগানা জু ন’ পাঙ।রাজশাহী পড়ানার সুবাদে রাজশাহী বিশ্ববিদ্যালয়'র বড় ভেই বোনুনর জাত নিনেই দোল দোল চিদেচয্যার কধা শুনিবার জু ওয়ে মর।সিত্তুন ধরিই মর ম’ নিজর মা ভাচ আ অহ্’রক্কুন শিগিবার আওচ্চান যদবদে গরি মাধাত সোমে রয়ে। সক্কে মনে গত্তুং বিশ্ববিদ্যালয়ত পড়িলে তে চাঙমা ভাচ শিগিবার জু অভ’। মুই সে জু আন বাজ্যা  রয়োং। বিশ্ববিদ্যালয়ত পড়ানা আরগানি গরলে ম সমাজ্জ্যে কয়েকজন চাঙমা ভাচ পারন শুনি তারাত্তুন শিগিবার চেলেয়্য করোনা ভাইরাস আন এই যেয়েগোই। শিগানা ন’ অয় আর। মাত্তর, ঘরত দংগা পিরেহ্ এ করোনা ভাইরাস সময়ানত এম্বা বর এক্কান আওচ পুরেব মুই ভাবি ন’ পারঙ। "চাঙমা সাহিত্য বাহ্" আহ্ ইনজেব চাঙমা দা, সুপায়ন চাঙমা দা সুমুত্ত আর’ যারা যারা আমা চাঙমা জাদত চাঙমা লেঘা শিগানার জু গরি দেদন তারারে ম’ তপ্পেত্তুন এ্যাঙ্কুর দিনেই চিগোন ন’ গুরিম।  ম’ মন সুন্দুগত্তুন কোচপানা আ অদেল ধোয্য বর মাগি দেনা থেহল বেক্কুনত্তেই। ম’ চাঙমা লেঘা শিগানার আওচ মর জাদ’ ইদু ম’ কোচপানাত্তুন। চাঙমা এক্কো জাত ইজেবে ভাচ, অহ্’রক্কুন আগন। সিগুনরে শিগিনেই পিত্তিমীর মানেই লগ’ ইদু দোলেদালে চিনপুচ্যে গরি দিবাত্তেই আমার নিজর আগে শিগানা গরচ আঘে। মুই আর’ ভাবঙ মুই পারিলে মর পরেন্দি যে পিরিহ্’উন এবাক সিগুনও পারিবাক। সিগুন পারিলে তারার পরেন্দি ইগুনো পারিবাক। 

সক্কে, আমা মা ভাচ আ আমা জাত্তো যুক যুক ধরি বাজি থেব’ মাধা উজু গরি। ইক্কু মুই চাঙমা লেঘা লিঘি জানঙ, চাঙমা অহ্’রক্কুন মাদে জানঙ। ম ইধু ইক্যে চুচ্যাঙ্যা- কা, গুজঙ্যা- খা অহ্’রক্কুন খুব সদর সদর লাগদন। ম’ ইদু ইক্যে মা মানে বুগত পদলা মা আ বা মানে উবরমুয়া বা। এক্কো সাহিত্য নিনেই পড়িয়ে ইজেবে ইক্যে মুই মনে অলে চাঙমা লেঘালোই কবিদে লিাঘ পারঙর, পজ্জন লিঘি পারঙর। মন’ সুন্দুগত্তুন এক্কান কোই ন’ পাজ্জে গম লাগানা কাম গরের মর। অনতিত্যে শিঙোর লোই যিনিক্যা গরি গাচ্ছুন এক ঝলগা বোয়েরত আলগে উগুরে পড়ন, ঠিক সেধক্যে আমিও অনতিত্যে গরি বানা চাঙমা নাঙ দিনেই এ বাঙালাদেঝত আ গদা পিত্তিমিত থিগি থেই ন’ পারিবং। 

এ দেঝত, আমার আঘেদে জাগানিত বুক ফুলে বাজি থেবাত্তেই আমার চাঙমা জাত্তোরে আরো শক্ত গরা পুরিবো। এক্কো জাদর নিজ’ ভাচ, নিজ’ ওক্কোর, নিজ’ রিদিসুদুম শক্ত মক্ত গরি ধরি রাঘেবার আমার বেক্কুনর গরচ আঘে। আমি নিজ উরোন পিনোন আনি চর্চা গরলেও আমার নিজ’ ভাচ্ছান এয’ দোলে দরমর গরি ন’ পারি। নিজ’ ওক্কোরুন লিঘদে আহ্ত বেঙা কঙা অহ্’য়, নিজ’ ভাচ পড়দে দাত ভাঙি যান, দিাঘলে দলামজা লাগে। সেনত্যেই আমার গাবুজ্যা গাবুরী, চিগোন চিজি দাঘি লগরে আ আমার সমাজর মুরুব্বি আ বর মানুচ্চুনরে কুজোলি গরিম-  “চাঙমা ভাচআন দোলে শিগা পুরিবো আ সাতকাম মনে গরা পরিবো। সমাজর গম চিদে গরিয়্যা মুরুব্বিগুন জাদর সুদো আন শক্ত গরিলে আমার মুজুঙেদি যে পিড়িবো এবাক, চিজিদাগি আমা জাদ’ আ ভাচআনোরে দোলে চিনি পারিবাক আ কোচপেবাক। আমিও যিগুন শিগিলোয়েই আমা ভাচ আন, আমি বানা আমা ভিদিরে  ন’ রাঘেই ছিদি দিবং যে যিদু পারি, যে যিধু থেই, যে যিয়োত জু পেই সিয়ত। 

"চাঙমা সাহিত্য বাহ্" আমারে দরমর চাঙমা বানেয়্যা ,যিদ্দুর পারি আমি তার স্ববন আন পুরে দিবার পদত আহ্’দি। একদিন মোন’ ঘরে ঘরে আমা ভাচ আ অ্হ্’রক্কুন জ্বলি জ্বলি থেবাক। "মোন-মুরহ্’ত পহ্’র ছিদিবো একদিন" এ স্ববন ওক আমার বেক্কুনর এক্কান স্ববন।”

আমাত্তুন খামাক্কাই খামাক্কাই চাঙমা ভাচ, অঝাপাত শিগানা দরগার- মিঠুন চাঙমা, থিয়েটার এণ্ড পারফরম্যান্স, জাতীয় কবি কাজী নজরুল ইসলাম বিশ্ববিদ্যালয়

মিঠুন চাঙামা

ম’ নামান মিঠুন চাকমা। মুই জাতীয় কবি কাজী নজরুল ইসলাম বিশ্ববিদ্যালয়ত থিয়েটার এণ্ড পারফরম্যান্স স্টাডিজ বিভাগ অত পরংঅর। ২০২০সালত অক্টোবর মাঝত " চাঙমা সাহিত্য বাহ্, পানছড়ি ধেলা তপ্পেত্তুন শান্তিপুর সরকারি প্রাইমারি ইক্কুলত চাঙমা লেঘা সার্টিফিকেট কোর্স জুগল গরলে মরয়্য সে কোর্সত চাঙমা লেঘা শিগিবার জু অহ্’য়। ইক্যে মুই চাঙমা লেঘা লেঘি পরিহ্ পারং। সিত্যাই মুই চাঙমা সাহিত্য বাহ্’রে ঝু ঝু আ পাত্তুরুতুরু ন’ জানেই থেই ন’ পারঙর আ সমারে চাঙমা সাহিত্য বাহ্’বোর ভালেদি তবনা গরঙর। এ মাধানত ইধোত তুলঙর- যারা নিআলচি গরি আমারে চাঙামা লেঘা শেঘেলাক তারাদাঘিরে। চাঙমা লেঘা বা চাঙমা অহ্’রক্কুন শিঘিনে মত্তুন খুপ গম লাক্যা। চাঙমা অহ্’রক ন’ পারিবার আগেদি বাঙালুনে বেচ কধাক তমার ওক্কোর, ভাচ নেই তুমি উপজাতি । এ ধক্যে কধানি শুনা পত্ত। ইক্যে মুই বুক পুলে কোই পারিম আমার  ভাচ আঘে, ওক্কোর আঘন, সংস্কৃতি তারাত্তুন ভিন্ন আ বুঝদে উচ্চো অভ’। আর আমি যনি আমা ভাচ এ লিঘি পড়ি ন’ জানি আমা জাত্তু লুগি যেব’ দিন দিন কন’ চিন ন’ থেব’। 

চাঙমা সাহিত্য বাহ্ জধানানু সুনানু ইনজেব চাঙমা সমারে

সেনে বানা মুই নয় আমার জাত ভেই-বোনুনরে কোম- আমাত্তুন খামাক্কাই খামাক্কাই চাঙমা ভাচ, অঝাপাত শিগানা দরগার। ইরুক সময় অঝাপত শিঘানা গরচ অই পচ্যে।  সিগোন দাঙর বেগে আগে পিজে বেগত্তুন চাঙমা লেঘা পড়ি জানা পরিবো। আগদিন নেই উজেই জের, উজেই যেবং সঙসমারে।

দরত্তুন, লজাত্তুন মরয়্য চাঙমা লেঘা শিঘানা - সুনানু সুস্মিতা চাঙমা

 

সুনানু সুস্মিতা চাঙমা

সুনানু সুস্মিতা চাঙমা চট্টগ্রাম বিশ্ব বিদ্যালয়ত পালি ৩য় বর্ষ পর্বোয়া। দংগা পিড়ে করোনাত্যাই ঘরত এলে চাঙমা লেঘা শিঘিবার জু অহ্’য়। তে গেল্লে অক্টোবর মাঝত চাঙমা সাহিত্য বাহ্, বাঘাইছড়ি উপজেলা ধেলা উদ্যোগে উগলছড়ি নবজ্যোতি মনোরম বৌদ্ধ বিহারত (শিজক বটতলা) চাঙমা লেঘা সার্টিফিকেট কোর্স ফাংগরা অহ্’লে সুনানু সুস্মিতা চাঙমারয়্য চাঙমা লেঘা শিঘিবার জু পিয়্যা। এধক ভিলন বানা ছটফদে ছটফদে এল’ চাঙমা লেঘা শিঘিবার। মাত্তর জু ন’ পানার শিঘানা ন’ অহ্’য়। 

তে কল’- মুই, খবর পাং আমি বার বাঙানে মা-ভাচ্ছোই লেঘা শিঘিবার জু পানার পরয়্য আ নেতাদাঘি অলিপ গরানার এচ্যে চাঙমা জাত্তো লেহ্ম পরি আঘি। আজি যার, মা-ভাচ, আল্যাক আ রিদিসুধোমানি। যেন কোই পারি ১৮৬০ সালত ব্রিটিশে পার্বত্য চট্টগ্রাম দঙলে নেযা সমারে চাঙমা, মারমা ভাচ্ছো লেঘা শিঘিবার জু দিয়্যা। এর পর ১৯৩৭-৩৮ সালতয়্য জু গরি দিয়্যা। সুনানু কামিনী মোহন দেবানদাঘি সিয়ান গজি ন’ লনার মা-ভাচ্ছোই লেঘা শিঘানা আর ন’ অহ্’য়। তা পর ১৯৩৯ সালত ইন্দুস্তান - পাকিস্তান ভাক অলে পার্বত্য চট্টগ্রাম পাকিস্তানর ভাগে পরিলে পাকিস্তান সরকারস্যা আমারে চাঙমা লেঘা শিঘিবার জু গরি দিল’ ১৯৫৯ সালত। সক্যে দেবানদাঘি ন’ চানার আমি বারবাঙানে মা-ভাচ্চোই লেঘা শিঘিনা লেহ্ম পরির। 

১৯৯৭ সালত পার্বত্য চুক্তি অহ্’য়। পার্বত্য চট্টগ্রাম চুক্তিত ৩৩ নং ধারাত (B) অনুচ্ছেদে পার্বত্য চাগালত মা-ভাচ্ছোই লেঘা শিঘিবার পোতপোত্য গরি লেঘা থানা পরয়্য ২০১৭ সালত এনেই প্রাক প্রাথমিকত বই পেনেই কন’ লাভ নেই।  মাষ্টরুনর পড়েবার যেমনি গরচ মনে ন’ গরন তেমনি সরকার কন’ শিক্ষা কারিকলাম নেই মা-ভাঝর পোইদ্যানে।

আ বেগত্তুন বেচ দাঙর কধা অলদে- মর রুমমেট শাহীনা এক দিনে মত্তুন পুজোর গরের এক্কো চাঙমা জাত ইজেবে আমার ওক্কোর আঘননি নেই। মর মনত সক্যে দর সম্যে কন’ লেঘা বাজে দ্যে নিনা। মাত্তর, মুই আঘন কনা সমারে সমারে আর কিচ্ছু পুজোর ন’ গরিল’। মুই বাজি গেলুং দর আ লাজত্তুন। ত্যুঅ দর থায় বাঙাল সমাজ্যালোই কধা কলে। কন’ আ অঝাপাদর পোইদ্যানে কিঝু পুজোন গরন নিনা। এ দরত্তুন, এ লজাত্তুন মরয়্যা চাঙমা লেঘা শিঘানা। 

মুই নিজরে চাঙমা ভাবঙর, মুই চাঙমা লেঘা পারং- অন্বেশন চাঙমা (দর্শন ১ম বর্ষ, রাজশাহী বিশ্ববিদ্যালয়, বাংলাদেশ)।

মুই পত্তমে চাঙমা লেঘা শিঘিবার জু পানার পরয়্য চাঙমা লেঘা শিঘিবার এধক গরচ মনে ন’ গরং। ম’ বর ভেইদাঘি এধক কুজোলী গরিদাক ত্যুঅ ম’ মানাত ধারচ ন’ জন্মেল’ । মনে মনে ভাবং চাঙমা লেঘা শিঘিনেই কী গরিম। সক্যে চাঙমা লেঘা ন’ শিঘি ইংরেজি শিঘিদুং।

পরেদি যক্যে রাজশাহী বিশ্ববিদ্যালয়ত ভর্তি ওলুং সিধু ম’ সমাজ্যাদাঘি (বাঙাল) পুজোর গরন, চাঙমা লেঘা পারং নিনা? কিথ্যা তারা খবর পান চাঙমাদাঘির বেক আঘে, ভাচ, ওক্কোর, আল্যাক (সাহিত্য), রিদিসুধোম আ চাঙমাদাঘি বাংলাদেঝত জনসংখ্যাদি দ্বি’ নম্বরত। শিক্ষে-দিক্ষেদিয়্য বেগত্তুন বেচ আক্কোয়ে আঘন। সিত্যাই তারা পুজোর লদন। 

মাত্তর! মুই ন’ জানঙ আমা অঝাপাত। বানা অন্য জনত্তুন শুনিনেই আদালং-পাদালং গরি কোই দিলুং চুচ্যাঙ্যা- কা, গুজঙ্যা- খা, চান্দ্যা- গা এ তিন্নো ওক্কোর। সিয়োত নিজরে নিজে কত্তমান লাজেলুং মুই বাদে কন’ জনে বুঝি ন’ পারিবাক। লাজে ধচ্যে। সে লাজত্তুন ইমে গরিলুং চাঙমা লেঘা খামাক্কাই খামাক্কাই শিঘিম।  

সুনানু ইনজেব চাঙমা আ সুনানু অন্বেশন চাঙমা

মুই ইয়ান কোইম- “আজলে মুই দাঙর কবাল্যা। করোনাত্যাই রাজশাহীত্তুন ঘরত ফিরি এই পেলং, সরকারে ইক্কুল কলেচ বন্ধ গরানা সমারে সমারে। ঘরত এনেই পুজ্য জ্ঞান কীর্তি ভান্তেদাঘি আমা আদামত চাঙমা সাহিত্য বাহ্ তপ্পেত্তুন চাঙমা লেঘা কোর্স জুগল গচ্ছে। আর দেরি ন’ গরি চাঙমা লেঘা শিঘিলুং। কারণ, মুই খবর পাঙর এক্কো জাত অদ’ যেনেই আমাত্তুন বেক্কানি লাগিবো। ভাচ, ওক্কোর, আল্যাক (সাহিত্য), রিদিসুধোম বাজি থেলে এক্কো জাত বাজি থায়। এধক্যে চিদেত্তুন চাঙমা লেঘা শিঘি নিজরে নিজে চাঙমা ভাবঙর, এর আগেদি এলুং মুই কজ্জর।  

চাঙমা সাহিত্য বাহ্ তপ্পেত্তুন ১৬৪ জনরে সার্টিফিকেট দিয়্যা অহ্’য়

২০৫০ ভিশন ভালেদি ওক-

"ত্রিশতিন জাদির ভাচ পারানা এক্কান দাঙর গুন মাত্তর, তার আগে নিজ 'ভাচ, নিজ লেঘা পারানা সাতকাম" 

এ মুলুক কধায়ান মুজুঙে রাঘেই চাঙমা সাহিত্য বাহ্ বাঘেইছড়ি উপজেলা আ কাচালং সরকারি কলেজ ধেলার তপ্পেত্তুন ৩২নং বাঘেইছড়ি ইউনিয়ন পরিষদর উদোনত চাঙমা পর্বোয়াউনোরে সার্টিফিকেট ভাক গরি দেনা পৈদ্যানে দোল এক্কো দাঙর তেম্মাংখলা অই যেল।

এ তেম্মাং খলাবোত নকবাচ্য গরবা ইজেবে আহ্’জিল অইয়ে ৩২ নং বাঘেইছড়ি ইউনিয়ন পরিষদর চেয়ারম্যান সুনানু সুনীল বিহারী চাঙমাদাঘি, মুলুক গর্বা ইজেবে আহ্জিল এলাক কাচালং সরকারি কলেজর মুল খুদো (অধ্যক্ষ) সুনানু দেব প্রসাদ দেবানদাঘি, কাচালং সরকারি কলেজর এজাল সাত্থু, কবি লেঘিয়্যা সুনানু লালন কান্তি চাঙমাদাঘি, সুনানু শান্তিময় চাঙমাদাঘি (বিদি যিয়্যা সাত্থু), সুনানু প্রীতিময় চাঙমা দাঘি(কার্বারী), সুনানু বীর কুমার চাঙমা (এজাল সাত্থু, উগলছড়ি হাই ইক্কুল), চাঙমা সাহিত্য বাহ্ গরা কমিতির জধানানু, সুনানু ইনজেব চাঙমাদাঘি, চাঙমা সাহিত্য বাহ্ বাঘাইছড়ি উপজেলা ধেলার জধানানু, সুনানু স্বর্ণা চাঙমা, চাঙমা সাহিত্য বাহ্ গরা কমিতির ভান্ডালি কাবিদ্যাং, সুনানু রিমি চাঙমাদাঘি, চাঙমা সাহিত্য বাহ্ গরা কমিতির সাবাঙাগী সুনানু চিত্তি চাঙমা, চাঙমা সাহিত্য বাহ্ বাঘাইছড়ি উপজেলা ধেলা, এজাল জধানানু পূজ্য শ্রীমৎ জ্ঞান কীর্তি ভান্তেদাঘী আ চাঙমা সাহিত্য বাহ্ দিঘীনালা উপজেলা ধেলার বা কাবিদ্যাং সুনানু সূচনা চাঙমাদাঘি।

কধগীদাঘি কলাক, “এধক্যে দাঙর দংগা পিরেহ্ সেরে সেরে চাঙমা সাহিত্য বাহ্ যে কামানি গরি যিয়্যা সিয়ানি জুম্ম জাত্তো খামাক্কাই ইধোত রাঘেব। এ কামানি গরি যানার তারাদাঘি দোল দোল সল্লা দিলাক।

ফাংশান আরকানিত “চেদনর আগাজত এক্কান নাঙ..........” গীত্তো খলাবো ফাংগরা অহ্’য়।

এ খলাবোত খলা পজ্জনীগিরি গরিলাক- চট্টগ্রাম বিশ্ববিদ্যালয়র পর্বোয়া সুনানু সুস্মিতা চাঙমাদাঘি আ রাজশাহী বিশ্ববিদ্যালয়র পর্বোয়া সুনানু অন্বেশন চাঙমাদাঘি।

এ ফাংশানানত ১৬৪ জনরে সার্টিফিকেট দিয়্যা অহ্’য়। সমারে যারা পজিশন ১-৩ তারাদাঘিরে বই বুকশিচ দিয়্যা অয়। আ খলাবো শেজে চিত জুরনি তামাজা গরা অহ্’য়।