পার্বত্য চট্টগ্রামত আদিবাসী মানুজর মাধাউগুরে বনা বনা কালা মেঘ

“পার্বত্য চট্টগ্রামত আদিবাসী মানুজর মাধাউগুরে ইক্যে বনা বনা কালা মেঘ”- দীঘিনালাত ২৫৬২ বুদ্ধ জয়ন্তী পয়ধেনে ধর্ম খলাত এ কধান কোইয়োন।

পা: ভিক্ষু সংঘ দিঘীনালা উপজেলা ধেলা উদ্যোগে দীঘিনালাত  ২৫৬২ বুদ্ধ জনম পয়ধেনে গোদা পিত্তিমিত শান্তি থিদব্বরীত্তেই বেন্যা মাধান ৮:১৫ মি. দিঘীনালা তপোবন বৌদ্ধ বিহার’ উদোনত আজার আজার ধর্ম প্রাণ দায়ক-দায়িকা এগত্তর অই এক সমারে পৈণাল গরি দিঘীনালা থানা বাজার, শান্তিপুর, মিলনপুর, বরদাচমণি ব্রিজ, লারমা স্কোয়ার, গুরি তপোবন বিহারত থুম অনার লগে লগে বুদ্ধপুজ’ বুদ্ধমূর্তি,সংঘদান,অষ্টপরিস্কার দান পিন্ডুদানসমুত্তু নানাঙ দান  শেজে ধর্ম খলা বজে। এ ধর্ম খলাত পুজ্জো ভিক্ষুনে এ কধান কোইয়ুন। তারা মন ভাঙি ফেলে কোইয়োন, আমি আহত্যার ধরিনেই যুদ্ধ গরি ন’ পারিবং। কিত্তেই আমার ইংসে, পিজুম বেচ ভারি যিয়ে। ম্যান্ডেলা কধা টানিনেই কোইয়োন, ম্যান্ডেলা মৈত্রীলোই দেচ স্বাধীন গচ্ছে তা সান আমায়্য স্বাধীন পাদে আমার আমর মৈত্রী লাগিবো। সিত্তেই ভেইয়ে ভেইয়ে হেনা হেনি, রুঘরুক্যা গরি ন’ থেই মৈত্রীলোই এক জধা অই যুদ্ধ গরিবার রাজনীনি চেলাউনর উদিজে এ কধা কোয়োন।

এ ধর্মখলাবোত ৩নং কবাখালী মৈত্রী বিহারের অধ্যক্ষ ভদন্ত বিশুদ্ধানন্দ মহাস্থবীর খলানানু আ নকবাচ্যা গরবা ইজেবে কধা কেইয়ে, উপজেলা পরিষদ চেয়ারম্যান নব কমল চাকমা।

ধর্মখলাবোত মুলুক গরবা ইজেবে কধা কোয়োন, উপজেলা পরিষদ নারী ভাইস চেয়ারম্যান গোপাদেবী চাকমা এবং সুসময়ত চাকমা। তারা বাদে আর’ মুলুক গরবা ইজেবে কধা কোয়োন, ২নং বোয়ালখালী ইউনিয়ন পরিষদ চেয়ারম্যান চয়ন বিকাশ চাকমা, ৪নং দীঘিনালা ইউনিয়ন পরিষদ চেয়ারম্যান প্রজ্ঞান জ্যোতি চাকমা। আ ধর্মদেশনা দুয়োন ভদন্ত চন্দ্রকীর্তি স্থবির,  ভদন্ত মঙ্গল জ্যোতি চাকমা, প্রজ্ঞা জ্যোতি মহাস্থবির, আ  পার্বত্য ভিক্ষু সংঘ বাংলাদেশ দীঘিনালা উপজেলা কমিটির এজাল ফগদাঙি কাবিদ্যাঙ  করুণা বংশ ভিক্ষু দাঘী।

ধর্মখলা থুম অনার লগে লগে যারা যারা মু দেঘেয়্যন সে পূর্ণর্থীউনরে আ দিঘীনালা আহসপাতালত অসুক্কেউনরে খেবার দরপ ভাক গরি দুয়োন।