এচ্যে ৮ জুলাই ২০২১ইং ২৪ আজার ১৪২৮ বাংলা বিসুপবার চাঙমা সাহিত্য আগাজত এক্কো ধকধক্যে বোম্বা, লেঘিয়্যা, কবি আ গবেষক সুনানু আনন্দ মোহন চাঙমার ৬৭ বঝর জনম দিন। এ দিনত ১৯৫৪ সালত মিঙিনি চাগালাত বাঘেইছড়ি দুয়োর নাঙে আদাম সুনানু চিত্রজিত চাঙমা আ সুনানু রঞ্জিতা চাঙমা সুক-দুগর সংসারত জনম অয়।
এ পোইদ্যানে চাঙমা সাহিত্য বাহ্ তপ্পেত্তুন ২০১৭ সালত্তুন ধরি নানান ফাংশান গরি পালে এযের। এ বঝর গোদা পিত্তিমি দংগাপিড়ে করেনাত্যাই এগত্তর অই ন’ পারানার অনলাইনত এগত্তর অই দিন্নো পালা অয়্যা বিলেন চাঙমা সাহিত্য বাহ্ গরা কমিতি জধানানু সুনানু ইনজেব চাঙমা হিল পজ্জনরে জানেয়ে।
চাঙমা সাহিত্য আগাঝত এক্কো ধকধক্যে বোম্বা, লেঘিয়্যা, কবি আ গবেষক সুনানু আনন্দ মোহন চাঙমার ৬৭ বঝর জনম দিন পালানা পোইদ্যানে চাঙমা সাহিত্য বাহ্ তপ্পেত্তুন কবিদ্যা কনা, গান বাজনা আ তেম্মাং খলা জুল গরা অয়্যা।
এ ফাংশানানত সরিত এলাক কাচালং কলেজ’ প্রভাষক আ চাঙমা সাহিত্য বাহ্ সল্লাদার কবি, লেঘিয়্যা সুনানু লালন কান্তি চাঙমাদাঘি। চাঙমা সাহিত্য বাহ্ শিল্পী গোষ্ঠী সাবাঙ্গী, বাংলাদেঝর উদন্দি শিল্পী সুনানু প্রত্যাশা চাঙমা আ সুনানু লিটিনা চাঙমাদাঘি। তারা বানা কণ্ঠ শিল্পী নয়, নানাঙ মানবিক জধা সমারে কাম গরি জানা সমারে অভিনয়ও গরি যান। এচ্যে তারা গলালোই ভরি তুলিলাক ফেসবুক’ আদাম।
সুনানু আনন্দ মোহন চাঙমা জিংকানি লামা পড়ে শুনিয়্যা চাঙমা সাহিত্য বাহ্ লংগদু ধেলা ভান্ডালি কাবিদ্যাং সুনানু বর্ষা চাঙমাদাঘি। সমারে লংগদু ধেলা তপ্পেত্তুন তারা উদিজে রজিয়্যা কবিদ্যাবো মাদে শুনেল।
এ ফাংশানাত সরিত অই কবিদ্যা মাদেল চাঙমা সাহিত্য বাহ্ পাবলিশার্স এ দাঙর কাবিদ্যাঙ সুনানু লব্দ চাঙমা শাক্যদাঘি। আ সুনানু ইনজেব চাঙমা আনন্দ মোহন চাঙমাদাঘি নিনেই লেঘা পড়ে শুনেল। লেঘায়ান লেঘা অয়্যা ২০০৩ সালত। লেখ্যে সুনানু রেখী চাঙমা জীবনর দুগর কধা নাঙে।
এ পিত্তিমী নাঙে গ্রহবোত পত্তিক বন্দা নিজর সেদাম অন্য মঙ্গলত্যাই বিলেই দ্যুন। মোমবাত্তি সান নিজে আঙি পহ্’র সিদি দ্যুন চেরোপালা।। এক্কো মানুচ পিত্তিমীত জনম অনার সমারে তা জীংকানিত নানাঙ কাম’ সমারে মিজি থান। এ মানেই কুলত এলে মানুচ দোল দোল কাম গরি সাংসারান দোলত্তুন দোল গরি সাজেবার চান। তারার কাম’ গুনে বাজি থান বিজগর পাদাত। এ সভ্যতাত চাঙমা জাদর অঝাপাত, ভাচ, সাহিত্য, রিদিসুদোম ভালেদি এযানা পোইদ্যানে আমা সমাজর লেঘিয়্যা, কবি, সাহিত্যিক আ সমাচ
ভালেদি কাম্মোউন অবদান আঘে। সেধক্যে এক্কো দাঙর, অজল, কাবিল, চাঙমা সাহিত্য আগাজত এক্কো ধকধক্যে বোম্বা, লেঘিয়্যা, কবি আ গবেষক সুনানু আনন্দ মোহন চাঙমা (আনন্দ ময়) জনম অয় ৮ জুলাই ১৯৫৪ ইংরেজি মিঙিনি চাগালাত বাঘাইছড়ি দুঅর নাঙে এক্কান আদামত। তা বাবা নাঙান চিত্রজিৎ চাঙমা আ মা’বো নাঙান রঞ্জিতা চাঙমা।
আহ্’ভিল্যাচ: চাঙমা সাহিত্য বাহ্ তপ্পেত্তুন আহ্’ভিল্যাচ খা অয় যে, দিঘীনালা কারেন আ নেদর মান গম ন’ থানার ফাংশানান দোল গরি ন পারানার। সেনে তারা বেক পর্বোয়া আ শুনিয়ে লক্কুনত্তুন খেমা চাদন।
