চাঙমা ভাচ্চান এক্কান উজু সুরুঙ ভাচ। যার নেই কন' কুজুরো-কাজারা, কুলুক কালুক, যে ভাঝত নেই মুই তারে চিগোন গুরিম, দাঙর গুরিম। বেক্কুন সঙ, বেক্কুনরে সমান চোগে চেনে কধা কো অয় যিয়ান যদবদে এক্কান দোল সুধোম/খাচ্চেক। যিয়ান ভাচ্চানর এক্কান সাম্যর উপাদান।
গেল্লে ২৮ মে ২০২২ খ্রি. চাঙমা সাহিত্য বাহ্ তপ্পেত্তুন খাগাড়াছড়ি ক্ষুদ্র নৃগোষ্ঠীর সাংস্কৃতিক ইনস্টিটিউট হল রুমত দ্বি’দিন সং চাঙমা লেঘা ট্রেনিঙত পল্যা দিনোত নকবাচ্যা গরবা এল' খাগারাছুরির অতিরিক্ত জেলা প্রশাসক জনাব গোলাম মো. বাতেনদাঘি আঝিল থেই এ কধা কোইয়ে ।
গোলাম মো. বাতেনদাঘি আর’ বাইনি গরি কোইয়ে- বাংলা দেচ্চান যুনি এচ্যা সোনার দেচ অয়দি অয় সালে এ দেঝর নানাঙ জাদর নানাঙ ভাঝর কারণেই ওপাচ্ছি। আমা পার্বত্য চট্টগ্রামত চাঙমা সুমুত্তো আর' যে ভাচ যে সংস্কৃতি আঘে সিয়ানি ছারা বাংলাদেচ তুজিমপুরো ওই ন পারে।
তে আর' কয় বাংলাদেচ্চান জুনি অয় এক্কো সোনার মুকুট সালে আমা ভাচ, আমা সংস্কৃতিআন সে মুকুট্টুর এক্কো দামি রত্ন (মানেক)। ভাচ অলদে এক্কান নিত্য বদোল্লি জিনিস। এচ্যা কেল্যা গুরি এত্তে এত্তেই আধুনিক অয়। ইক্কু যে আমি আধুনিক বাংলা ভাচ দিগির ইয়ানও সেদোক্যা বদ'লদে বদ'লদে, সোর গত্তে গত্তে ইধ্দুরোত এচ্চি। আ ভাচ্চান দোল তুজিমপুরো বানাদে উধোর লোয়ি আরবি, ফারসি ধোক্যা নানাঙ ভাঝর র'।সে লগে বাংলা একাডেমিও বানা অয়। আমার আমা ভাচ্চান দোল, পোতপোত্যা, তুজিমপুরো বানেবাত্যা চেলে যেন অন্য ভাজর র’ উধোর লো পোরিবো সেন আমা ভাচ, আমা ঘাচ্চারা আ ধক অহ্ত রাগেবাত্যা খামাক্কায় আমাত্তুন উঝে থা পোরিবো। নিজো ভাজর ধক,ঘাচ্ছারা, মাজারা খামাক্কায় ধুরি রাঘা পোরিবো যেন আমি অন্য ভাজর সেরে সুমি আমা ভাঝর খাচ মাজারা/চিন (স্বকিয়তা) আন আরে ন ফেলেবার উচ্চান আমারে দি গেল'।
তে আহ্’ভিল্যাচ খেই কল- চাঙমা ভাচ্চান নানাঙ কারণে তা মাজারা আরে ফেলার। মর যে চাঙমা সমাজ্যা তারা বেচভাক কন্নে নাকি চাঙমা ভাচ্চান মা মুওত্তুন সুনি সেনে পারি খালিক লিগি ন পারি। সিয়ান মরে ভজান দুক দে।
শেজে চাঙমা সাহিত্য বাহ্’রে বাইনি গরি কল- চাঙমা সাহিত্য বাহ্ এচ্যা যে কামান গরি যার নিআলচি, নেই তুচ্যা গরি ভাচ্চানরে তিগে রাগেবাত্যা আ চাঙমা লেগা সিগেয়্যা সাত্থুয়াউনোরে ট্রেনিং দেনা সান্যা সেত্তোমান দাঙর এক্কান কাম আহ্’দত লনায় তে চাঙমা সাহিত্য বাহ্’রে পাত্তুরুতুরু।
গেল্লে ২৮ মে ২০২২ খ্রি. ১৪ জ্যৈষ্ঠ ১৪২৯ বাংলা, ২৫৬৬ বুদ্ধাব্দ শনিবার চাঙমা সাহিত্য বাহ্ তপ্পেত্তুন যারা নানাঙ জাগাত চাঙমা লেঘা শেঘান সিত্তুন ৩৫ জন সাত্থুয়াদাঘিরে নিনেই “ভাষা হল মনের দৈন্যতা ও কূপমন্ডুকতা থেকে বেড়িয়ে আসার শক্তিশালী মাধ্যম” এ মুলুক কধাআন মুজুঙে রাঘেই খাগড়াছড়ি ক্ষুদ্র নৃগোষ্ঠীর সাংস্কৃতিক ইনস্টিটিউট এ হলরুমত চাঙমা সাহিত্য বাহ্ তপ্পেত্তুন ২ দিন সং চাঙমা লেঘা সাত্থুয়াদাঘি ট্রেনিঙ খলা জুগল গরা অহ্’য়্যা। ইয়োত খলানানু গিরি গচ্ছে চাঙমা সাহিত্য বাহ্ গরা কমিতি জধানানু সুনানু ইনজেব চাঙমাদাঘি। আ নকবাচ্যা গরবা ইজেবে সরিত অহ্’য়্যা খাগড়াছড়ি অতিরিক্ত জেলা প্রশাসক (শিক্ষা ও আইটিসি), গোলাম মো. বাতেনদাঘি। মুলুক গরবা ইজেবে সরিত অয়ে খাগড়াছড়ি সরকারি মহিলা কলেজর প্রভাষক (ইংলিশ) ও চাঙমা সাহিত্য বাহ্ নীতি নির্ধারণী কমিটির সাবাঙ্গি সুনানু কৃতি চাকমাদাঘি।
কোচপানা কধগি এল চাঙমা সাহিত্য বাহ্ থিদ’ গরিয়্যা আ চাঙমা সাহিত্য বাহ্ নীতি নির্ধারণী কমিতির জধানানু সুনানু দেবপ্রিয় চাঙমাদাঘি আ খলাপচজোনি গিরি গচ্ছে চাঙমা সাহিত্য বাহ্ গরা কমিতি দাঙর কাবিদ্যাং সুনানু প্রজ্ঞা আলো তালুকদারদাঘি।
ট্রেনিঙত বরকল, নান্যাচর, বাঘাইছড়ি, লক্ষীছড়ি, খাগাড়াছড়ি, গুইমারা, মালছড়ি, দিঘীনালা আ পানছড়ি উপজেলাত্তুন সরিত অলাক ভিলে চাঙমা সাহিত্য পত্রিকারে কোইয়ে চাঙমা সাহিত্য বাহ্ গরা কমিতি ভান্ডালি কাবিদ্যাঙ সুনানু রিমি চাঙমাদাঘি।
