এচ্যে ১৭ ডিসেম্বর ২০১৯ খ্রি. মঙ্গলবার বেন্যা মাধান ১০ টা চাঙমা সাহিত্য বাহ্ পানছড়ি ধেলা আঞ্জামে চেঙ্গী সারিবালা স্মৃতি মহাবিদ্যালয় ধনর আ মনর এজালে পানছড়ি চাগালা বেক চাঙমা লেঘা সেন্টারর সার্টিফিকেট আনি দিয়্যা অইয়ে।
খলা পজ্জোনী চাঙমা সাহিত্য বাহ্ পানছড়ি ধেলা এজাল দাঙর জধানানু সুনানু পিংকি চাঙমা, চেঙ্গী সারিবালা স্মৃতি মহাবিদ্যালয় অধ্যক্ষ কিরণ চাঙমা খলানায়ে কবিদ্যা কনা আরগানি গরা অহ্’য়। ২৫ জন কবি আওজি মনে কবিদ্যা কলাক। কবিদ্যা কনা থুম অনার সমারে সামরে সার্টিফিকেট দেনা সভা আরগানি গরা অহ্’য়।
ইরুক বিচ্চায়ন ইন্টারনেদও যুগত পিত্তিমিত্তুন বহুত ভাচ আ ওক্কোর লুগি জাদন্নোই। আমার চাঙমা লেঘা আ ভাচ্চানয়্য চচ্চা ন’ থানার লুগি যেবার অক্ত। ১৮ বঝর আগে ২০০০ সালত পল্যা জানুয়ারীত এক ঝাক ভার্সিটি, মেডিকেল আ ইঞ্জিনিয়ারিঙত পোর্বায়া লগে মিলিনে চাঙমা সাহিত্যর পহ্’র ছদক চাঙমাউন ইদু আ পিত্তিমি ইদু ছিদিনে চাঙমা সাহিত্যরে বিচ্চসাহিত্য ইজেবে থিদব্বরী গরিবার অতালিয়ে ধারচ লোইনে “চাঙমা সাহিত্য বাহ্” নাঙে এ Linguistic জধাবো বানা অইয়ে। আমার আর’ লক্য আ উদ্দিচ্য অলদে, চাঙমা একাডেমি থিদব্বর গরানা, চাঙমা সাহিত্যিকউনরে মান গজানা, অজল অজল গবেসনা গরানা। ইয়ানি এক্কান রুটিনর কাম ইজেবে আমি ২০০৪ সালত্তুন ধরি এয’ সং চাঙমা লেঘা শিঘানা কোর্স চালে যের। ২০১৯ খ্রি. সং আমি ৭৬৮৩ জনরে চাঙমা লেঘা শেঘা অইয়ে ভিলে চাঙমা সাহিত্য বাহ্ জধানানু সুনানু ইনজেব চাঙমা কোইয়ে।
এ মিলনি খলাবো সরিত অইয়ে কধগীউনে কলাক
“এচ্যে যারা হিল চাদিগাঙর বারে আঘন তারা হিলচাদিগাঙত্তুন দুরত থাগত্তে থাগত্তে মানুচ্ছুন কধ’ গেলে জাদর ভাচ, ওক্কোর আ সাহিত্যিত্তুনয়্য ফারক অই যাদন্দোই। অক্তে অক্তে বহুজনরে দেঘা যায়দে, নিজ’ মা ভাচ চাঙমা ভাচ্ছানয়্য পরি ফেলাদন। আরেককিত্তেন্দি, মিজোরাম সি.এ.ডি.সি- এ বাংলা ওক্কোর তুলি দিয়্যা, অরুনাচলর চাঙমাউনে বাংলা ওক্কোর মাদেই ন’ জানন আ তিবিরে চাঙমাউনেয়্য বাংলা ওক্কোর তুলি দেদন। তারা বানা চাঙমা ওক্কোর, চাঙমা লেঘা জানন, লেঘন আন্তজার্তিক ভাচ ইজেবে ইংজেজিয়্য জানন। ইক্যে আমি চাঙমা অইনে চাঙমা লেঘা ন’ পাল্লে লারে গরি আমা জাদর দাঙর কত্তা মিজোরাম, অরুনাচল আ তিবিরে চাঙমাউন্দোই ফারক অই যেবংগোই। সং সং চাঙমা অইনে আমি কার’ কধা ন’ বুঝিবং। যিক্যে গরি মিয়ানমার’ চাঙমাউন্দোই কধা কোই কি গল্লে বুঝা বুঝি ন’ অই। কারন আমি এব’ বাংলা ওক্কোরলোই লুদুপুদ আঘি। চাঙমা ওক্কোর, চাঙমা লেঘা ন’ পাচ্যগরি আমা পুয়ো/ঝিউনে কেনে জাদর দাঙর কত্তা অরুনাচল, মিজোরম, তিবিরে, বিহার, কক্সবাজার আ আরাকানর চাঙমাউন্দোই কুদুম্ব রাঘেবাক? এধক্যে গরি আমি তারাল্লোই লারে লারে গরি চাঙমা লেঘা শেঘানা অলিবর কারনে আমি ফারক অই যেবংগোই”
কধগীউনে আর’ কলাক-
“আর এক্কান দাঙর কধা অলদে ইক্যে বাংলা সরকাচ্যা এ বঝর আমারে ক্লাশ টুত সং মা ভাঝর বই দিল। ইআন এ্যানে এ্যানে ন’ পেই। কধক চোগ’ পানি, লো ধালানার পর বাংলা দেঝর স্বাধীনতা ৪৬ বঝর পর আ পার্বত্য চুক্তি ১৮ বঝর পরম ভাঝর বই পেলং। দুগর কধা অলদে আমি সে বইয়্যন পড়ে ন’ পারির। মাত্তর আমি “চাঙমা সাহিত্য বাহ্’র কাম্মোউনে সিআনি অবার দিদং ন’ চেই।”
কধাআন এ সভাবোত সরিত অইয়ে মুলুক মুলুক গরবাউনে সল্লা পরামর্শ দিলাক।
সভাবো নকবাচ্যা গরবা ইজেবে এল’ পানছড়ি উপজেলা প্যানেল চেয়ারম্যান সুনানু চন্দ্র দেব চাঙমা, মুলুক গরবা ইজেবে এলাক- ২নং চেঙ্গী ইউনিয়ন পরিধর চেয়ারম্যান সুনানু কালাচাঁদ চাঙমা, চেঙ্গী সারিবালা কলেজর প্রভাষক সুনানু ইতি চাঙমা, চাঙমা সাহিত্য বাহ্ গরাকমিতি দপ্তর তথ্য আ গবেষণা কাবিদ্যাঙ সুনানু স্মরণিকা চাঙমা, চাঙমা সাহিত্য বাহ্ সল্লাদার, কবি-নাট্যকার সুনানু সবিতা চাঙমা বাংলা দেঝর সরকারত্তুন দাঙর মান পিয়্যা সুনানু সুজন চাঙমা, পজগাঙ হাই ইক্কুল সাত্থুয়া ইন্দ্র লাল চাঙমা, সংবাদিক, কবি সুনানু নূতন ধন চাঙমা, রুপসী চাঙমা রুপা, পরেশ চাঙমা, লব্দ চাঙমা সুমুত্ত পানছড়ি ধেলা সাবাঙ্গী দাঘি।
শেজে ১২৭ জন চাঙমা লেঘা পর্বোয়াউনরে সার্টিফিকেট দিয়্য অহ্’য়।
