Hillor pojjan(হিলর্ পজ্জন)

 যক্যে, হিলত এ্যাইল তারুম ঝার এল’, এল’ ঝল্লপল্ল পানি গাঙত সক্যে, কিজেক কারি সুয়োল গরি। যক্যে, হিল চাদিগাঙ অহ্’ল’ দাঙদাঙ্যা, তাককুল, গাঙ পানি গেল’ শুগেই সক্যে, আমি অহ্’লর! ইয়ান কি আমার ফাজা? নেই সুয়োল, উগুদো আমনে আমনে রেনা-রেনি। ধর্ম, রিদিসুধোম, আল্যাক, রাজনীদি নিনেই থানা থানি। ইয়ান কি আমার মুজুঙে আক্কোই যানা? ত্যুঅ, ইয়ানি দিঘিও মুই এয’ বুক বানং - কাপ্তে গদা আমার বানা অভিশাপ নয়, আর্শীবাদ। কাপ্তে গদা পানি তুবোলে গোদা পিত্তিমিত ছিদি পরিলং বোজেক্যা শিমে তুল’ বোইয়েরে উরানা সান। আজার সহস্র সবন বুগত বানি পোত্যা ঘুমত্তুন উদং আজি আজি পুগ’ মোন’ মাধাত রাঙা বেলান দিঘিম রাঙা দোকদোক্যা গরি। দিন্নো যে যেই কাম গরি বেল্যা, সাচ লামি সাজন্যা অলে ঘরত ফিরি, বেক্কুন আমি জুম্ম জাদি।

  দেম কুল ঘরত লুমিল’ ফোবে ফোবে। তা মক্কো পুজোর গরের আ কি অহ্’য়ে পরান্নো বাপ্পে? : ও ও পরান্নো মাবো ন’ কোচ ন’ কোচ। এক্করে কাররে ন’ কোচ। ত’ চেইনান দে। বন্ধক দিনেই এক্কান ফোন কিনি আনংগোই। এচ্যে বুঝ ম’ মুজুঙে ধেঙা বাবে এক লাক তেঙা পিয়ে। মোবাইলত জুয়া খারা খেলেনেই। মারলে পায় মারলে পায়। তারা-তাঙুরি পরান্নো মাবো কল- :ম’ মুজুঙে এক্করে জুয়’ কধা ন’ কবে। তুজিমরে দেঘচ জুয় খারা খেলাদে খেলাদে তা বাবর দুম থিয়্যা ভূই খেই পুরেল। আর’ এক্কা গরি চেইন ইয়ান মাগত্তে? তরে ছারিম ত্যুঅ চেইনান ন’ দিম বুঝচ (আঙুল্লো নাক্কোত বাজেই আনি কল)। : বাঃ বাঃ বাঃ! তুই কম ঘিলে জবর নয়। বাঘ মাধাত উগুন চাচ। আনধাজে কিচ্ছু ন’ বুজ্জে গরি ভেনভেনত্যা। মুই কি মত্তেই কঙর। তরে সিত্তুন বেচ আর’ দাঙর এক্কান চেইন বানে দি পারিম। ধেঙা বাবরে চাগোই তা মক্কোরে কম্ভা এক্কা চেইন বানে দিবার কর। : মর ন’ লাগিব’ আর। ইয়ান আঘে যদবদে মর। ইত্তুন বেচ ন’ চাং আর। জুর গরি দুক - কাম দোলে গর। সে পর’ তেঙা চোক ন’ পাদেচ। ইক্কে মানুচ্চোন বিশ্চেস নেই আর সে উরবোতাতে খেলা! দেম কুল আর কিচ্ছু ন’ কোই মনে মনে ভাবে কেনে ফোন এক্কান লো যায়। ছাগল আঘন এক জোরা। সিউন রাঘেয়্য...