চাদি: সিঝি বেন্যা মাধান আ ঝু ঝু।
ইনজেব: তমারেও সিঝি বেন্যা মাধান আ অতালিয়ে কোচপানা।
চাদি: কেঝান আঘচ দা?
ইনজেব: গাউলি গম আঘং।
চাদি: চাঙমা সাহিত্য, ভাচ আ ওক্কোর নিনেই যে কাম গরর কেঝানচলের?
ইনজেব: খুপ গম চলের। কিত্তে? ইরুক পিড়িউন ঘুমত্তুন জাগিলাক। তারা আজার দুগর সেরে সেরে নিজ’ গধেল কিঝু অপুরন থানার পরও জাদত্যাই লেঙে লেঙে, ফোবে ফোবে কাম গরি যাদন।
চাদি: চাঙমা লেঘা শিঘানা চিদেয়ান কেনে সমেল?
ইনজেব: আচ্ছা, দোল এক্কান পুজোর। এ কধা কদ’ যেলে পল্যা পিচ্ছে ফিরি চেই পেবং। সে ১৮৬০ সালত ব্রিটিঝে পার্বত্য চট্টগ্রামান দঙল গরানা পর চন্দ্রঘোনা বোর্ডিং ইক্কুল নাঙে এক্কান ইক্কুল চালু গরা অয়। সিয়োত বাংলা, ইংরেজি সমারে চাঙমা আ মারমা ভাচ শেঘেবার এক্কান জু দিয়্যা অয়। মাত্তর! আমা চেলাউন সিয়ান গজি ন’ লন। সে পরে ১৯৩৭/৩৮ সালত মিলান সাপ্যা রাঙামাত্যা মা ভাচ্ছোই লেঘা শিঘেবার চেল’। সিয়োত সক্কে চেলা সুনানু কামিনী মোহন দেবানে ন’ চানার আ ১৯৫৯ সালত পাকিস্তান আমলত সুনানু নোয়ারাম চাঙমা “চাঙমার পত্থম শিক্ষা” বইবো প্রাইমারি ইক্কুলত দিঙিরি পেলেও দেবানদাঘি ন’ চানার, মা-ভাচ্ছোই লেঘা শিঘিবার ন’ চানার আর শেঘা ন’ অয়।
এ গেল’ ব্রিটিশ আমল আ পাকিস্তান আমল। এ পর এল’ বাংলাদেশ আমল। দাঙর আহ্ভিল্যাঝর কধা, যে দেচ মা-ভাঝর পোইদ্যানে লাড়েই গরি এক্কান দেচ, বাবদা পেল সেই দেঝর অন্য ভাঝর বাজার কন’ খবর নেই। লাম্বা এক্কো অক্ত লাড়েই গরি পেলং পার্বত্য চুক্তি। সে পার্বত্য চুক্তিত লেঘা থেলেয়্যা গণপ্রজাতন্ত্রী বাংলাদেশ সরকারে মা-ভাঝে লেঘা শেঘেবার কন’ গরচ মনে ন’ গরে। পাবর্ত্য চুক্তি এক যুক পর মহান জাতীয় সংসদত ২০১০ সালত জাতীয় শিক্ষানীতি ঘোষণা গচ্ছে। সিয়োত দেঝর যা আদিবাসী আঘন যা যা মা ভাচ্ছোই লেঘা শেঘেবার কধা এল’ আ কো কোইয়ে- ২০১৪ সালত্তুন ধুরি পল্যাদি বাংলাদেঝর ছ’য়ান আদিবাসী ভাচ্ছোই লেঘা শিঘিবার। মাত্তর! ২০১৪ সাল এনেই দেঘা গেল বাজেট নেই। ইয়ানি ম’ কধা নয়। নানান কিথ্যাত্তুন তথ্য ম’ আহ্’দত আঘে। সেনে কামান চালে ন’ পাত্তন। এ অক্তত কয়েক্কো এনজিও মুজুঙে আক্কোই এলে সংশ্লিষ্ট লেঘিয়্যাউনরে ঢাকাত নিনেই বই বানা ধরল। সক্যেও কো অয়ে ১৫ সালত্তন ধরি বই আহ্’দত তুলি দিব’। সে ১৫ সালতও কন’ বই দেঘা নেই। আর কো কয় ১৬ সাল কধা। সক্কেও দেঘা নেই বই।
ইন্দি বাংলা ভাচ্ছান মরা মচ্যে গরি ভুগে দের। দিন দিন আমাহ্ ভাচ্ছান চাংলা আ চাংলিশ অই যার। আমি দ’ সরকার আঝায় বোই থেলে ন’ অভ’। ইয়ান আমার কাম। আমাত্তুন গরা পরিব’। এধক্যে এক্কান ভাপ উদি ২০১৪ সালত্তুন ধুরি এঘামার গরি এ চাঙমা লেঘা শেঘানা কামান গরি যের। যুনি মুই ২০০৪ সালত্তুন ধুরি চাঙমা লেঘা শেঘে থাং।
চাদি: চাঙমা লেঘা ছিদি দেনা কামান গত্তে কেঝান এজাল পা যিয়্যা?
ইনজেব: এজাল ন’ পেলে এত্তমান কাম আমাহ্ পক্কে গরানা সম্ভব নয়। চাঙমা লেঘা শেঘানা কামান ২০০৪ সালত্তুন ধুরি আরগানি অলেও মূলত ২০১৫ সালত্তুন ধুরি এঘামার গরি গরা অয়ে। সক্কে দিঘীনালা উপজেলা ভাইস চেয়ারম্যান সুনানু সুসময় চাঙমা ১৫০০ তেঙা এজালে ফ্রি চাঙমা লেঘা কোর্স ফাংফগদাঙ গরা অয়। চাঙমা লেঘা শিঘিবার উচ্চোপুক তুলি দিবাত্তে ফ্রি চাঙমা লেঘা ২০১৫-২০১৬ সাল সং দ্বি’বঝর গরা অয়ে। ২০১৭ সালত সুনানু শ্রেয়সী চাঙমা এজালে বাবুছড়া ফ্রেন্ডশীপ ইক্কুলত কোর্স গরানা পর আর’ বেচ চাঙমা লেঘা শেঘানা কামান ভারি যিয়ে। ২০১৮ সালত খাগাড়াছড়ি জেলা পরিষদর সাবাঙ্গি সুনানু শতরুপা চাঙমাদাঘি ১০ হাজার তেঙা এজাল দিলে ৩৩জন চাঙমা লেঘা পর্বোয়াদাঘিরে টিওটি ট্রেনিং দেনার পর ঢাকা, রাঙামাত্যা, বান্দরবানসুমুত্ত নানান জাগাত চাঙমা লেঘা এয সং শেঘে যের। সে পরে জেএসএস (লারমা) একলাক তেঙা এজাল দিলে আমি দিঘীনালাত অফিস গরি পারির। ২০১৮ সালত ২০ হাজার চাঙমা লেঘা বই ছাবে মাগানা ভাক গরিদিবার উদ্যোগ ললে ইয়োত বহুত মানুঝর এজাল পা যিয়ে। এধক্যে গরি নানান জনর এজালে আমি এয’ মুজুঙে আহ্’দি যের।
চাদি: আমি দেঘিলং বিশেষ গরি তর অবদানে, তর নিআলচি কামর বলে এচ্যে এক ঝাঁক কাম্মো চাঙমা সাহিত্য বাহ্’বো পিত্তিমি বুগত ছিদি পচ্যে। মাত্তর! এধক খাদুনির পর যে বাহ্ শূন্যত্তুন জাগা জুরি দিলা কধ’ গেলে সহ¯্রকোটি গরিনেই কিত্তে পদত্যাগ গরিলা?
ইনজেব: আমি চাঙমা সাহিত্য বাহ্’ত্তুন পদত্যাগ ন’ গরি, গচ্ছেই দেবপ্রিয় সাহিত্য বাহ্’ত্তুন। ইয়োত বানা আমি নয়, যারা দেবপ্রিয় সাহিত্য বাহ্’ ভিলিনেই বুঝি পাচ্ছোন তারা পদত্যাগ গচ্ছোন প্রায় ১০০ উগুরে সাবাঙ্গি কাম্মো। ২০২০ সালতও শ্রেয়সী, প্রিয়সী, সম্ভুমিত্র, এলিয়েন্স, বিকেন সুমুত্ত ২০/২৫ জনর এক্কো তম্ভা চাঙমা সাহিত্য বাহ্’ত্তুন আহ্’ত ইরি যেলাক।
বেগে ভাবন চাঙমা সাহিত্য বাহ্ আমাহ্ চাঙমা জাদর এক্কো জধা। মুই ভাবিদুঙ চাঙমা সাহিত্য বাহ্ মানে বেক চাঙমাউনর এক্কো সাহিত্য বাহ্’। সেনে মুই এধক্যে গরি কোচপিয়োং রাধামনে সাপ’ কুদুন খেব’ খবর পেনেও ধনপুদিরে নাকশা ফুল্লো পারি দিয়্যা। এ যে লাঙ, কোচপানা থিক সেধক্যে গরি মুই চাঙমা সাহিত্য বাহ্ লাঙত পচ্ছোং। সেনে মর নিজ’ ঘর সংসার কক্কে উবোত ভচ যিয়ে থাহ্’র গরি ন’ পারং। মর’ সবন আ আঝা এল’ এ চাঙমা সাহিত্য বাহ্’বোত্তুন ঝাক ঝাক কবি, লেঘিয়্যা, শিল্পী নিঘিলি এবাক। সেনে মর দিন রেত সময় দি যেলুং। ঘরত অসুক, ইন্দি চাঙমা সাহিত্য বাহ্ দ্বিদশক পূর্তি ত্যুঅ নিজ’ মোক্কো অসুগত সময় ন’ দিনেই বাহ্’বোত সময় দি যাঙর। ভাবিদুং মর’ বানা দ্বিবে পুঅ, এ বাহ্’বোত শত শত পুঅ। তারা চেদন জাগি তুলি পারিলে আমার অনতন ন’ থেব’। রাহ্’ত ন’ থেব কন’। মাত্তর, যেদক দিন, মাচ, বঝর পর বঝর যার বুঝি পারিলুং ইবে দেবপ্রিয় সাহিত্য বাহ্, চাঙমা সাহিত্য বাহ্ নয়। কিত্তে? তার কধালোই বেক্কানি চলে, তারে কন’ জনে কিঝু পুজোর গরিলে তারে খারাপ ভাবে। তা পিচ্ছেদি মানুচ লাগেই দ্যা। এধক্যে গরি কন’ জধা মুজুঙে আক্কোই ন’ যায়, যেই ন’ পারে আ কন’ জাতয়্য মুঝুঙে আক্কোই যেই ন’ পারে। কমিতি মেয়াদ শেচ ন’ অদে তা মনে মতন ন’ অলে আর কমিতি বানায় আ কন’ কমিতিলোই তেম্মাং নেই, সল্লা নেই গরি। গঠনতন্ত্র ন’ মানি তে কাররে কোচপেলে, গম লাগি নীতি নিধারর্ণী কমিতি আনে। তেহ্, তা ধক্যে তে কাম গরেনাত্যাই আমি দেবপ্রিয় সাহিত্য বাহ্’ত্তুন পদত্যাগ গরিলুং, চাঙমা সাহিত্য বাহ্’ত্তুন নয়। আমি এজ’ কাম গরি যের। সিয়ান বাদেয়্য তুমি যিবে চাঙমা সাহিত্য বাহ্ মনে গরর ইবে এক্কো বিশেষ আঞ্চলিক দল’ আঞ্জামে যিয়ে। আমি মনে গরি ইরুক হিলর দিন মাধানে কয় কন’ আঞ্চলিক দলরে কোচ পেলেও কোচপানা দেঘে পারা ন’ যায়। দেঘেলে সক্যে আমাহ্ লক্ষ্য-উদ্দেশ্য সফল ন’ অভ।
চাদি: চাঙমা সাহিত্য বাহ্ আ দেবপ্রিয় সাহিত্য বাহ্ কধান ভাঙি কবে?
ইনজেব: চাঙমা নাঙান গোদা চাঙমা জাত্তোরে প্রতিনিধিত্ব গরে আ দেবপ্রিয় বানা এক্কো বন্দা। মুই ভাগ্যবান যে, যে জাদে এক অক্তত সাগুচ্যা দেচ জয় গচ্ছে, যে জাদে এক অক্তত রাজা এল’ যে জাদত্তুন গৌতম বুদ্ধ আ এম.এন লারমা সান দাঙর দাঙর মানুচ জনম অন সে জাদর মুইও এক্কো সাবাঙ্গি। মাত্তর! আহ্’ভিল্যাচ থায়, আমি যেম্বা শিক্ষিত অই না কেন আমাহ্ মনানি ভারি চিগোন। এ চিগোন মন্নোই মুঝুঙে আক্কোই যে ন’ পারে। বিশ্চেচ রাঘা পরে, কোচপানা রাঘা পরে। সে জিনিচ্ছান দেবপ্রিয় চাঙমদাঘির নেই। যুনিও তে এক্কো লেখক। লেখকর ধর্ম সিয়ান নয়। কিত্তে চাঙমা সাহিত্য বাহ্ এক্কান চিদে এল’ লাম্বা এক্কান অক্তত নমিজিল্যা(সামন্ত) সমাচ্ছোই লুদু পুদু গরি এলং। কবি সুনানু আলোময় চাঙমা লেঘা, সুনানু কে.ভি দেবাশীষ চাঙমা লেঘা ছাবা ন’ যেব’। আ লেঘিয়্যা সুনানু আর্য্যমিত্র চাঙমাদাঘিরে কন ফাংশানত ফাং গরা ন’ যেব’। ইয়ানি চাঙমা সাহিত্য বাহ্’বোরে ন’ মানায়। এ ন’ মিজিল্যা খাজ্যাক্কোত্তুন নিঘিলি আনানা আমার ধর্ম। মাত্তর, সুনানু দেবপ্রিয় চাঙমাদাঘি সিয়ান গরন। সিয়ান বাদেও চাঙমা সাহিত্য বাহ্ বানা আমি কাম গরি ভিলে আমার নয়, ইবে বেক চাঙমাউনর এক্কো বাহ্’। আ সে বিপরিত দেবপ্রিয় সাহিত্য বাহ্’। মুই বিশ্চেচ আ অমহদ’ গরি কোচপেদুং সুনানু দেবপ্রিয় চাঙমাদাঘিরে। ম’ সাঙু বইবো তারে উৎসর্গ গরিলুং। মনে গত্তুং তেও পারিব’ জাদত্যাই কিঝু গরি। মাত্তর! যদ’ দিন, মাস, বঝর পর বঝর ভিদি যার সেধক ম’ মনত তার এধক্যে কারবারলোই মর চিদমুরুত্তুন বিশ্চেচ উদি যেল’। ইয়ান সত্য দেবপ্রিয় চাঙমা এ বাহ্’বোত যক্কে আহ্’ত ন’ দ্যা সক্কে আমি দোলে কাম গরি যিয়েই। সে কামত তেজে তার চোগত যক্কে উদিল’ সক্যে নানান সল্লা-পরামর্শ দি যার আর আমাহ্ জধা ভাঙি যা ধরল’।
চাদি: কে.ভি. দেবাশীষ চাঙমা চাঙমা সাহিত্য বাহ্ গরা কমিতি জধানানু এল?
ইনজেব: এল’। মুই যক্যে ফ্রি চাঙমা লেঘা কোর্স দিঘীনালা বোয়ালখালী ইউনিয়ন পরিষদত ফাং গরঙর সক্যে তে সে ফাংশানত যিয়ে। মুই তারে সক্যে ন’ চিনং যুনিও তার বই পড়ি থাং। সিয়োত চিনপচ্যা অহ্ল’। সিত্তুন ধুরি এক্কো রেগা অল’। সে রেগা নালে ২০১৮ সাল তারে জধানানু বানে আ মুই দাঙর কাবিদ্যাঙ ইজেবে কাম চালে নেযা অয়ে। মাত্তর, দেবপ্রিয় চাঙমা একবুচ্ছে সিদ্ধান্তত্যাই মেয়াদ থুম ন’ অদে আর’ কমিতি বানা অয়ে। আহ্’ভিল্যাঝর কধা সুনানু দেবাশীষ দাও খবর ন’ পায় কমলে কমিতি অহ্ল। ফেসবুকত দেঘিনেই এক্কান কমেন্ট গচ্ছে কে.ভি দা- কমলে কমলে মেয়াত থুম অল খবর ন’ পাং, বঝরউন এক্কি বাদি? সিয়োত দেবপ্রিয় দা চাঙমা সাহিত্য বাহ্ পেজত্তুন কমেন্ট গচ্ছে।
ত্রৈমাসিক চাঙমা সাহিত্য পত্রিকা “চাদি” পল্যা পয়ধে পল্যা বঝর [ধারাদিঘীলি চলিব]
