যারা জাত্তুরে কোচপান তারা চাঙমা লেঘা শিঘন। জাদর ভাচ, জাদর লেঘা শিঘানা সাতকাম মনে গরন।

এক্কান কধা আঘে, “ত্রিশ তিন জাদর ভাচ শিঘানা এক্কান দাঙর গুণ মাত্তর, বেগ আঘে মা ভাচ, আমনর অঝাপাত শিঘিনা সাত কাম।”
এচ্যে ০৮ সেপ্টেম্বর ২০১৭ইং বেন্নে মাধান কোচপিয়ে দাঙগু বিগেন চেগেলোই বাবুছড়া ফ্রেন্ডশিপ ইশকুলত চাঙমা লেঘা শিক্কা কোর্স চা যিয়েই। যাদে এক্কান অটোরিক্সা গরি গেলে সে ড্রাইভার ছিজিমণি চাঙমা আমাত্তুন ভাড়া ন নেযায়। তা কধা, “আ তুমি চাঙমা লেঘা শেঘেপার আমি তোমারে মাগানা গাড়িত তুলি ন পারি?” তেহ্, আমাত্তুন ভাড়া ন লয়। তার জাদর থান, জাদর কোচপানআন আমারে আর বুগত বল বারেহ্ দিল। তারে পাত্তুরুতুরু আ ঝু ঝু গোজাঙর।
ইক্যে কধা কত্তে, নানাঙ দিন-মাধান গঙানা পর আমা চাঙমাউনর চোক্কু ফুদন। ঝাঁক ঝাঁক পর্বোয়া চাঙমমা সাহিত্য বা ডাগত সমত দিন্যাই চাঙমা লেঘা শেঘানা কামত নিজরে উৎসরাদন।  গেলে ২৩, ২৪ আ ২৫ জুলাই ২০১৭ইং ভজমান শতরুপা চাঙমা(সদস্য, খাগড়াছড়ি জেলা পরিষদ) ধনর এজালে দিঘীনালাত তিন দিন ট্রেনিং থুম গরানা পর নানাঙ জাগাত চাঙমা লেঘা শেঘা অর।
এচ্যে বাবুছড়া ফ্রেন্ডশিপ ইশকুলত যেনেই দিঘিলঙ দাঙগুবী শ্রেয়সী চাঙমা নিআলঝী গরি হাদত ধরি ধরি চাঙমা লেঘা শেঘার। ইয়ত বানা তে নয়; তা সমারে দাঙগু রিকন চাঙমালোই বলাবল্যা গরি তারা চাঙমা লেঘা শেঘান এই সেন্টাবুত। ঘরত সাতকাম থানার দাঙগু রিকন চাঙমা ক্লাশ গরি ন পারের ভিলি শ্রেয়সী চাঙমা কল।
এধক্যে গরি বাবুছড়া কলেজ, সাজেক, খাগড়াছড়ি আ মাটিরাঙ্গাত চাঙমা সাহিত্য বা আ সাঙু পাঠাগারে চাঙমা লেঘা কোর্স চালের যার।
অক কধা অলদে যারা জাত্তুরে কোচপান তারা চাঙমা লেঘা শিঘন। জাদর ভাচ, জাদর লেঘা শিঘানা সাতকাম মনে গরন।

মাটিরাঙ্গা ভান্তে এজ গোর গোর আঘে

গেল্রে ইল্যে ৩ টা - ৩:৩০ টা অক্তত খাগাড়াছড়ি মাটিরাঙ্গা অজথ্যা আগারে ইক্যে নাঙ বজ্যে পূর্ব খেদাছড়া।  পূর্বখেদাছড়া আদর্শ বৌদ্ধ বিহারর অধক্ষ্য বিনয়রক্ষী ভান্তেরে গাড়িত্তুন লামেই মারিমুরাই মুজ্জো নেযেই ফেলে যিয়োনে বাঙাল সন্ত্রাসীয়ে।
চিনপচ্যা দিবার ন চায় ইক্কু পূর্বখেদাছড়া আদর্শ বৌদ্ধ বিহারর দায়ক এ কধায়ান কল। তে আর কল, ২৫ আগস্ট ২০১৭ মিয়ানমাররত রোয়িঙ্গা ঘদনা পোইদ্যানে মাটিরাঙ্গাত বেচ কয়েকে দিন ধুরি বাঙালুনে কোই কি গত্তে শুনা যিয়ে কুরবান পরে বেক বুদ্ধউনরে বচ্ নেযেবঙ।  ইয়ান নিনেই মাটিরাঙ্গা খুউব দরগরেপা এক্কান দিন মাধানর পর গেল্লে ০৬/০৯/১৭ ইং বেল্যা মাধান ৩-৪ ভিদিরে বিনয়রক্ষী ভান্তে মোঃ ইউসুফ নাঙে এক্কান হোন্ডালোই মাটিরাঙ্গা আজম পাড়া বটটগাছ উৎসরানা ফাঙত্তুন কিয়োত ফিরদে অর্ধেক পদত দ্বি’জন বাঙালে গাড়িত্তুন লামান। আক্কন পরে তিনান মোটর সাইকেল্লোই ৯জন বাঙাল পুঅ যেনেই তারে আ মোঃ ইউসুফরে ফারক গরি রাঘেই ভান্তেরে ফুটবল খেলা খেলে মজ্যে গরি ফেলে যিয়োন। মোঃ ইউসুফর ঘর কায় চাঙমা আদাম থানায় মোঃ ইউসুফ ভান্তেরে পূর্বখেদাছড়া দোগানত নিলে সিত্তুন তারে পল্লে মাটিরাঙ্গা হাসপাতালত ভর্তি গচ্ছোন। ভান্তে মাটিরাঙ্গা ভর্তি গরানা লগে লগে বাঙালনেতাউনে চাঙমাউনরে মানা গরন ঘদনান ফেসবুকত ন দিবার।
পরে ভান্তে ধক্কান গোর গোর পেনেই খাগাড়াছড়ি হাসপাতালত পাদা  অয় ভিলি খবর পা যিয়ে। ভান্তে ইক্যে সেধক গম নেই ভিলি খবর পা যার। এয গোর গোর আঘে।
যনিয়ু পার্বত্য নিউজ নাঙে এক্কান অন লাইনর খবরত কোই কোয়ে ভান্তে নাকি ছিনতাই কবলত পচ্যে। ইক্যে কধা কত্তে ভান্তে কি আঘে ছিনতাই গরিবার? হাদত সাব্যাক বাদে কিচ্ছু নেই। ছিনতাই গরিবার কধা হোন্ডাবলাবুরে।
যা ওক! সমগ্র বিবেকবান মানুজর এক্কান দাবী এই সন্ত্রাসীউনরে শাস্তি ওক আ বেগর নিরাপত্তা নিশ্চিত গরানা।

বারবাঙানে ভান্তেউন বাঙালত্তুন মারা খাদন

এচ্যে ০৬/০৯/১৭ ইং বেল্লে মাধান দাঙগু সুমন চাঙমা  ফোনে কল পূর্বখেদাছড়া আদর্শ বৌদ্ধ বিহারর ভজমান বিনারক্ষী ভান্তেরে মাটিরাঙ্গা এক ফাংশানত্তুন  মোঃ ইউসুফ মোটর সাইকেলত গরি তা কিয়োঙ ফিরের। বনানানী পুকুর নাঙে জাগানত লুমিলে তিনান মোটর সাইকেললোই কয়েকজন বাঙালে তারা গাড়িয়ান মুজুঙ আক্কোইনে ভান্তেরে গাড়িত্তুন লামে মারা ধরল্লাক। মোঃ ইউসুফে রঙরঙ গরি চেই থেল। কারি লবার চেলে তারেয়ু মারন। ইক্যে ভান্তেরে মাটিরাঙ্গা হাসপাতালত ভর্তি গচ্চোন ভিলি সিদুগো মুরুব্বী দাঙগু যুদ্ধসিং চাঙমা কোইয়ে। এই লেঘায়ান লেঘানা সং ভান্তেরে এক্সরে রির্পোট ন পান।

খাগড়াছড়ি, মাটিরাঙ্গা, বাঘাইছড়ি আ দিঘীনালা উপজেলা চাঙমা লেঘা কোর্স দপদভা গরি চলদন।

            

দাঙগুবী প্রত্যাশা চাঙমা লেঘা শেঘার।

এচ্যে দাঙগু এলিয়েন্স চাঙমাসমুত্তু উদল বাগান হাই ইশকুল আ শান্তিপরু হাই ইশকুলত চাঙমা লেঘা সার্টিফিকেট কোর্স চা যিয়্যাই। দিঘীনালা স্টেশনত্তুন ৯:৪৫ টা লত দিন্যাই ১০:৪৫টায় উদল বাগান হাই ইশকুলত লুমি গেলং। উদল বাগান হাই ইশকুলত দাঙগুবী প্রত্যাশা চাঙমা আ শান্তিপুর হাই ইশকুলত দাঙগু নভেল চাঙমা নিআলঝি গরি চাঙমা লেঘা শেঘার। ইয়োত তিন জন চাঙমা লেঘা মাষ্টর আঘন, জুঁই চাঙমা, প্রত্যাশা চাঙমা আ জেকি চাঙমা। তারা বলাবল্যে গরি চাঙমা লেঘা শেঘান। নানাঙ অনটনে এচ্যে জুই আ জেকি চাঙমা ক্লাশগরি ন পাত্তন ভিলি প্রত্যাশা চাঙমা কোইয়ে।

               সিত্তুন ভজমান আনন্দময় চাঙমা(চাঙমা ভাষা লেখক, জাতীয় পাঠ্য পুস্তক বোর্ড বাংলাদেশ) তা ঘরত যিয়েই। তাত্তুন জানি পারল্লং, এযেত্তে বজর হামাক্কাই ক্লাশ ওয়ানত যা যা মা ভাজর বই পেবং। আ যুনিও সরকায্যা কোই থায় ক্লাশ ত্রিত সং যা যা মা ভাচেছাই লেঘা পড়া গরিবার সিয়ান ক্লাশ পাইভসং চালু গরিবার সরকায্যা ইদু কজোলী গরিবু কোইয়ে জেনারেল সেক্রেটারীয়ে। ইয়ান হামাক্কাই চাঙমা, মারমা, তিবিরে আদিবাসীউনত্তে দোল ভালেদি খবর।

সাঙু পাঠার আ চাঙমা সাহিত্য বা’ অতালিয়ে হাওজে গেল্লে ২৩, ২৪ আ ২৫ জুলাই ২০১৭ ইং খাগড়াছড়ি জেলা পরিষদর  ভজমান সাবাঙ্গী দাঙগুবী  শতরুপা চাঙমা ধন এজালে তিন দিন সং চাঙমা লেঘা পর্বোয়াউনরে ট্রেনিং দেনা পর নানাঙ জাগাত চাঙমা লেঘা সার্টিফিকেট কোর্স  চালু গরা অয়্যা। খাগড়াছড়ি, মাটিরাঙ্গা, সাজেক বাঘাইছড়ি আ দিঘীনালা উপজেলা চাঙমা লেঘা কোর্স দপদভা গরি চলদন।