র’ নেই

এত্থে এল এক বাম,
তেরোবো জাদর বজত্তি
সুগে-দুগে আলুল্লো দুলুল্লো দেঘি
তাগল ধারান্যা শিলয়্য যান গলি।

পত্তিক মোন-মুড়, পত্তিক ছড়া-গাঙ
সাজি আঘে এ্যাইল তারুম ঝার,
নানাঙ পেইক উবগীদ’ সুরে
চিগোন ছড়া দুধুুক গুজুরনিত
খুজিয়ে দি চোক ভিজি যায়।

পেইকর গীদর, দুধুুক গুজুরনি,
নাঙেল পিদিত গরুচরান্যা বাজি সুর,
বেল ধুবনি সাজন্যা অক্তত
পর্নিমা জুন’ পহ্’র সমার অই
চিঙে র’, খেংগরঙ র’ গুজুরি গুজুরি বেই যায়
এ মুড়ত্তুন অই মুড়ত।

সে র’ নেই ইক্যে! অলর,
গাঝ’ পাদায়্য ন’ লরে!
কি গরিবার আঘে? তারা দরে।
চোক পেলেহ্ পেলেহ্ চেই থানা বাদে।
বানা!
বানা, দুগে অগমানে
চোত মাজ্যা সনখোলা আঙানা সান
আঙি যায়, বানা আঙের
আঝা-সবন ভত্তি গোলা।

ন’ কেমিবং

মুই এয’ সবন দেঘং অনসুর বুনঙ মাগরক’ সান

এক দিন আমি পরাধীনতাত্তুন সরান পেবং, পেবং এরান।

পেইক’ সান উড়ি ঘুড়ি বেড়েবং

চিদ’ সুগে মন’ সুগে-

ফুরোমোনত্তুন আলুটিলে, কেওক্রডঙত্তুন সিম্বুক মোন

চেঙে, মিঙিনি কাজালঙ, বরগাঙ আ ফেনি বাম।

দি আহ্’ধত যা বল আঘে

বুগত যা আঘে মনবল, সিআনলোই

কুত্তিঙ কাত্তিঙ গরিবং লুয়ো শিঙোল।

ছিনিবং পরধীনতা জাল।

এ লারেয়ত পিয়েরে ফুদ’ সান আহ্’দিবং

লাক লাক নুয়ো পিড়ি গাবুচ্যা আ গাভুরি ঝাক,

আনিবং জাদর এরান ছিনি

যেদক বেই যোক লো নালি।

ওক না পচা বাচ, হিল চাদিগাঙ

ওক না শবাশাল;

চিজি দাঘী খাদোক না মরা মাত্তুন দুত

ত্যুঅ ন’ কেমিবং

যেদক্কন ন’ পেবং সাধীনতা।

জাদর কধা ভাবি

ছবিবো তুল্যা: চাঙমা নুয়ো জুম।

ও বাপ-ভেই মা-বোন লক!
কি বুঝর কিঝেনী তুমি?
কুত্তুরি নাত্তিরি, চুপে চুপে কধা,
মিলে কুত্তুরি ফেলেদি গম ভালেদি কধা ভাবি।
দেঘর দ’-
ছড়া-গাঙ কানের,
কানের মোন মুড়
রিঝেং জোরজুরি গীত ন’ শুনার
তারুম ঝার শীক ন’ কারের
বেঙগ’ মা বেঙগবি গেলাক কুধু।

মিলে কুত্তুরিলোই কোল বাজেলাক দেবানে দেবানে
ধুনি পেল্লোন বাইচ মুইজ’ চাঙমা,
পরর কু পাগত পুরি শান্তি বাহিনী ভাক অলাক
আহ্’রেলঙ জুম্ম জাদর পাত্থলি লারমা।
আমি দ’ এক্কো জাত, শাসক জাত
সিত্তেই লেখ্যা সতিশ চন্দ্র ঘোষ- “চাঙমা জাতি”
এ দরমর জাত এধক পিত্তোমরা অল’ কিত্তে?
খবর প’ ভেই লক?
বেক মিলে কুত্তুরি।
কুত্তুরি নাত্তিরি ফেলে দিই বেক মিলে কুত্তুরি
যে যেঙরি পারে কাম গরিবং কারর কুত্তুরি ন’ মাদি
অনসুর জাদর কধা ভাবি।

অবুচ মানেই

ও অবুচ মানেই, বুঝিবে কমলেে?
এধক দুক পর-
ত্যুঅ উচ ন’ বুঝে?
জাগা - জমি আহর’রেলে,
ভূই - সাগিন আহ্’রেলে,
রিদি সুদোম আহ্’রেলে,
আহ্’রেলে ভাচ-অঝাপাত আ
ঘর পাদা জাগা!

দানবর খেলাত
অনসুর তুই মিঝি থাচ
তরে সলং বদলে দিবার সে দানব
নানাঙ বেজে
নানাঙ ছলে
তরে খুজি রাঘেবার চার।
গীদে রেঙে রাঘেই ত’ সবনান
আহ্’রি নিবার চাই।

নানাঙ ভঙচমা কোই কোই
বিজয়গিরি, রাধামন, শেরমত্ত খা আ রুনু দেবান
খুচ মাজারা লগে দিবার চাই।
এম এন লারমা সবন ভাঙি দিবার
আমিজে তার কু-পেজা দেঘাই।
খুজি রাঘেই বার চার।

তুই কি খবর ন’ পাচ?
ত’ থেঙত তলে মাদি নেই?
খামা মাধাত কাজ্যে গাঝ’ সান
তরে রাঘেইয়্য।
এধক দুগর পর-
তুই কি তিনেঙ পালাঙ?
মরিবে না বাজিবে?
যুনি বাজিবার চাচ-
ত’ সবনান সুর অবার ন’ দিচ।
যুনি বাজিবার চাচ-
এম এন লারমা পদে আহ্’দিচ।
যুনি বাজি বার চাচ-
বিজয়গিরি আ রাধামন’ খুচ মাজারা তোগেচ।
যুনি বাজিবার চাচ-
শেরমত্ত খা আ রুনু দেবানর কুচ মাজারা তোগেচ।