চিত্তি- ইনজেব চাঙমা

পত্থম দেঘা ও চিত্তি তুই নিলে মনান কারি,

নোনে সুরে মিধে গলালো শুনেলে কবদ্যাি পড়ি।

ত’ সে বানিয়্যা চা আওচ গরি খেলুং

পেদত নেই এজ’ মুই ইধোত তুলং।

অক্তে অক্তে ফোনে পুজোর গত্তে –

দা...রে, কঝোন আঘ তুমি?

গেল্লে রেদোত সবনে দেঘিলুং আঘচ’ আজি আজি।

তরে দেনেই ছিদে সবনান মর অল তুরুনো

মুই আহ্’দিম ত’ সমারে জনি তুই দিলে জু’ ।

ইমে গচ্ছোং, কঙর তরে-

এজোক ঝর, বোইয়ের, আন্দার ওক পিত্তিমি

ত্যুঅ ত’ সমার অই সাত সাগর তরে ধেবা দিম পারি।

ও চিত্তি, কঙর তরে-

বোজক্যো আগাজর কালা মেঘ’ সান আক্কে দগিন মাধাত, কাক্কে উত্তুরে মাধাত,

কাক্কে পুগ' আগাজত আ কাক্কে পজমি আগাজত;

ঝর মুয়ি রোদ মুয়ি নাধেং পত্তি সান তলে উগুরে সং ভুই, কি মোন মুরত

বোজক্যো শেমেত তুল বোইয়ে উড়ানা সান গোদা সঙসারত ছিদি বেড়ায়

দিন আ রেদোমায়;

মর বুগর অতালিয়ে সবন।

নেই কন’ সাল্যঙে(গন্তব্য স্থান)

নেই কন’ ধুজি (সীমা)

বানা ঘুরি বড়োয়

তরে পেবার আঝায়।

পিত্তিমিত কন’ এক্কান জাগাত, লাগত পইেম তরে

দিআন সবন এক অই তর-মর অতালিয়ে কোচপানালোই জনম অভ’ আওজোর লাড়েই।

তারা তিনজন অভাক বলাবল,

ছিনি আনিবাক জাদর সবন,

চিদ’ সুগে, মন’ সুগে সক্যে তুই মুই লুগবিং।

০৬ ০৫ ২০২০ বৈশাখী পূর্ণিমা

চিত্তিবো চাঙমা - অাক কধা নেই কবিদ্যা

পুগ আগাজ' রাঙা বেলান জক্যে উদিবো নুয়ো গরি আগাজত,
সক্যে পরান তুই মিজিবে আজার সবন বুগত বানি ম' জীবনত।
ম মন' আগাজর আন্ধার কালা মেক লারে লারে জার কাদি,
জক্যে তুই মুজুঙত এই থিয়েলে কোচপানালোই ভুঁদি বানি।
কানে কানে তুই মরে কলে,
চিত্তি শুন, তরে কঙ এক্কান কধা-
জাগা দিবে তারে?
জনি এজে তর জিংকানিত এক নুয়ো গরবা।
তরে কলুং মুই-
জনি চাঙ।
সক্যে মরে ভাঙি কলে,
তর কোচপানা কধাআন।

কুধু গেলে ইরি - চিত্তিবো চাঙমা

নেগে মোগে ঝি-পুঅয়ে দোল গরি দাদো এল’ সুগর বাহ্,

সুগর বাহ্ ভাঙি জেই তর সুগর গরনি তরে জেল ফেলেই।

ঝি আ পুঅবোরে লোই পিত্তিমিত আঘচ পরি

ত্যুঅ দ’ দাদো তত্তুন মনে অদ’ আওজোর বাহ্ জেল সারা পরি।

সারা বাহ্ গায় গায় আঘচ পরি

বার বার ঈধোত গরর পরান’ ঘরনিরে।

চিকচিক্যা পর ভারি এ কধা ভাবি

ম’ আহ্’ত্তান ইরি দিন্যাই কুধু গেলে ইরি?