তিন প্রশ্ন নাঙে সাহিত্য আ সাংবাদিক আনিসুল হকর প্রথম আলোত ইক্খু কলাম
লিক্খে। সিয়োত লেঘা আগে- এক রাজা তিনান পুজোর(প্রশ্ন) উত্তর থোগার।
বেগত্থুন দাঙর সাতকামর(গুরম্নত্বপূর্ণ) অক্ত কি, বেগত্থুন দাঙর
সাতকামর(গুরম্নত্বপূর্ণ) মানুচ্ অন্না আ বেগত্থুন দাঙর
সাতকামর(গুরুত্বপূর্ণ) কাম কি?
রাজা গোদা রেয্যাত ঢুল্ দিল, যে তারে এই তিনান পুজোর মেত ভাঙি দি পারিব তে
তারে গধেল গধেল বুকশিচ্ দিব। রেয্যাত কেইবান্যা কেইবান্যা কদগী,
পুন্ডিক্খুন এলাক্ মাত্তর রাজারে এই কধানর মেত্ ভাঙি দি ন পারন। এক জনর
কধালোই আর একজনর কধা কন মিল নেই। শেজে রাজা খবর পেলদে ইক্কু সাধু কধা। তে
থেদ জারত। তেহ্ হামাক্কাই গিয়েনী। এক দিনে রাজা অন্য ভেদ্ ধরি সাধুবু ইধু
যিয়ে। সাধুবু সক্যে এক্কান পাগারালোই গাত্ কুরের। রাজা তাত্থুন পুজোর গরে
বেগত্থুন দাঙর সাতকাম্যা(গুরুত্বপূর্ণ) অক্ত কি, বেগত্থুন দাঙর
সাতকাম্যা(গুরুত্বপূর্ণ) মানুচ্ অন্না আ বেগত্থুন দাঙর
সাতকাম্যা(গুরুত্বপূর্ণ) কাম কি? সাধুবু কন কধা ন কয়। তা মনে তে গাত কুরের।
রাজা কল, মরে ত’ পাগারান দে, মুই তরে বল দুঙ। সাধুবু জেরার্ আ রাজা কাম
গরের। এ অক্তত ইক্কু মানুচ ফোবে ফোবে তারা কায় এল। বুগত গোবা। রাঙা লো থেব
থেব ঝুরি পরের। রাজা আ সাধুবু দ্বি’জনে তারে চিকিৎস্যে গরলস্নাক। তে কল,
রাজার পুরণ শুত্রু তেহ। রাজারে মারিবাত্যাই যেনেই রাজা সৈন্যউনে খবর পেনেই
তারে মাজ্জোন। রাজালোই তেহ্ আহদ মেলেল। সাধুবু কল, রাজা ত’ তিনান পজোরর
উত্তর দ্যি অয়্যা।
বেগত্থুন দাঙর সাতকামর(গুরুত্বপূর্ণ) অক্ত অলদে: ইক্যে(এখন), বেগত্থুন
দাঙর সাতকামর(গুরুত্বপূর্ণ) মানুচ্ছো অলদে: এ অক্তত ত’ কায় যে আগে আ
বেগত্থুন দাঙর সাতকামর(গুরুত্বপূর্ণ) কাম অলদে: মুজুঙত যে আগে-তারে উপকার
গরানা।
যুনিয়ু ২০১০ সালত আন্তজাতিক মা ভাজর ইনস্টিটিউত
বানানা থুম অলে সে ফগদাঙি অক্তত শেখ হাসিনা কোইয়ে, ‘‘২০১৪ সালত্তুন ধরি
বাঙালা দেজর বেক আদিবাসীউনরে যা যা মা’ভাচ্চোই লেঘা শেঘানা জু গরি দিম।’’
এই কধাআন বেগর বুক্ ভরি যিয়ে। বেগে খুউজি অই বাজ্জে এলাক ২০১৪ সাল। মাত্তর,
দেঘা গেল বান্দর কবাল তারেঙত, গুয়ো কবাল সুরুঙত। বেগে আঝা আরে যিয়োন। এ
সরকার আমা ভালেদি ন চাই, ন চেব। তেহ্, দ্বি’ ইক্কু এনজিও আ চাঙমা সাহিত্য
বা’, সাঙু পাঠাগার সমুত্তু নানাঙ জধায়ে চাঙমা লেঘা শেঘানা কাম সুরু গচ্ছোন।
২০১৪ সাল এনেই সরকারে আর একবার মিজে কধা কল। তেহ্ কল যা যা মা’ভাচ্চোই লেঘা
শেঘানা কামান সরকার বাজেট ন থানা আ নানাঙ অনতিত্যা দেঘেল। এধক্যে
দিনমাধানত এনজিওউনে উজে এযানার ২০১৫ সালত আদিবাসী লিঘিউনে মা’ভাচ্চোই লেঘা
শেঘানা কাম আহ্দত লুয়োন। ২০১৫ সালর পল্লে যা যা ভাচ্চোই চিজিউনরে লেঘা-পড়া
গরিবার কলেয়ু সিয়ান গরা ন অয়। কোই অয়্যা ২০১৬ সালত হামাক্কাই পাচ্চান
আদিবাসী (চাঙমা, মারমা, তিবিরে, গারো, সাদরী) ভাচ্চোই লেঘা শেঘেম। সক্যেয়ু
নানান অনথন দেঘেই কল ২০১৭ সালত জানুয়ারী ১ তারিখত হামাক্কাই আদিবাসী গুরউনর
আহদত তারার বইয়ুন তুলি দিবার। অক্তমজিম বই নপেলেয়ু পাচ্চান ভাচ্চোই বই
ইঙিল্যে ইচ্কুলত লুমি যিয়োন। মাত্তর, এবজর মার্চর এক তারিখ কালের কণ্ঠ
দ্বিতীয় রাজধানী পল্লে পাদাত ‘‘ শিক্ষরাও শিক্ষার্থী’’ শিরোনামান মরে ভারি
ভাবার। ইচ্কুলত বই পিয়োন মাত্তর, তারা শেঘে ন পাত্তন। ইয়ান ভারী দুগর
কধা-লাজেবার কধা। সিত্যাই তারার চাঙমা লেঘা শিঘানা কিজেকিজ্যা পয্যা।
এত্তো এলে তেহ্ গাজ থোগাথুগি।
এক কধা উদিলে সাত কধা উদে – হিলর হনসুচুক্যে দিন মাধানত মেরুং, চংড়াছড়িত
ক্যাম্পত তারেক ক্যাপ্টেনে এল। সে চাগালা ৩০-৩৫ জন চাঙমা ধুরি আনি
অঝাপাত্তু মাদে বাজেই দ্যি। ইক্কু বোধ্য বাদে অন জনে মাদে জানন। যে মাদে ন
জানে তারে ১০বারি খেই পিয়ে।
কিত্যাই, অধিকার চ’ নিজ ওক্কোর ন চিনন।ইয়ান এল তা কধা(যুক্তি)। ত্যুঅ
আমাত্তুন চেদন নেই। আমনর ভাচ আমনর ওক্কোর শিঘদে নানাঙ অনটন দেঘেই। এয
দেঘেই। কি গরিবং, কন লাভ নেই এই লেঘাআন শিঘেলে। রেয্যা অন অধিকার ন থেলে
কিচ্ছু গরি ন’ পারে। এই কধাআন মুই আমা চেলাউনর মুয়োত্তুন শুন্নোং। আমন লেঘা
আমনর ভাচ শিঘদে, চচ্যা গত্তে আর কি অধিকার লাগে? ও বাপ-ভেই, মা’ বোন লক!
জাত্ হিজেবে বাঙালা দেজর অজল দাঙর জাত্ অলদে চাঙমা জাত্তু। আ আদিবাসী
জাতিত্থুন চাঙমাউনে বেগ মুজুঙে। তারার আগে আজার বজরর নিজস্ব বিজগ্, ভাষা,
সাহিত্য, সংস্কৃতি আ চিন্পচ্ছে(পরিচয়)। এ জাদর এগজন সাবাঙ্গী হিজেবে জনম
লোইন্যাই যিক্যে মু-পহ্র সিক্যে মু-কালা। চঙমাউনে শাসক জাত। তারা নিজর
রেয্য শাসন গুরি এচ্ছোন। এগকালে রাজা বিজয়গিরি তা’ সেনাপতি রাধামন আ রাজা
সেরদৌলত খাঁ তা’ সেনাপতি রন্তুদেবানলোই স’ সাগুচ্যা দেজ্ জয় গচ্ছোন।
সিত্যাই তারা(চাঙমা) বলবলা(স্বাধীচেতা), তলবিচ্চে(বিবেচক) আ ন্যায়পরায়ণ।
যিত্যাই চাঙমাউনে অনদিন অধীনতায়ানরে মানি নি ন’পারন। যুগে যুগে কালে কালে
যিক্যেগুরি পারা যায় সিত্তুন এরান পেবাত্যাই চেরাষ্টা গত্তন।
অন্যহিত্তেদি বানা চাঙমা অনার হিলর চাঙমাউনে বৃটিশ, পাকিসত্মান আ বাংলাদেজ
আমল বা ইরম্নক দিনর সং নানাঙ বাবত্যা তচ্চ্যা – পেরাশানি, অবিচের গমি যিয়ে –
যার। ১৯৪৭ সালত দেজ বিভাগর অক্তত গোদা হিলর চাঙমাউন থিগী থেবা ব ন দিঘী
দিককাভুল অই কেও কেও নিজ জাগা – জমি পেলে ধেই যান বিদেজত। যারা দেজকুলত
রুউয়োন তারার অর্থনীতির বেগ্ শেজ্ গুরি দিয়্যা ১৯৬০ সালর কাপ্তেগদা;
সিত্যাই হিলর ঢক্ বদলি গেল। তা পরে এই ছারানাধা গিরি অনবাবত্যা দিন – কাল্
গঙে দ্যুন। বাংলাদেজ এরান অলে ন্যুঅ আজা, ন্যুঅ সভন দিঘিলেয়্যু তাপরবর্তী
সময় আ-র বেজ্ ছারানাধা – চিত্রিরিংপাত্রাং অলং। ফেনী গাঙ, চেঙেইকুল, মিঙিনি
কুল সমুত্তু বেগ দোল দোল জাগানি আরেই নাড়েইছড়ি, চেঙেই থুম, কাজালং থুম বা’
বানি অন বাবদে পরান তোড়াদন।
পিত্তিমী বিজগত বানা দ্বিআন ভাচ্চোই লারেই গরি পিয়ন, বুগর লো দি পিয়োন –
ভাচ দ্বি’আন অলদে বাংলা আ বিষ্ণুপ্রিয়া মণিপুরি। আমি বাঙলা ভাজর বিজগ খবর
পেলেয়ু বিষ্ণুপ্রিয়া মণিপুরি ভাজর লাড়েই আ সুয়োল কধা দোলে খবর ন পেই। তারা
১৯৫৫ সালত্তুন ধরি ১৯৯৬ সাল সং লাড়েই গচ্ছোন, সুয়োল গচ্ছোন। কদক তচ্যা,
পেরাশানি, কদক বুগর লো দেনার পরে ১৯৯৫ সালত ২৬ মে তিবিওে রেয্যা সরকায্যা
প্রাইমারি ইচকুলানিত বিষ্ণুপ্রিয়া মণিপুরি ভাচ্চানরে ডিঙিরি দ্যি। মাত্তর,
আসামত তারার পরানর পাওত্তি বিষ্ণুপ্রিয়া মণিপুরি ভাচ্চান ডিঙিরি ন পান। সে
লাড়েয়োর ধারাদিঘলী পাথার কান্দিত ৫০১ ঘন্টা রেল পদ বন্ধ গরি দিয়্যা অয়্যা।
এই পোইদ্যানে ১৯৯৬ খ্রি: ২৬মার্চ পুলিশর গুলিত সুদেষ্ণা সিংহ মরি গেলে গোদা
আসমাত সুয়োল আর বেজ ছিদি পচ্ছে। শেজে সরকায্যা তারার পরান দাবী গজি লোই
২০০১ সালত ৭ফেব্রয়ারী ১৫২আন ইচকুলত তিন ক্লাস সং চালু অয় বিষ্ণুপ্রিয়া
মণিপুরি ভাজর বই ‘‘কনাকপাঠ’’। মাত্তর, সরকারে অলর গরি বই ন থায়। নানাঙ
বাবত্যা তচ্যা, পেরাশানি আ নানাঙ ধক্যে গরি তারাওে দোঙেবার চেইয়ে।
ইশকুলানিত পর্বোয়া গুরউনত্যা নেই বই, নেই মাষ্টর, নেই সরকারর আওজ-ধারাজ।
প্রসাশনিক জটিলতা নাঙে চলে নানাঙ তচ্যা, পেরাজার। মাত্তর, মা’ভাচ্চানরে
রক্কে গরিবাত্যা, কোচপেনেই মাষ্টরম্ননে মাজর পর মাজ পর্বোয়াউনরে পড়ান
টেঙা(বেতন) নেই গরি। এ সেরে বেজাল বাজে দ্যুন ঘর যুদ্ধ মৈতৈ, বিষ্ণুপ্রিয়া
আ পাঙন(মণিপুরি মুসলিম) জাত্তুনরে। লাম্বা সময় আইনলোই যুদ্ধ গরানা পর থুম
অয়্যা গৌহটি হাইকোর্ট আ ভারদত সুপ্রিম কোর্টর। ২০০৬ সালত ৬ মার্চ সুপ্রিম
কোর্টর এক যুগামত্মকারী ডিঙিরিলোই ‘‘বিষ্ণুপ্রিয়া মণিপুরি’’ নাঙে জনম দুগী
ভাজাআনরে রেয্যা গজি লোই। (পোইদ্যান: ফেসবুক)
ও বাপ-ভেই,
মা-বোন লক! সরকায্যা এস্যে আমারে ভারী হমঅদ কোচপেনেই মা’ ভাচ্ছোই লেঘা-পড়া
গরিবার জু গরি ন দ্যে। তুমি দেঘর, বুজি পারর নানাঙ প্রসাশনিক জটিল। বই এয
বেগে ন পেই। মাষ্টর নেই আ নানাঙ কিজু। নিজ ধাবে, নিজর গরজে আমাত্তুন আমা
ভাচ্ছোই লেঘা শিঘা পরিব। এ বজর যুনি চিঝিদাগীওে ন শেঘেই এযেত্তে বজর ওয়ানত
গেলে আর আগাত্যাত পরিবাক। সিত্যাই ম কুজোলী যে যেংঙি পারে, সময় কু’ধরি ধরি
আমাত্তুন আমন শিঘ শিঘানা সাত কাম। সক্যে দেজ ন’ থেলেয়ু চাঙমা জাত হিজেবে
পিত্তিমীত যে অন জাগাত বাজি থেবং।
দি’মুই সুগ পাং, ভাবিনেই
