‘‘এয নিজ’ ভাচ, নিজ’ লেঘা শিঘি’’

কিতাব’ত লেঘা আঘে, চাঙমা অক্কোরুন বাজেই রাঘেবাত্তে ১৯৫৯ ইংরেজিতে দাঙগু নুয়োরাম চাঙমা, দাঙগু হরকিশোর চাঙমাত্তুন ধরি আরকানি গরি সত্তুর দশক’ত সুপ্রিয় তালুকদার, দাঙগু ননাধন চাঙমা, শ্রীমৎ শ্রদ্ধালঙাকার ভিক্ষু, আশি দশক’ত কলকাতাত শ্রীমানেয়া ‘‘চাকুমা আঘরতারা’’, নববই দশক’ত দাঙগু আনন্দময় চাঙমা, বিংশ শতাব্দীত চাঙমা সাহিত্য বা নাঙে এক্কোজধায়্য ‘‘চাঙমা সাহিত্য পত্রিকা’’ নাঙে এক্কো ম্যাগাজিন ফগদাঙি অহলে চাঙমা লেঘা আ সাহিত্য চচযা দপদভা অই যায়। চাঙমা সাহিত্য পত্রিকাত বাংলা ভাঝর মাজারা নেই। আজল কধা কধ’ গেলে পার্বত্য চুক্তি পর আমা ভাচ্ছোই সাহিত্য চচযা আগত্তুন বহুত মুজুঙে আক্কোই যিয়ে। ইক্যে মনে কলে আমি কম্পিউটার আ নেদ’ত আমা ওক্কোরলোই লেঘা লেঘি পারি। ই-আন খামাক্কাই চুক্তি ফসল কই যায়। উন্দি বাংলা সরকায্যা আমাত্তেই এবজর ক্লাশ ওয়ান’ত বই জুগোল গরি দিল’। সমারে নানাঙ সাহিত্য জধা, দাঙর গরি কোই যায় খাগাড়াছড়িত ‘‘সাঙু পাঠাগার’’, ‘‘চাঙমা সাহিত্যবা’’, ‘‘হুয়োঙ বইয়ো বা’সমুত্তু রাঙামাত্যাত ‘‘চাঙমা ভাষা গবেষণা কেন্দ্র’’ নানাঙ জাগাত চাঙমা লেঘা শিঘিবাত্তে কোর্স চালু রাঘেয়্যা।

            এধক জু থানার পর আমি এয ঘুমত আঘি। সিত্তেই এচ্যে বেগর আভিল্যাচ চাঙমা জাত্তো পিত্তিমীত ভচ যাদে বেচ সময় ন’ লাগিব। কিত্তেই, মুই তিন বজর একনাগারে চাঙমা লেঘা শেঘানাত্তুন ই-আন কোই পারঙ, আমি চাঙমা লেঘা শিঘির জাত্তোরে কোচ পেনেই নয়, চাগুরি পেবাত্তে। ইরুক কু দিন মাধানে সি-আন গরিবাত্তে কয়। কিত্তেই, চাগুরিবলা বাদে অন্য মানেইউনর দিন কাল তোরাদে ভারি দুক অহর। তারা নিত্য চোগে চোগে রাঘান। কুধু যার, কি গরের, কারলোই কধা কর। না, রাঙামাত্তে যেনেই কারলোই কধা কল, তেঙা কত্তুন পেল। না খাগাড়াছড়িত যার। ই-আনর এক্কা জু পেলে বা হেনা থেলে কধা নেই। বারাহ্ বারাহ্ গরি শুনে দিলে লাখ তেঙা গুনি দেঘোই। দগে ন’ অলে পরান আহরেবে। এধক্যে দিন মাধানাত্তুন মানুচ ইক্যে লাখ লাখ তেঙা দিনেই চাগুরি তোগান। চিগোন ওক, দাঙর ওক এক্কান চাগুরি থেলে এ দশাত্তুন বাজা যায়।

                এচ্যে পার্বত্য চুক্তি ১৮ বজর পর আমি আমা মা ভাচ্ছোই লেঘা শিঘানা জু পেলঙ। ই-আন এক্কান দাঙর পায়োত্তি। এক্কো জাত ইজেবে বাজি থেবার এক্কান পত্ । অধিকার পেই বা ন’ পেই। ভাচ্ আ ওকোরুন ধরি রাঘেবার এক্কান জু। মাত্তর, দুগ কধা অলদে আমি আমা ওক্কোরুন নিজ’ গরজে, মন’র দাবে ন’ শিঘি। বানা চেই আঘি সরকায়্যা মুয়ো কিত্তে। কমলে মাস্টর দিব দিব গরি।

              ও বাপ ভেই, মা-ভোন লক! কিতাব’ত লেঘা আঘে ১৯৫৯ সালত পাকিসত্মান সরকায্যা আমারে আমা ভাচ্চোই, আমা ওক্কোরলই লেঘা শিঘিবাত্তে সক্যেয়্য জু গরি দিয়্যা। মাত্তর আমা জাত ভেইউনে সি-আন ন’ চানার আর শিঘিবার জু ন’ থেল অয়। এচ্যে ক’বজর লাড়েই গরানার পর আর’ জু পেলঙ আ যুনি ইক্যে আমি আমা ওক্কোর-ভাচ শিঘিবার গরচ মনে ন’ গরি সিআন সরকার’র দুচ নয়, আমার।

           আমি খবর পেই, পিত্তিমী কিতাব’ত লেঘা আগে দ্বি’আন ভাঝর লাড়েয়’ত লো দি পিয়োন। বাংলা আ মনিপুরি। বাংলা ভাঝর লাড়েই খবর আমি বেগে পেলেয়্য বিষ্ণুপ্রিয়া মণিপুরি ভাঝর লাড়েই খবর বেগে ন’ পেই। সিত্তেই ইয়োত সে কধা কিজু খবার চাঙর। আসাম আ তিবিরেত বিষ্ণুপ্রিয়া মনিপুরি ভাঝর স্বীকৃতি পেবাত্তে ১৯৫৫ সালত ‘‘নিখিল বিষ্ণুপ্রিয়া মনিপুরি মহাসভা’’র অতালিয়ে আওজে ভাষা পরিষদ বানে নেই তারা আন্দোলন আরকানি গরি ১৯৯৫ সন’ত ২৬ মে তিবিরে সরকায্যা প্রাইমারি ইচকুলানিত বিষ্ণুপ্রিয়া মনিপুরি ভাচ্ছান চালু গচ্ছে।  মাত্তর সক্যেয়্য আসাম’ত মণিপুরি ভাচ্চান রেয্য স্বীকৃতি ন’ পান। ১৯৯৬ সালত ৫০১ ঘন্টাসং রেল অবরোধ গরিবার কিজেক(ঘোষণা) দিয়্যা অয়। ইয়োত ১৯৯৬ সালত ১৬মার্চ সে কামান গরদে পুলিশ’ গুলিত সুদেষ্ণা সিংহ ভাঝরলাই মরিল্যা গদা আসাম’ত যদবদে মরামজ্যা লাড়েই অহলে সরকায্যা তারা আরাং দাবী দি’ পিয়্যা। ২০০১ সালত ৭ ফেব্রুয়ারী বরাক উপত্যাকাত  ১৫২আন ইচকুলত ক্লাম ত্রি সং চালু অয় মনিপুরি ভাঝর পাঠ্য বই ‘‘কনক পাঠ’’। মাত্তর সরকায্যা অলর গরি ন’ থায়। তারারে নানাঙ ধক্যে গরি থোগানা আ ইচকুলানিত মাষ্টর ন’ দেনা বা দিরি গরানা, বই অক্তমজিম ন’ দেনা এধক্যে নানাঙ বেজালত পেলে রাঘেয়্যা। মাষ্টরম্ননে মাজর পর মাচ বেতন ন’ পেলেয়্য ত্যুঅ তারা নিজ’ মা-ভাচ্চানরে কোচ পেনেই কাম গরি যিয়োন। বানা সিআন নয়, মণিপুরি আ অমণিপুরি বির্তক বানে দিন্যাই ভেইয়ে ভেইয়ে কোল-খুজ্যা বাজেয় দিল। পরে আইন লাড়েই গত্তে গত্তে বেক বির্তক থুম গছ্যা গৌহটি হাইকোর্ট আ ভারদ’ত সুপ্রিম কোর্ট। ২০০৬ সালত ৮ মার্চ সুপ্রিম কোর্টর এক যুগান্তকারী রায়’র বলে ‘‘বিষ্ণু প্রিয়া মণিপুরি’’ নাঙে জনম দুগী ভাচ্চান রেয্যর অনুমোদন পেল।

               ও বাপ-ভেই, মা-বোন লক! আমল গরি মুরত পরি ভাবি চ’, বাংলা সরকায্যা কি আমারে ভারি কোচপেনেই এচ্যে আমি আমা মা-ভাচ্ছোই লেঘা শিঘিবার জু পের? খামাক্কাই নয়। নানাঙ চাপর কারণে আমারে মা ভাঝর বই দি পার। সিত্তেই আমি বারবাঙানে কুজোলী গরির ‘‘ এয শিঘি নিজ’ ভাচ, নিজ’ লেঘা, নিজ’ গীত’’। দুগ দ’ দুগ! কিচ্চু ন’ পারলেয়্য নিজ’ মা- ভাচ-আন পিত্তিমী বুগত থিদব্বর গরি।

কৃতি দা, কিঝেনি এচ্যে তরে ভারী গরি ইধোত উদিল। সিত্তেই ত’ চিদি-আন স্ট্যাটাস দিলুঙ।

কয়েকদিন আঘে ত’ চিদিয়ান পেলুঙ। ভারি গম লাগিল ত’ আক্কোবার সম্বল্যা কধানি শুনিনেই। এযান্যা মুজুঙে সবন দেঘানা মানে আমা জাদর ভালেদি কামনা গরানা। ‘‘চারু’’ ত’ধক্যে চেদনবলা মানুচ আমা জাদর আর’ সিরিত্তি গরা পরিব’। কিত্তেই এচ্যা হয়দবা আমি কয়েকজন, হয়দবা আমাত্তুন সেধক্যে সম্বল নেই, মাত্তর আমাত্তুন বাজি থা পরিব, মুজুঙ বাবত্তে সবন, অজল অজল সবন তগা পরিব’। যাক, তরে খুব খুজি গরি ন’ পারঙর কিত্তেই, ম’ মনান এক্কা ঘোর ঘোর পাঙর। আমা পরানতুম পত্রিকে-ব’ এ মাজত সম্ভবত ন’ অর। নানা বাবত্তে ঝামেলা থায় সি-আন সত্য, সবসময় যে ফুদি পারিব’ সি-আনও নয়, আমি মুজুঙে আক্কো যেবং, আমি দমি ন’ যের। আজল কদা, সময় সুসুগ আ পরিস্থিতি দেগিনেয় হুজ বাড়েনেয় এগো যেবং। ধর্য্য ন’ আরেয়্য। সময় আ সুসুগ বুজি অক্তমজিম পত্রিকা(কামান) বার অব’। সে লগে নানা বাবত্তে কাম হাদত লবঙ। যাক, তুই গঠনতন্ত্রবো চাঙমা লেঘাদি লেগা অলে পেবে। চারু, মাঝে মাঝে লিগিবে, এ আঝায়ান তত্তুন সবসময় রাগেম। সবচেয়ে আর’ দোল কাম অব’, যদি অক্তমজিম সিদুয়্য এলাকার অবস্থা, পরিবেশ-পরিস্থিতি, আর্থসামাজিক, ঘটনা (ইত্যাদি) নানা বাবত্তে কাম’ কধা জানেলে। কিত্তেই আমি যারা ইদু থেয় আদাম’ ভিদিরি খবরানি ঠিকমত পা ন’ অয়। এ সমসত্ম ঘটনা আনি আমাত্তুনবারে চিদা পরিব’। যাক, যে সময়ত তরে চিদিয়ান লেগঙর, ইক্যেনে হযদবা ঘুম যেবার সময়, মাত্তর দ্বি’চোগ পাদা কিত্তেই জানি এক ন’ অর। ঘুম যেবার চেলুঙ মাত্তর, ন’ অর। পরেদি তরে লেঘানাত বুজিলুঙ। আজলে, ইদানিং খাগাড়াছড়ি খবরানি ভারি জারাকাদা উদেদে বাবত্তে।
যাক, গম থেচ। ত’ পরিবার, দোলে দোলে সংসার কাদোক, মুজুঙে তর এজাল পেবং এ আঝা রাগেনেয় এচ্যা ইয়ত সং।
থুমেদি
কৃতি
আওজর ‘‘চারু”,

জুম্ম জাতি হেরে গেল

                      

উগুরেদি লেঘা আন মর নয়। ইআন ভজমান দেবপ্রিয় দার লেঘা। কেল্যা মিঠুন চাঙমারে ধুরি নেযেই আধা পদত গুলি গুরি মারে ফেলেনেই এই কধাআন তা ফেসবুক টাইমলাইনত  লিকখে। বহুত জনে তারে নিনেই লিক্খুন। বেগত্তুন বেচ মর এই লেঘান চিদত পুত্তে। সিত্তেই ইআন মুই শিরোনাম গরলুঙ।

                  আজলে আরাঙ কধা কধ’ গেলে মিঠুন চাঙমালোই মর সেধক চিনপুচ্যা ন’ এল’। মুই তারে ন’ চিনঙ আ দেঘা দেঘিয়্য ন’ অই। খালিক মুই তারে এক্কো সাহিত্যক ইজেবে চিনঙ। তার এক্কান লেখা চাঙমা সাহিত্য পত্রিকা (দ্বি’ বজর, পলস্ন্যা পয়ধে, ফেব্রম্নয়ারী- ২০০২) লিকখে ‘‘ন্যুঅ দিনর চাঙমা সাহিত্য’’। সক্যে এই লেঘা আন মুই বারবার পজ্জোং। সিয়োত্তুন খবর পেয়োং কক্কে, কন্ অক্তত্ কত্তমান্ আমা চাঙমা সাহিত্য চচযা গরা অয়্যা। কধ গেলে ইআন এক্কান তলবিচ্চে লেঘা।  সিয়োত তে আর’ লিকখে ‘‘.......... আমি ভাল’ক দিন্ ধুরি বাজস্যে আঘি চাঙমা উপন্যাস ফগ’দাঙ অহ্ব। কোনো অভেদর উচ্চপুক থাক্কে মানজে চাঙমা ভাচন্দি উপন্যাস লিঘিবাক। খালিক এয উপন্যাস ন’ লেঘন। উপন্যাস ন’ লিঘিলেয়্য আমা ন্যুঅ জিংকানির ন্যুঅ লিঘিয়েউনর যে ফগদাঙি সিয়ান মন’কলে চিওন চিওন ওক তারা লেঘানি আমারে আঝা দেয়, ন্যুঅ গুরি সবন দেঘায় যে আমি আমা চাঙমা জাদর যে রেনেসাঁ যে উদন্দি সিয়ান কুরে কুরে এজিয়েগোই। এক কিত্তেনদি জাত’ ভিদিরে ভেইয়ে ভেইয়ে হুনোহুনি আ অন্য কিত্তেনদি সে সমারে চাঙমা জাত্তোরে জাগেবাত্তেই নানা কিত্তেত্তুন যে চাঙমা সাহিত্য চচযা অয় সিয়ানিত যে লেঘা এযের সিয়ানি তলেই চেলে আমি জাদ’ মানুচচুনে যে আক্কোবাত্তেই চাদন সিয়ান দিঘি।...................................।’’

               লেঘা আন’ থুমেদি যিআন লিকখে...........‘‘আমা চাঙমা সাহিত্য বানা সাহিত্য অইনে ন’ থোক; ত্যা জাদরে উজে নেজোক-এক সময় যাতে আমা মানুচ্চুন চাঙমা ভাচচোই লেঘাপড়া গুরি পারন, মন কধা কোই পারন।’’ এধক্যে এক্কান আঝা রাঘেই তে লেঘাআন থুম গজ্জে।  

২৪ ডিসেম্বর ২০১৬ ইং হুয়োঙ বইও বাত “চাঙমা বর্ণমালা ও ধ্বনি সংক্রান্ত পর্যালোচনা কমিটি র এক্কো মিলনি খলা।

                মাত্তর তারলোই দেঘা নেই। একদিনে মুই দেবপ্রিয় দাত্তুন পুজোর গজ্জোঙ মিঠুন দা ঘর কুধু? তা লেঘানি মর কুব গম লাগে। এধক্যে গরি ভিদি গেল’ ১৪ বজর। আঝা রাঘেয়্যঙ যুনি বাজি থেই পিত্থিমীত যে কন জাগাত দেঘা অবঙ।  শেজে সে আঝা তিরোচ মরি এল ৩ ডিসেম্বর, ২০১৬ ইং হুয়াঙ বইও বাত (সে পরে ২৪ ডিসেম্বরত ২০১৭)। সে দিন্যা কে.ভি দেবাশীষ চাঙমারে আহবায়ক গরি (মিঠুন চাঙমা, ইনজেব চাঙমা, শুভাশীষ চাঙমা আ পরিমল চাঙমা) পাচ সদস্য এক্কো ‘‘চাঙমা বর্ণমালা ও ধ্বনি সংক্রামত্ম পর্যালোচনা কমিটি’’ বানা অয়্যা। এধক্যে গরি মিঠুন চাঙমালোই বেগশেজে ১৫ ডিসেম্বর ২০১৭ইং দেঘা অয় রেগা ক্লাবত ‘‘চাঙমা বর্ণমালা ও ধ্বনি সংক্রামত্ম পর্যালোচনা কমিটি’’ জুগল্যে এক্কো মিলনি খলাত। এই দেখা শেষ দেখা অহব ভাবি ন’ পারঙ। সে দিন্যে তা পলেস্ন পুজোর এল’ তমা ‘‘সাঙু- ২০১৭’’ বইবো কেঝান কাম চলের? মন ভাঙি ন’ পেলেস্না, লাগি থাগ’। সে দিন বানা তারলোই নয়, রাঙামাত্যা খাগড়াছড়িত যারা ইরম্নক দিনত চাঙমা লেঘা শেঘানা কাম গরদন তারাসমুত্তুন বেক্কুনদোই দেঘা অয়।

           কধা আঘে, উজু গাচ কাবা খায়, উজু মানুচ ঝাদি মরন। সিত্যাই মিঠুন দা ঝাদি জাদি জাদত্তুন দুরত যেই পেল। বেনাল্যা চাঙমা ভাচ্ছানরে নালত আনিবার তার যে সবন সে সবনান সবনত থেল।

১৫ ডিসেম্বর ২০১৭ রেগা ক্লাবত মিঠুন দালোই শেজ দেঘা অহব ভাবি ন’ পারঙ।

                 কেঝিনি চাঙমা জাত্তো কবালত কি আঘে? বিজগত যুনি রিনি চেই দিঘি, সেই বগবান বুদ্ধর শাক্য বংশ বিরম্নভবত্তুন, শংকরাচার্যত্তুন কাবান কেনে ভারী পিত্তমরা উয়েই আ পরে রেয্য জয় গরিবাত্তেই আরাকান গেলং। বহুত জাত ভেই চম্পক নগরত ফেলেই এলং।  আমি সিদি পরলং নানাঙ জাগাত। পুরনী কধা আঘে ঝারত গেলে বাঘে খায়, ঘরত থেলে মঘে পায়। সিত্তুন আমি তলবিচ গরি পারি আরাকান রেয্যত কেঝান এলং? সে পরে চাদিগাঙ ঘুরি হিল চাদিগাঙত  লুমিলঙ। বৃটিচ্চুনে চাঙমা জাত্তো সমারে ন’ জিনি তারা কোশল বদল গরি চাঙমা রাজা এজাল লোইনে  দেবানুনে কাম গুযযন। দেবানে দেবানে কুজ্জে বাজেই ২২ মুউয চাঙমা কাবি ফেল্যন। এল মিজিলিক ধর। তা পরে পাকিসত্মান সরকায্য কাপ্তে গদা বানি চাঙমা জাত্তোরে পুত্তোপারা গরি দিল। এর পর এল বাংলা দেচ। তারায়্য জুম্ম জাত্তোরে বাঙাল অবাত্তে বুদ্ধি দিলাক। জুম্ম জাদর পাত্থলী এম. এন. লারমা সিআন ন’ মানিলে বাঙালুনে কাবা ধরলাক। শেজে আমা লগে ন’ জিনিলে আমালোই এক্কান সমযোদাত গেলাক। অল’ চুক্তি। সিআন জুম্মউনে কন পার্বত্য চুক্তি আ বাংলা সরকায্যা কয় শান্তি চুক্তি। সেই পোইদ্যানে বহুত দোল দোল পর্বোয় চাঙমা মরি গেলাক। পল্যা দ্বি’ ভাক। সিত্তুন তিন বাক। ইক্যে চের ভাক। এই চের ভাকত বেগ শেজে মরি পেল মিঠুন চাঙমা। এধক্যে গরি কার বাজি থেবার আঝা থায়?  ও পর্বোয়া লক কধা আঘে মনত থেলে গুন গরে, বাঙি কলে রন গরে। চাঙমা ইক্যে বানা চোক আগন চেই থানা, মু থেনেয়্য বুব গরি থানা। কোই ন পারে। ন কলুঙ। কবার আঘে।

                  শেজে চাঙমাউনর যুনি দুগর সাদা থায় একদিন জ্বলি উদিবাক।   

Ranjit Chakma · এক থুপ কবিদে

দিকবন

(৩) রনজিত চাঙমা(২০/১১/১৭ইং)

লরিবার চেলে লরি ন' পারির
কবার চেলে কোই,
চোগ পেলে পেলে তামাজা চেত্তে
বুবো সান্যান হো্ই।

তিরিং বিরিং নাবালাং মাচ্চুন
পানি আগায় আগায়,
ফালুক ফালুক ফাল মারিনেই
দুচ মারদন গদায়।

কামারা কামারি গত্তন তারা
গত্তন ফেলাফেলি,
বেগে চাদন চেলা অবার
ন' চাদন অবার চেলি।

আজব' সাপ্পো দিকবন গোরি
আঘে তামাজা চেই,
হা্দ তালি দেত্তে জোরে জোরে
মনত খু্ঁজি হো্ইনেই।

চেলা হোলের কারে মারি
চেইর কি আমি ভাবি?
কুধু আমি যেবার চেত্তে
নিজর মাধা ফাদি?
★★★

ভিলে কধা
(১১) রনজিত চাঙমা(২৬/১১/২০১৭ইং)

চাঙমাউনর ভিলে কধান
উলমস্ত ভারী,
এত্তন ভিলে কাবদন ভিলে
দাবা দেনা পুনত বাজে সং মুরি।

ভিলে কধায় পরা খানা
ভিলে কধায় মরা,
ভিলে কধায় তলেদি নেযার
গরেত্তে পাদারা।

পলনা ভিলে সবনে দেইখ্যা
এযান পোরিব' গরা,
ন' গোরিলে সাত দিনর মাধাত
তারাই খেবাক্কে ভিলে ধরা।

পলনা ভিলে উমুক্ক্যারে
মাধের ভিলে কুত্তুরি,
খাজা মিজে উদো ন' চেই
ভিলে কধায় রাগে যাদন ফুলি।

পলনা কোইয়্যে,দমনা কোইয়্যে
খাজা মিজে চহ্ তোলেই,
ভিলে কধায় কান ন' দিইনেই
মনানিত সাঅজ যেই বারেই।

ভিলে কধায় ভিচ্যেই যাদন
আমি ওত্তে পাদারা,
তুয়া কিয়া আমি ন' বুঝিত্তে
লুগেত্তে জাদর মাজারা?
★★★

জুম্ম জাদর অংক
রনজিত চাঙমা(১৭/১১/২০১৭ইং)

যোগ নেই বিয়োগ আঘে
নেই গুন আঘে ভাগ,
নেই ভালেদ,নেই চিদে
আঘে বানা কুত্তুরী রাগ।

শত হিয়ে সমীকরন
নেই সরল অংক,
দেঝ জাদর নেই চিদে
জোব নেই জানা,গোরি যেইর রঙ্গ।

সুত্র তুত্রো কাম ন' দের আর
ঘুরি ফিরি এযের ভাগ,
দুরত ন' চেই,মুজুঙান চেত্তে
পরের সেনে কবালত বাঝ।

কুলুক পানিত মাচ্চুনর যেন
চোক্কুন অনদে মেয়লক,
অংক মিলেই ন' পারিনেই আমি
হো্ইয়েই বেগে সে ধক।

জুম্মজাদর অংক মিলেবার
কাবিল গুরু পেবং কুধু?
ন' অলে স্যা বিয়োগ ভাগে
মাজারা লুগিবং ছিনিনেই বুদু।
★★★

চান চড়ই
(৬)রনজিত চাঙমা(২৪/১১/১৭ইং)

চান চড়ই, চান চড়ই
নিত্য কুরে থেই,
ভেজাল গরর,পেজাল গরর
লাজ শরম হিয়া নেই?

ঘরর কবগত বানিলা ভাহ্
ঝর বোয়েরত নেই চিদে,
অলর গোরি থেই পারর
নেগে মোগে গর' কোজ্যা।

কামারা কামারি গোরিনেই
মাদিত পরর দলামজা,
কি গোরিবা কধে চাং
তমারে ধোরিনেই খেলে ভাজা?

সুগে থাক্কে ভুদে কিলার
থেই ন' জানর তুমি গমে,
কি দুগর কাম গোরি পত্তে
চরিভুরি খানা বাদে?
★★★

 (১)গঙার
রনজিত চাঙমা(১৮/১১/২০১৭ইং)

পানি গঙার বান গোরিলে
মানজ্যোর গঙার রাগে,
বমভুল মানজ্যোর রাগর গঙার
ঝিমিত ঝামাত জাগে।

বাঘর গঙার শিগের লরানা
অরিঙর গঙার দাবা,
মাচ্চুনর গঙার দুব ছেই তেরাত
যুরুত যুরুত সোমানা।

গারীর গঙার বেরেক ছাবিলে
মানজ্য গঙার খেমদা,
দিনরে রেদ,রেদোরে দিন বানানদে তারাই
গঙার আঘে টেঙা।

কম বুঝিলে গঙার বেজ
হেগা তাগলর দোনদে কুব,
আগে পরে যা অদ' সাদ
হোলেবার চানদে বাবর পুত।

বোয়েরর গঙার ঘর ভাঙানা
উগুরেই ফেলানা বাঁঝ গাঝ,
মানজ্য গঙার ভাজা দেদে
অজম বুদ্ধি অলে নাজ।
★★★

মর আওজর হিল চাদিগাঙ
রনজিত চাঙমা (১২/৮/২০১৭ইং)

মর আওজর জর্ম জাগা হিল চাদিগাঙ
কালা কালা মেঘে আঘে ঢাঘি,
ঝলগা ঝলগা নিত্য বাহর বোয়েরান
উরি যার তার মাধা হবং, বুগো হাদি।

উরি যার ধুল্য, দাঙা যাদন মৌনমুরাউন
ছরা ছরি শুগে যিয়্যে, নেই পানি,
কন' কিত্তে হা্ঝি নেই,খুজি নেই,রং নেই,ধং নেই
বানা বানা শুনা যার, মরা হিজাক কানানি।

নেই আর আগাব ঝার, নেই পেগো রহ্
নেই বাঘ ভালুগ,এইট,অরিঙ চঙরা,
ধেই গেলাক কন মুল্লুগত কিজেনি পরান বাঁঝেবার
আমারে ফেলেই এচ্যে যাদন ছারি বেগে এগজা।

বোয়েরান ভোরি যিয়্যে খাদাচ্যা বাজে
নেই আগ' সান মিদে মিদে ফুলর তুম্বাজ,
রাঙা বেলান ন' হা্ঝে, ন' হা্ঝন চান তারাউন
তারাইও কি পাদন বানা, যেচ্ছেক পজা বাজ?

জুমানি লুগি যার সমানে, নিত্য থায় রাদর কাল
উন' পরায় বেগর কাদি যার দিন,
চোগ মু হালুক হালুক, বুগো হা্র দেগা যায় বেগর
সবনেও ন' ভাবিই আমি, দেগিবং এযান দিন।

নেই রাধামন ধনপুদির ঘিলাক তাক পারি আনি
ঘিলা খারা অনার খুজির দিন পালানা,
নেই গাবুর লগর জিদাজিত্যা গোরি
দৌলগাবুরীর চুলচুদোত নাকসা ফুল গুজেই দেনা।

ন' এযে বিজুবো পুরনী সান সাজিসুজি
বিজু পেইক্কো বলান্যা ন' দে আর আগ' সান,
বেগে এচ্যে দুগত আঘিই, মনত কারর সুগ নেই
কিত্ত্যেই এযান অল' মর,আওজর হিলচাদিগাঙ?
★★★

সবন দেগানা
রনজিত চাঙমা (১৪/১০/২০১৭ইং)

মুই সবন দেগং,দেগঙর ভালক দিন
সেই কজমা চিগোন কালত্তুন ধুরি,
মা ভাঝর হোচপানাত লেদাপেদা হো্ই
লিগিবের চেদুং জানাং ন' জানং গুরি।

সেক্কে যিয়েনি দ্বিচোগে দেখ্যং, এব' চোগত ভাজে
মনে অহর ইক্কে সিয়েনি সবন ভিলি,
সেই দেগানান কদ' সুগর এল' সেদাম ন' এল' বুঝিবার
ইক্কে বেক যিয়েগোই লুগি, তে পারঙর বুঝি।

বেলান যাদে ন' যাদে রেঙ কারিদাক শিগেলর ঝাক
কুরো ধুরি নিদাক্কোই লুরত্তুন,
হরগজর জ্বালায় খেত খিত্তির পাদানি লুলং
আর হঙ হঙ গুরি কুরে এদাক অরিঙউন।

মৌন' উগুরে ভালক দুরত,মনে অদ' কায়কুরে
ডগত্তাক জুর বানি লাগা বান্দরুন,
ঝারত গেলে য়েদো হুজ,বাঘ্যের হুচ্চুন দেগিলে
ঝাঁত ঝাঁত জার' কাদা উধিদাক বুগ' মুরত্তুন।

য়েল য়েল মৌনমুরাউন হোচ্যা গাবুরী সান
সাজি থেদাক আজি রুজি, নেই দুগ বেজারে,
ভেদের সেদের কাঙারা,ইজে,মাজ শামুক
ছরায় ছরায় মিলি মিজি থেদাক সমারে।

দাঙর দাঙর গজ্জং গাঝ মাধা উজু গুরি থিগেয়্যে
ডেলায় ডেলায় পেগেরার বাহ্ বোয়েরত দুলোনা,
হি দৌল লাগে চাদে, এব' চোগত ভাজে মর
আর' ডুডু কাঙোর ডু ডু ডু ডু গুরি হাঙারা মাগানা।

বিন্যেপোত্যা জুম্মবীর তদক তাদাক ভাত রানানা
আ কলা পাদার ভাত মজা যুগুলানা,
বেনা দুন্নো লোই নেগে মোগে দ্বিজনে
তাগল সারি লোইনেই পুল্ল্যেং ভুগি জুমত যানা।

ন' এল' উনপরা, ন' এল' চিদে, ন' এল' কোল
ন' এল' বেজারা বিজিরি,হি্ংজে পিযুৃম,
হোচপানা মেইয়্যে দলায় মনানি ভরন ভিরন থেদ'
ইক্কু দ' হিচ্ছু নেই, আঘে বানা কানা কুম।
★★★

এচ্যে জুম্মো জাদর নভেম্বর মাজর নাদংছারা ১০ তারিগ। জুম্মো জাদর আগমুলিম দাঙর চেলা মানবেন্দ্র নারায়ন লারমার উদিজে "তুম্বাজ" নাঙে ম' কবিদা বোইবোত্তুন য়্যা কবিদাবো জুঁ জুঁউ জানেনেই উৎসর্গ গল্লুং।
-------------------------------------------------------
"ইক্কো ফুলর দুগর কধা"
রনজিত চাঙমা

সবনে দেগিলুং মৌনমুরা ছেরে
ইক্কো রাঙা চিচিক্ক্যা ফুল আঘে ফুদি,
মুই ধুরিবার চেলুং আওজে,
কল' তে, "ন' ধুরিচ তুই মরে
ম, দুগর কধা ন' পারিবে তুই বুঝি।
বেগে এচ্যে উব হা্রা হো্ই,আমারে যিয়ো ভুলি,
মেল্যা চোগে রাঙা রাঙা সবন দেগর বানা
মাত্তলে তিনাং ফালাং গুরি। "
মৌন মুরাউন উধিলাক কানি তা কধা শুনিনেই
চেরাং চেরাং চোগ' পানি,
আপসোচ বেজারে তারাই কলাক মরে,
" যে আঝা বুগত বানি এগদিন সমারে
মালগুচ দিইনেই লারেই গত্তে গত্তে
গেলাক ঝরি যারা অকালে
তুমি কি ভুলি যিয়ো তারারে?
তুমি কি পুরেই দিবা তারা আঝানি? "
মুই বুব সান চোগ পেলে পেলে আম্বগে
জোব নেই মুয়ানত, মাধা লোঙেই অলর গোরি
টেব টেব ঝরেলুং বানা চোগ' পানি,
এগ বুগ দুগে দাঙা যিয়্যে মনান লোই
ফিরি এলুং চুবেচাবে তারারে হা্জার ঝুঁ জানেনেই,মনে মনে দ্বি হা্দ জুরে খেমা মাগি।
★★★

রনজিত চাঙমা (৩০/৯/২০১৭ইং)

তিরিং বিরিং নাদেংপত্তি
দেদন উবরফাল,
রেদ সম্ভাগত তদেক্কুন নিত্য
বাজানদে মু পেজাল।

ডবাকাদি বিরেচ্ছোে কানে
গায় গায় গুজি গুজি,
আলজি পেজাবো মিঞ মিঞ গরে
ঘরর চালত বজি।

ঘরর কুরে গুরবো গাচ্ছোত
মরা র' কারে কবো,
ধান ছরাউন উবো থানদে
বেদের সেদের মেবো।

বাব' কধা পুয়ো ন' শুনন
মাবোর কধা ঝিয়ে,
লেগাপরা শিগি দাঙর হো্য়ন
এক্কা অলে কদনদে তারাই, তুই ন' বুঝিবে।

কি দিন এল' বারিজা কাল্যা
দেবায় ন' দেদে ঝর,
শুগুনো কাল্যা পানি বান অয়দে
ধরেদে দেবায় দর।

বারবোই এইনেই ঘরবোরে কদন
ইয়েন নয় দ' তর ঘর,
উগুদো কাত্তোল বুগেই দেদন
ঘরবোরে কদনদে পর।

আদং খাজর পেজাকজায়
সংসারান যিয়্যে ভোরি,
পরর মাধাত খেবার চানদে
বেগে বেরমা পুরি।

উল'মস্ত দিনর কধা
কোইনেই ন' অব' শেঝ,
গাঙ ছরানি চোগ' পানিলোই
লাগেদে দাঙর বেচ।
★★★