তুমি আর আমি
হিলর খবর দ’ আমি বেগে পেই। এক সময় দেচ, ভাচ, রিদিসুধোম, আল্যাক বেক থিক এল’। বেলান পুগেদি উদে পুজিমেদি ধুবি যায়। সে অক্তয়ান মানুঝর মন রিবেঙত কদ’ সুঘর নিঝেনি পেলাং বেই যায়! সে কধা কলে পচ্জন কনা ধক অয়।
সে সুক চাঙমাউনর কবালত বেচ ন’ সুয়ে। ১৮৬০ সালত বিট্রিশউনে হিল চাদিগাঙ ধঙল গরানা পর চাঙমাউনর দুঘ’ লামা আরগানি অল। এক লেজা পর এক লেজা কাল বোজেক ঝর এই বেক ছিত্রিং বাত্রাং গরি দিয়্যা। কাপ্তে গধা দিনেই রাজ ঘর ধুবে দিয়্যা। চাগালা থিয়্যা আদাম, ভূই বাগান ধুবি দিয়্যা শাসক গুত্তিয়্যা। ছিদি পচ্ছোন বার্মা, নেফা, ত্রিপুরা, মিজোরামসুমুত্ত যে যিন্দি চোঘ পহ্’র দেঘে তে সিন্দি ধেই যেলাক। নেগে-মোগে, বাবে-পুদে, মা-ঝিয়ে অলাক ফারক, বুগত এক বুক আহ্’ভিল্যাচ্চোই। সে কধা কলে কুদুউচ্যা বাবে ব নিঝেচ ইরি দিনেই কয়, “আমি সংসার ইয়েং। বানা যেই যেই কইয়ন পিত্তিমিত এলং কন’ কিচ্ছু ন’ আনি।”
ব্রিটিশ, পাকিস্তান আমল কাদে এলং। ইক্কে বাংলাদেচ আমল। আঝা এল বাংলাদেশ আমালত সুঘে কাদেবং, নিজ মান, সম্মান আ নিপরভা গরি। মাত্তর, সে আঝা বরগাঙ পানি সমারে ভাজি যাদে বেচ সময় ন’ লাগে।
চাঙমা জাত্তোর এক্কান গুন তারা পরর তলে থেবার ন’ চান। যুগে যুগে তারা সরান পেবার সান। সেনে তারা মোগল ব্রিটিশ বিরুদ্ধে যুদ্ধতও জয়র বিজক আঘে। কন কালে তারা ধঙে ন’ পারন। ইক্কে বাংলাদেশ আমাল। এ আঘে কোই অয়ে, সুক তারা কবালত বেচ ন’ সুয়ে। আঝানি বরগাঙ পানি সমারে ভাজি যিয়ে। এ বাংলাদেচ আমলত লাক লাক বাঙাল হিল চাদিগাঙত আনিনেই ইক্যে কুদুউচ্যা বাবে আর বেচ দুঘত। ইয়ে আহ্’রে তার ইত্তোকুদুম। ইক্কে আহ্’রেল তার ঘরপাদা জাগা, ভূই বাগান আ সয়সম্পত্তি। ন’ মিলে কাম। গাবুর গরি খেদ। হাজার মাধানত ১ দিন কাম মিলেরেও ১ আরি ধানর ১০/১২বো বালা দিয়্যা পরে। তারা গিরিবোত আঘন ৫ জন। তিন্নো পুঅ আ তারা নেগে মোগে। পুঅ/ছউন এয কাম গরিবার বচ ন’ অয়। নাবালক। সে এক আরি ধান বালা দেদে ইন্দি ভাত ন’ থানা জু পেলে আলু কুরি কুরি খাবায়।
একদিনে আলু কুর’ যেনেই শান্দি বাহিনী ব্রেগত লুম্যা গোই ওল অনেই। তিনদিন সং ভাত নেই তারা ঘরত। তারা ঘর কুরে এক গিরি আঘে, সিবেও সেধক নেই। তারপরও তারা চিত পুরায় ধারে উদোরে কিঝু চালে দ্যে। মাত্তর, কানা খুমোত পানি কধক ধালানা। তেয়্য তারা আরাং খরাবিত্তুন ভাক দিয়্যা।
ব্রেগত লুমিনেই শান্দি বাহিনীউনে ধচ্ছোন। দরে গিরগিরার। তারে দাঘি নি দোলে গরি ভাত খাবেলাক। ভাত খেই তাত্তুন পুজোর গরন, কেনে ইধু এলে? ওল উয়োং বাবু। ঘরত ভাত নেই। এই আলু কুরি কুরি কনবাবত্যা পরান তোরের।
কন’ কোই দিবেগোই নিনা? না না না বাবু। কারে কোই দিদুং, তুমি আর আমি; আমি আর তুমি। এত্তে চলাত চোল পাচ কিজি, গামছা কানি এক্কান আ সুলুম এক্কো দিনেই অর্ধেক পদত থিলি দিলাক কয়েক জনে। (থিলি দিলাক মানে বাহে দিলাক)
এ ঘদনান গদি যিয়ে ২৯ নং ছোট মেরুং মুউজ বাজেই ছড়া আদামত। সে আদাম আগারেদি এল শান্দি বাহিনী ব্রেক। সক্যে সিয়োত কমান্ডার এল “কনা” (সুভেন বাবু, বাদি দলর কাম গচ্ছে শান্তি বাহিনী ভাক অনেই)। কধা কধে কনত বাজে সেনে তারে কনা দাগন।
কোন মন্তব্য নেই:
একটি মন্তব্য পোস্ট করুন