আক কধা: এ পিত্তিমী নাঙে গ্রহবোত পত্তিক বস্তুও নিজর সেদাম অন্য মঙ্গলত্যাই বিলেই দ্যুন। মোম বাত্তি সান নিজে আঙি পহ্’র সিদি দ্যুন চেরো পালা। এক্কো মানুচ পিত্তিমীত জনম অনার সমারে তা জীংকানিত নানাঙ কাম’ সমারে মিজি থান। এ মানেই কুলত এলে মানুচ দোল দোল কাম গরি নিজর নাঙ সিদি দিবার চান। তারার কাম’ গুনে বাজি থান বিজগর পাদাত। এ সভ্যতাত চাঙমা জাদর অঝাপাত, ভাচ, সাহিত্য, রিদিসুদোম ভালেদি এযানা পোইদ্যানে আমা সমাজর লেঘিয়্যা, কবি, সাহিত্যিক আ সমাচ ভালেদি কাম্মোউন অবদান আঘে। সেধক্যে এক্কো দাঙর, অজল, কাবিল, চাঙমা সাহিত্য আগাজত এক্কো ধকধক্যে বোম্বা, লেঘিয়ে, কবি আ গবেষক দাঙগু আনন্দ মোহন চাঙমা (আনন্দ ময়) জনম অয় ৮ জুলাই ১৯৫৭ ইংরেজি মিঙিনি চাগালাত বাঘাইছড়ি দুঅর নাঙে এক্কান আদামত। তা বাবা নাঙান চিত্রজিৎ চাঙমা আ মা’বো নাঙান রঞ্জিতা চাঙমা।
শিক্কে আমত (ঘর): জ্ঞানাংকুর বৌদ্ধ বিহার পালি টোল, উদল বাগান প্রাইমারি ইক্কুল, বাবুছড়া হাই ইক্কুল।
কাম জীবন: ২৮ মে ১৯৭৩ ইংরেজি ধনপাতা চন্দ্রমনি কার্বারী পাড়া স: প্রাইমারি ইক্কুল এজাল সাত্থুয়া ইজেবে সরিত অয়। পরে উদাল বাগান স: প্রাইমারি ইক্কুল, ২ নং বাঘাইছড়ি স: প্রাইমারি ইক্কুল আ শেজে চিত্রজিৎ-রঞ্জিতা স: প্রাইমারি ইক্কুলত্তুন ২০১২ ইংরেজিত সাত্থু (শিক্ষক) জীবন থুম গরে।
সমাচ ভালেদি কাম: বানা সাত্থু চাগুরিলোই মিজি ন’ থেই নানাঙ সমাচ ভালেদি কাম গরি যেয়্যা, যার নিআলঝি গরি। এ সমাচ ভালেদি কামত্যাই এক্কান থেঙ আহ্’রেনেয়্য তে ধঙে ন’ যেই চাঙমা জাদর এক্কোই দাঙর কিত্তে (উদাহরণ) অই আঘে।
১৯৯৪ সাল: নিজ’ আদামত “চাঙমা সাংস্কৃতিক গোষ্ঠী” নাঙে এক্কো চাঙমা সাহিত্য সংস্কৃতি জধা বানেয়্যা নিজ’ আওজে, জাদত্যাই, দেঝত্যাই কিঝু গরিবার। এ জধাবোত এয’ দাঙর কাবিল কাম্মো (পরিচালক) ইজেবে আঘে।
১৯৯৫ সাল: জুম্ম ফুল অনাথ আশ্রম থিদ’ গচ্ছে (হনচুকচুক্যা দিনমাধানত্যাই সিবে বন্ধ অই যিয়ে)।
২০০৫ সাল: উদল বাগান হাই ইক্কুলত ম্যানিজিং কমিতি জধানানু ইজেবে এয’ সং কাম গরি যার।
২০০৮ সাল: ২৬ জুলাই ইউএনডিপি সার্বিক ব্যবস্থাপনালোই বাংলাদেচ চাঙমা ভাষা পরিষদত গবেষক সাবাঙ্গী ইজেবে কাম গচ্ছে।
২০১২ সাল: ২০১২ সালত্তুন ধরি এব সং চিত্রজিৎ-রঞ্জিতা স: প্রাইমারি ইক্কুলত ম্যানিজিং কমিতি জধানানু ইজেবে কাম গরি যায় নিআলঝি গরি। আ সে বঝর ৪ জানুয়ারী নিজ’ আদামত “আনন্দ বাজার” নাঙে এক্কান বাজার থিদ’ গচ্ছে সমারে বজার’ জধানানু ইজেবে এয’ কাম গরি যার। আ দীঘিনালা পল্লী উন্নয়ন বোর্ড (বি আর ডি বি) আহ্’ঞ্জামে কেন্দ্রীয় সমবায় সমিতিত চেয়ারম্যান পদতয়্য এয’ সং আঘে।
২০১৩ সাল: দীঘিলানা নাট্যদলত সার্বিক তত্ববধায়ক ইজেবে কাম গরের।
২০১৫ সাল: প্রাথমিক আ গণশিক্ষা মন্ত্রনালয়র আহ্’ঞ্জামে নকবাচ গচ্ছে জাতীয় শিক্ষাক্রম আ পাঠ্যপুস্তক বোর্ড, বাংলাদেচ এ বহু ভাষিক মাতৃভাষার লেঘিয়্যা সাবাঙ্গী ইজেবে আঘে।
২০১৭ সাল: বাংলাদেঝর নিধুকতুক্যা জধা “চাঙমা সাহিত্য বাহ্’ত সল্লাদার ইজেবে নকবাচ অইয়ে।
শেজে কধা: পরাধীন জাদর সাহিত্য সংস্কৃতি জগত এক্কো বোম্বা ইজেবে বেগ’ আকমলিক অই মিঙিনি চাগালা নাঙ ফোতফোত্যা গরি রাঘেই সে অজল দাঙর বোম্বাবো জনম দিনত আমি তারে কিচ্ছু গরি ন’ পারির। জীংকানিত লাভ-
ক্ষতি তলবিচ ন’ গরি জাত্তোত্যাই দাঙগর রত্ন দি যেল’ সে এক্কো নাটক- “কার্পাচ্চোই সেপ খেলং- ১৭৮৫”(আগরতলা- ১২ ফ্রেব্রুয়ারি ১৯৯৪), “চাঙমা জাদর বিজক”(বুদ্ধ পূর্ণিমা- ২০ মে ১৯৯৬), আ চাঙমা লেঘা বাল্য শিক্কে- “পগোন পাদা”(১৩ এপ্রিল ২০০৬)।
আমি তা এ জীংকানিত্তুন ইআনয়্য শিক্কে পেই- দেচ্ছানত্তুন কন’ কিজু আঝা ন’ গরি দেঝত্যাই, জাদত্যাই কিঝু এক্কান গরিযানা। জীবনানরে দোল গরিবাত্যাই নিজ’ ভালেদ’ কধা ত্যাগ গরা পরে। সক্যে দোল এক্কান সমাজর মু দেঘে। শেজে চাঙমা সাহিত্য বাহ্’ তার ইয়োত লাম্বা আ কন’ অসুক - বিসুক ন’ ওক এ তবনা গরির।
কোন মন্তব্য নেই:
একটি মন্তব্য পোস্ট করুন