যুগান্তকারি এক বিজক আরগানি অহ্’ল ১৮৬০ খ্রি. ১ আগস্ট। সে দিন চাদিগাঙত্তুন মোন-মুড় চাগালাবোরে হিল চাদিগাঙ নাঙে এক্কো জেলা বানা অহ্’য়।
১৮৭৪ খ্রি. বিট্রিশ সরগারে যে নীতিমালা বানেয়্যা সে ধারামজিম দচ বঝর পর ১৮৮৪ খ্রি. আর’ নুঅ গরি Rulls for the temrritarial circle in the Chitagong Hill আরগানি মং সার্কেল নাঙে এক্কো বানেয়্যা। সে জেরে ৮ বঝর পর লে. গভর্নর ১৮৯২ খ্রি. আর সে আদেঝর বলে নুঅ শাসন চালু গরি হিল চাদিগাঙরে ৪বো সার্কেলে ভাক গরে। ১. চাঙমা সার্কেল, ২. মং সার্কেল, ৩. বোমাং সার্কেল ৪. সংরক্ষিত বনায়ন সার্কেল। সে বিধি বলে মিঙিনি চাগালাবো চাঙমা সার্কেলত সমে দ্যা।
আরনি-মারনি দ্বিয়ান গাঙত্তুন মিঙিনি গাঙ জনম অহ্’য়। ভুলংতলি মোনত্তুন আরনি আ তিবিরে রেজ্যর লংত্রাই মোনত্তুন মারনি গাঙ জনম অহ্’য়। ব্রিটিশ আমলত আরনি-মারনি দুঅর তলে শিলছড়ি চিগোন এক্কান গাঙ নাঙে এক্কান বাজার এল’। এ শিলছড়ি বাজার বাদেয়্য চাদারাছড়া নাঙে আরো এক্কান বাজার এল’ ভিলে খবর পা যায়। ইরুক এ দ্বিয়ান বাজার নেই। তবে নাড়েইছড়ি নাঙে এক্কান বাজার আঘে। এ বাজারান কায় এক্কান সরকারি প্রাইমারি ইক্কুল (১৯৬০) আ এক্কান জুনিয়র ইক্কুল (২০২০) আঘে।
এ মিঙিনি চাগালা রিজেভ (সংরক্ষিত বনায়ন) ১৯০৫ সালত্তুন ধুরি জুম খেবাত্যাই খুলি দিয়্যা অহ্’য়। পরে ১৯০৯ সালত আর’ নুঅ গরি রিজেভ রাঘেবার আদেচ দিয়্যা অহ্’য়। মিঙিনি রিজেভ খুলি দেনা পর ইধু মানুচ পরং এযন। চাঙমাউনর জুম অহ্’লদে জিংকানি তোড়েবার নিধুকতুক্যা কাম। তারা ভূই এদক আওচ ন’ গরন। জুমত্তুন বেক্কানি পায়। জুমানরে বাজার’ লগে তুলনা গরন। আগাপ ভূই খেবাত্যা তারা মিঙিনি চাগালাত ঘর বানিলাক ভিলে বিজগে কয়। 
২০০৩ সালত মর এক্কান লেঘা “নাড়েইছড়িত ঘর বানিম” (এ লেঘান হার্ডডিক্স বজং অহ্’নার আহ্’জি গেল) । পার্বত্য চুক্তি পর সরগারে যক্যে চুক্তি বাস্তবায়ন নিনেই তালিমালি গরের সক্যে এ লেঘান লিঘিলুং। চুক্তি লেঘা আঘে হিল থিদ’ গরি যারা এলাক তারারে নিনেই ভোটার তালিকা গরি জেলা পরিষদর নির্বাচন গরানা। মাত্তর দুঘ’ কধা সিয়ান ন’ গরি মুরে মুরে বাঙাল আর সমেদের। আন্দার রেদোত গাড়ি থিয়ে বাঙাল আনি খাগাড়াছড়ি, রাঙামাত্যা, বান্দরবান জেলা বর পধ পাজারে পাজারে বোজে দের। দিন দিন মানুচ বারি যাদন। ঝারানি অই যার ঝগলা। ছড়ানি অই যার সাঝা। জুমত’ ন’ পায় ঘচ্যা-সুদ’, ধান, মরিচ, বেগুন, আলু-কুচু, মেইয়্যাশাক, কুমুরো, শুগুরিগুল, মামরা, চিন্ডিরে। ছড়ানিত ন’ মিলের নাড়েইমাছ, ইজে, কাঙারা, মই কাঙারা, গাল্লো শামুক, শামুক কিচ্ছু ন’ মিলে। মর বিশ্চেচ এল’ এ নাড়েইছড়িত সে দরপ্পানি বেক তজিমপুর গরি পা যেব আ নিপিরভা গরি জিংকানি তোড়ে দি পারিম।
মাত্তর! গেল্লে ২৭ আগস্ট ২০২৪ খ্রি. নাড়েই ছড়িত ত্রাণ দিয়্যা গেলে দ্বি চোঘে পত্থম দেঘা অহ্’য় সে সবনর নাড়েইছড়িলোই। যেধেক্যে গরি মর দ্বি চোঘে ভাজিদ’ নাড়েইছড়ি সে ধেক্যে ন’ পেলুং। আহ্’রুং-কারুং আম’ বরা চুজ্যে মুই অই আঘে সানেচিক্যে ভরন-পিরন নাড়েইছড়ি। মর আওচ্ছান আর আগ’ সান নেই, সিধু ঘর বানিবার। খবর পেলুং এ অক্তও তারা ৫ কেজি চোল, এ পাবা তেল, এক পাবা আহ্’চ্চো পাদা, আধা কেজি শুগর হেরা ……… কিনানা এ ধক্যে এক্কান সুদোম দিয়্যা অহ্’য়ে। সে বারা বাজার গরিলে জরিবানা সুমুত্ত সেজা খা পরে। মনে অহ্’ল ১৯৮৬ সালত এয’ আঘি। মাত্তর, ১৯৮৬ সাল আ ২০২৪ সাল ৩৮ বঝর ফারক। ইয়ান আর’ বেচ দুক লাগিল সে সুদোময়ান যুনি জাত ভেইয়্যা দিলে। ৮৬ সালত বেজাদর এধক্যে তচ্যা খেই খেই দাঙর অই এলং। এ অক্তত যুনি সে জাত ভেইয়ে সে কামান গরন সালেন দুক্খান বেচ লাঘে। চিদত ঘা অহ্’য়। কলিজে আহ্’ঙি যায়।
গম নেই নাড়েইছড়ি। গম নেই মিঙিনি। মিঙিনি নালে বেই ভাজি এযে আহ্’ভিল্যাচ। যুনি দাঘে কয়, “ভাদ’ মাচ এলে ক’বোয়া গিরে।” মিঙিনি এ্যাদে বামান সেটেলার বাঙাল দঙলে আ উগুরেদি বামত জাদর বেজাদর রাজনীতি দঝাত ……………..। নাড়েইছড়ি একজনর বোদর ভাড়া পড়ে ৫০০ তেঙা (এযানা-যানা)। এ ৫০০ তেঙা খরচ গরি তে যুনি বানা ৫ কেজি চোল, এক পাবা সিদোল ……………. সুদোম বানে দিয়্যা অহ্’য় সালেন বাজি থানা কিঙিরি বা মুইও ঘর বানিম কেনে?
লেঘান পুর: ২৭ আগস্ট ২০২৪ খ্রি.
কোন মন্তব্য নেই:
একটি মন্তব্য পোস্ট করুন