জুম্ম দালাল: তিন সাংসদ

 

জুম্ম দালাল: তিন সাংসদ

হে ইরুক পিড়ি/বর্তমান প্রজন্ম. বিজগে কয়, যুগে যুগে কালে কালে পত্তিক জাদত মীরজাফর থান। তারারে তোমার চিনা পরিব’। তারা অনুসুর নুঅ ধগে নুঅ রঙে কায় থেই তারার নিজ’ স্বার্থয়ান লুদি নেযাদে ভুল ন’ গরন। তারারে আমাত্তুন খামাক্কায় চিনা পরিব।

দীপঙ্কর তালুকদার: ২০০৮ সাল নির্বাচন আওয়ামী লীগ জয় অয়। দীপঙ্কর তালুকদার পার্বত্য চট্টগ্রাম বিষয়ক মন্ত্রণালয়’ কাম পায়। তে পার্বত্য চুক্তি বাস্তবায়ন ওক এ কাম গচ্ছে ভিলে মনে ন’ অয়। বেগত্তুন বেচ লাজর কধা, ঘিন গরে পা এক্কান কাম গচ্ছে। ২০১০ সালত তার মন্ত্রণালয়ত্তুন পার্বত্য চট্টগ্রামর আদিবাসীউনরে “আদিবাসী” ইজেবে ন’ লিঘিবার অন্য মন্ত্রণালয়ত এক্কান চিদি দিনেই সল্লা দিয়্যা। ২০১১ সালত ১১ আগস্ট রাঙামাত্যা রাঙামাটি কাউখালী উপজেলা সদরত জুগলিয়ে তেম্মাং খলাবোত কল, আদিবাসী পোইদ্যানে পিত্তিমি দেঝে দেঝে এক্কুই ভেজাল মিজি আঘে। অথচ সে দেঝর আদিবাসী ভেজালানিত রভা গরানা কাম ন’ গরি বানা বাংলাদেঝর পার্বত্য চট্টগ্রাম নিনেই জাতিসংঘ এক্কো ফোরাম অমকদ’ আওঝি অহ্’নার রহস্যজনক। জাতিসংঘ এ রহস্যজনকত্যাই পার্বত্য চট্টগ্রামত অশান্দি তুবোল বেই যায়। যা কন’ দেচপ্রেত্যাই মানেই লগে ইয়ান ন’ চান।

বীর বাহাদুর উশৈসিং : বীর বাহাদুর উশৈসিং গেল্লে ২৩/২৪ বঝর সং বান্দরবান জেলা সাংসদ। পার্বত্য চট্টগ্রাম বিষয়ক মন্ত্রণালয়সুমুত্ত নানান কাম পায়। মাত্তর, চুক্তি পর বান্দরবান জেলাত আজার আজার একর বন্দবিস্তি আ আদিবাসী জাগানি জমি সেটেলার বাঙালে বলা জোরে দঙল গরং আ লিজ নিনেই বানা ঘরভিদেত্তুন ধাবে দেনা নয়, বান্দবান ফেলে মিয়ানমারতও যেই পিয়োন আ অনেগে অন্য জাগাত পরং যেই অহ্’ন’ বাবত্যাই জিংকানি তোড়াদন। এ পোইদ্যানে বীর বাহাদুরত্তুন কাপেং ফাউন্ডেশনে পুজোর গরিলে দীপঙ্কস্যা কল, “ইয়ানি এক্কা-উক্কু ব্যাপার, সেধক্যে কিচ্ছু নয়।”

কুজেন্দ্র ত্রিপুরা: কুজেন্দ্র ত্রিপুরারে খাগাড়াছড়ি বর তিবুজ্যা আ মিলে চুরা কলে বেগে চিনন। এ বর তিবুজ্যা মিলে চুরা কলে তা পোইদ্যানে আর কি কবার আঘে। তে বানা সাংসদ অহ্’নার নয় জেলা পরিষদত থাক্কেত্তুন ধুরি খাগাড়াছড়ি শিক্ষা ব্যবস্থা ভাচ নিঘেই দিয়্যা। এমপি অহ্’নর পর পর আর বেচ ভারি যিয়ে। বর তিবুজ্যা এল’ ভারত প্রত্যাগত উপজাতীয় শরণার্থী প্রত্যাবাসন ও পুনর্বাসন এবং অভ্যন্তরীণ উদ্বাস্তু নির্দিষ্টকরণ ও পুনর্বাসন সম্পর্কিত টাস্কফোর্সের চেয়ারম্যান, পার্বত্য চট্টগ্রাম বিষয়ক মন্ত্রণালয়সুমুত্ত নানা দায়িত্ব।

গেল্লে ২৬ মে ২০২২ খ্রি. পুলিশ লাইন্সে ১৮ এপিবিএন রাঙ্গামাটি, ১৯ এপিবিএন বান্দরবান আ ২০ এপিবিএন খাগড়াছড়ির সদর দপ্তর আ ডিআইজি, এপিবিএন (পার্বত্য জেলাসমূহ) এ কার্যালয়র ভিত্তিপ্রস্তর স্থাপন গরানা খলাবোত কুজেন্দ্র তিবুজ্যা কল, “পার্বত্য চট্টগ্রাম এয’ অভেদর জাগা, খিলে ভূই আঘে যা সেটেলার বাঙালুন পুনর্বাসন গরা যেব’।”

ইরুক পিড়ি, দিঘিলং তারার কারবারানি। তারারে এক অক্তত ফুলে পাগোরে পুজিলং। তারা রেং মনে ন’ কলেও দি পেলং। মুঝুঙর দিনত যেন এধক্যে ন’ অয় সিয়ান সজাগে থেবং। জাত্তোরে তারা কম্ভা লেং গরি গেলাক। ইয়ান যেন বেগর বুগত ইধোত থায়।