 |
| দাঙগুবি শ্রেয়সী |
শ্রেয়সী চাঙমা (ফগদাঙি আ সিদানা কাবিদ্যাঙ, চাঙমা সাহিত্য বা, গরা কমিতি) তার এক্খান কধা মর খুউব বুক ভরি যিয়ে, মুরি গেল’ তিরোচ। গেল্লে কেল্যা মালছড়ি কলেজত তিন মাজ্যা চাঙমা লেঘা সার্টিফিকেচ কোর্স ফগদাঙি অক্ত খলা পজ্জোনীত তে কোইয়ে, “যারা জাত্তোরে কোচপান তারারে চাঙমা লেঘা শিঘানা কুজোলী গরা ন’ পরে।” আর কোইয়ে, “এচ্যে মার্চ মাস ২ তারিক ২০১৮ ইংরেজি। ইবে এক্কো মাস যে মাজত গাজ’ পাদা ঝুড়ি যায় আ মোন-মুড়ত গাজে গাজে নানাঙ ফুল ফুদি পিত্থিমীআন রাঙেয়্যন। কু-কু কোকিল’ র’ নানাঙ পেইক’ র’য়ে ভরি উত্তে এধক্যে এক অক্তত এচ্যা চাঙমা লেঘা সার্টিফিকেট কোর্স ফগদাঙি কধ যার। এই দিন্নু আমি, তুমি, এচ্যে যারা ইয়োত সাতকাম পেলে সরিত অইয়েই এ কলেজত তমারে ঈদোত গাদে রাঘেব’ বিজক’ পাদা।”
মুইয়্য তা কধা সুদ নাল আহদে কোম, ও বাপ-ভেই, মা-বোন লক, গোদা পিত্তিমীআন মুজুঙে আক্কোই যার, নিজ’ ভাচ, ওক্কোর, সাহিত্য-সংস্কৃতিলোই। বানা আমি পর ভাচ, ওক্কোর, সাহিত্য, সংস্কৃতিলোই লুধুপুধু অই আঘি। আঘি জাত ভেইয়ে রুগরুগ্যা গরি; কেনা বানি ন’ রাঘেই মন খুল’ মেলা গরি বোই কধা বাত্তায় সংমিলনিত আমনর সাহিত্য সংস্কৃতিলোই উজে যেই। ভালেদি আ এজাল এই দ্বি’আন সং অহলে আমি আমা সবন - আঝা বেক পুরে পারিবং। এচ্যে দেঘর, আমা জাত ভেই-বোনুন কুধু পুরি আঘন? যক্যে হিলর ভিদিরে যেবং সক্যে দিঘি জাত্তো কত্তমান লেম পরি আঘে? নেই লেঘা পড়া। ১২-১৪ বয়স অহরে বো দেদন, লদন মোক। এচ্যে মেরুং যেনেই শুনিলুঙ, ক্লাশ সেভেনত পর্বোয়া এক্কো পুঅলাই এক্কো মিলে বো উত্তেগি। আ এক জন বিচের অহর, মদ খেই তা ঘরান আগুন বাজেই দিয়্যা; তার বিচের। এধক্যে ঘটনা বানা এচ্যে নয়।
 |
| চাঙমা লেঘা কোর্স ফগদাঙ গরের দাঙগু সুসময় চাঙমা |
সালেন আমি কুধু পরি আঘি ইত্তুন অনুমান গরি পারির। সেনে আমাত্তুন কাম গরিবার বহুত কাম পরি আঘে। জাত ভেইয়ে রেনা রেনি গরি থেলে অন কাম গরি ন’ পারিবং। মুই বিশ্চেস গরঙ, এই কুলি যুগতয়্য সে সত্য যুগর রাম, মহাভারতর অর্জুন আঘন। তারা নিজ’ কধা ন’ ভাবি, বুড় মা-বাপর কধা চিন্তে ন’ গরি বানা সমাজর কধা, জাদর কধা ভাবি, জাত্তোত্যাই, সমাচ বারেদিত্যাই অনসুর লারেই গরি যাদন। এচ্যে তারা বেন্যা আনুনি-নুনচো ভাত খেই গোদা দিন্নু উবোচ আহবাচ কাম গরিবার গরি যাদন।
সালেন, এচ্যে যারা জাদর রাজনীতি দলুন আঘন, তারা যুনি তারারে এক্কা রিনি চেলে, এজাল দিলে তারা খামাক্কাই জাদর ভাচ, ওক্কোর, সাহিত্য সংস্কৃতি থিদব্বর গরি পারিবাক। গাজ’ পাদা ঝুড়ি যেব আর নুয়ো গরি কোর উদিব, গাজে গাজে ফুল ফুদি ঝাক ঝাক নুয়ো নুয়ো গাচ উদিবাক। সক্যে হিলচাদেগাঙ এ্যাইলে সাজিব’।সে পুরোন’ রীদিসুদোম ফেলে মিলে-মরদে মিলি জুলি সংসমারে বাকত লামি পারল্লে দোল এক্কান সমাচ থিদব্বর অহব।
