সনমজ্যা ভাঙি যানা কধা (অনুভূতি ব্যক্ত): চাঙমা সাহিত্য বাহ্ ১৯ বঝরর ঈয়োত অদে বুঝি পাচ্যে আজলে
চাঙমাউনর খরত জনম অনার তার স্বার্থকতা অয়ে। যিক্যে গরি শুদ্ধ ধনর ঘরত সিদ্ধার্থ জনম স্বার্থক অল’
গেল্লে কেল্যা ১৫ মার্চ ২০১৯খ্রিঃ বাংলা চোত মাচ ১ তারিক। বৈশালী অনুত্তর এক যধা যুব পরিষদ (বায়েপ) এ সিজি সাত বারর জনমপুর এ পোইদ্যানে দাঙর এক্কান কেজ্জো অই যেল’। এ কেজ্জোআন’ ফুল বারেঙ সাজেলাক- বায়েপ’র নুয়ো কমিতি বানানা, গুণীজনউনরে মান গোজানা, তেম্মাখলা আ সাংস্কৃতি ফাংশান্নোই। বেন্যা ১০ টাত্তুন ধরি কেজ্জোআন আরগানি অই বেল ধুবন্দি সলাত থুম গরা অয়ে।
ফাংশানানত বায়েপ’র জধানানু দাঙগু সুহেন জ্যোতি চাঙমা খলানানু অই কধা পজ্জোনী দাঙগু কিংসুক চাঙমা পিন্টু বেল্যা মাধান তেম্মাখলা, গুণীউনরে মান গজানা আ সাংস্কৃতিক কেজ্জো আন আরগানি অয়ে। ইয়োত নকবাচ্যা গরবা এল’ ভেইবোনছড়া ইউনিয়ন চেয়ারম্যান দাঙগু পরিমল ত্রিপুরা আ মলুক গরবা ইজেবে যারা এলাক- ভাই বোনছড়া মিলেনিয়াম হাই ইক্কুলক বেগ’ দাঙর সাত্থুয়া (প্রধান শিক্ষক) দাঙগু টাটু মণি চাঙমা, মুণিগ্রাম হাই ইক্কলর দাঙর সাত্থুয়া দাঙগু শ্যামল মিত্র চাঙমা, মিশ্র ফল চাষে জাতীয় পর্যায়ে সোনা পদক পিয়ে দাঙগু সুজন চাঙমা, মাকস এজাল জধানানু দাঙগু শান্তি ময় চাঙমা, বৈশালী নগর উপাসিকা দাঙগুবি কালোসোনা চাঙমাদাগী।
কধা আঘে- “সু দিনত পুয়ো ওক, দেঝত সোনা ওক।” এ কধা ইধোত তুলি চাঙমা রিদি সুদোম আনি তুজিমপুর’ গরি আ চাঙমা আর্কাইভ সেন্টার থিদ’ গরি চাঙমা সাহিত্যরে বিশ্ব সাহিত্য বানানা, মা, মা-মেদেনি(মাতুভূমি) আ মা-ভাচ (মাতৃভাষা) ধুরি রাঘান দাঙর একান সবন দেঘি ২০০১ সালত “চাঙমা সাহিত্য বাহ্” জনম অয়ে ঢাকা ইউনির্ভাসিটি ক্যাম্পাসত। যারা এধক্যে এক্কান দোল সবন বুগত বানি চাঙমা সাহিত্য বাহ্’রে জনম দিলাক তারা মুই এ মাধানত এন্যাই ইধোত তুলঙর। অম’কধ’ গরি ইধোত তুলঙ বেচ, তারা অলাক্যা ভজমান দাঙগু দেবপ্রিয় চাঙমা আ দাঙগু কৃতি চাঙমা (ইংলিশ প্রভাষক, খাগড়াছড়ি মহিলা সরকারি কলেজ) দাঘীরে। সে সমারে তারারে ইধোত ন’ তুলি থেই ন’ পাঙর যারা এচ্যে চাঙমা জাত্তোত্যাই দাঙর এক্কান পাওত্তি (অর্জন) পেই দিলাক তারারে। পর্বোয়ালক, হয়দ’ পড়দে এক্কা সময় লাগি পারে তুয়্য লিঘি পাঙর তারা নাঙানি। তারা অলাক্কে যারা চাঙমা সাহিত্য বাহ্ বাবদা তলে থেনেই ঘরর সাত কাম ফেলে, বুরো মা-বাপ আ ঘরগরনিরে সময় ন’ দিন্যাই বানা জাদ’ কধা ভাবি এগা চিত্তে, এগা মনে কাম গরি যাদন তারারে। সে দাঙগু এলিয়েন চাঙমা, দাগুবী শ্রেয়সী চাঙমা, দাঙগু পরেশ চাঙমা, প্রিয়সী চাঙমা, দাঙগু সম্বুমিত্র চাঙমা, দাঙগু সোনামুণি চাঙমা, দাঙগু প্রকাশ চাঙমা, দাঙগুবি স্বর্ণা চাঙমা, দাঙগুবি লুসি চাঙমা সমুত্তু যারা চাঙমা সাহিত্য বাহ্ সাবাঙ্গী আ চাঙমা সাহিত্য পত্রিকা এওজি (প্রতিনিধি) উনরে (বেক্কুনর নাঙ লিঘিলে লাম্বা অভ’ সেনে ন’ লিঘিলুঙ, বানা বুগত সুন্দুগত রাঘেই দিলুঙ। সিত্যাই তারারে সঅহ্’ল – মঅহ্’ল গরিবাত্যাই তুদি গরঙর)। যারা ধনর এজাল আ মনর এজাল দি এত্তন তারা ইদোত তুলি তুলি পাত্তুরুতুরু আ ঝু ঝু গজারঙর।
এচ্যে এধক্যে এক্কো দিন’- যে দিনত হু হু কোগিল’ র’বে ভরি উদিবার দিন’ রাধামন ধনপুদি, ননাধন, ননাবি, চান্দবি- নোয়ারাম দাগী তারার সাঙ্গ-পাঙ্গউনরে নিনেই চিঙে, দুধুুক, খেংগরঙ র’য়ে উব’ গীদে ভরি তুলি বার দিন। কিত্তেই কয়েক দিন পর বিঝু। মাত্তর! সে উচ্চো নেই, নেই তামাজা। ছড়া-ছড়িত পানি ন’ গঙাই, গঙে যায় মা-বোনর চোগ’ পানি বাপ-ভেইয়োর লো। ইক্যে বেক থ’ অই যিয়ে। আঘে বানা এক বুক আভিল্যাচ।
ও মা-বোন লক! এ দেঝত একদিন ঝার তারুম এল’, এ্যাইল মোন- মুড়ো গাচ - বাজে তারুমত নানাঙ রঙর ফুল মিদে মিদে বোইয়েত দুলি দুলি থেদাক। সে ফুল’ তম্বাজে মিজি থেদ’ হিল চাদিগাঙ। পত্তাপত্তি, ভমরাসমুত্তু নানাঙ পুঘে সে ফুলর তুম্বাজে আহ্’ল-পাগল অই এ ফুলত্তুন ওফুলত মন সুগে চিদ’ সুগে উড়ি ঘুড়ি বেরেহ্দাক। বুগদত্তুন ছাগি তুল্লে কোচপানালোই মিজি থেদাক এ দেঝর বেল ছদগে আ বোইয়ের সমারে। এ দিনুন জাগি তুলিবাত্তে, দাঙর - অজল সবন নিনেই নুদি মিলে সান সাজি আঘে সে ঘঙদা দিয়্যা চেঙে গাঙত ১৫ মার্চ ২০১১ খ্রিঃ জনম অহ্’ল’ “বৈশালী অনুত্তর এক যদা পরিষদ। তার সাত পল্লা জনম দিনত কয়েক জন গুনী সমারে চাঙমা সাহিত্য বাহ্রেও চাঙমা ভাচ, ওক্কোর আ সাহিত্য কাম গরানাত্যাই মান দিলাক।
সিত্যাই চাঙমা সাহিত্য বাহ্’ তার সনমজ্যা ভাঙি যানা কধা কধ’ চাই- “গোজেন লামাত আঘে, পর্বোয়া পন্ডিত যে দেঝে জনম ওদুঙগোই সে দেঝে”। চাঙমা সাহিত্য বাহ্ ১৯ বঝরর ঈয়োত অদে বুঝি পাচ্যে আজলে চাঙমাউনর খরত জনম অনার তার স্বার্থকতা অয়ে। যিক্যে গরি শুদ্ধ ধনর ঘরত সিদ্ধার্থ জনম স্বার্থক অল’। এচ্যে হিলচাদিগাঙ সমুত্তু গোদা পিত্তিমিআন রাবন রাজা রাজত্ত গরের। এ বারণ রাজা ভচ নেযাদে বানা রাম জনম ন’ অয়। জনম আলক, লক্কন, সিতা, হনুমান সান দাঙর দাঙর কজাল (বীর)। থিক এচ্যে হিলচাদিগাঙত রাম, লক্কন, .. .. .. .. .. সান্যা এ জধাউন (বায়েপ, চাসাবা, উন্মেষ, জুবদা, মাকস, পাত্রাফা), আহ্’দে পাদালে কাম গরি যেই পাল্লে হিলত বুগত এক দিন বেন্যা রাঙা বেল উদিব’।
৬ মার্চ ২০১৯ খ্রিঃ, বাংলা ২ চোত মাচ।
৭ গুণীকে সম্মাননা স্মারক তুলি দিয়্যা অয়ে:
১. সমাজ সংস্কার, ধর্মীয় পরিবেশ সৃষ্টিতে অসামান্য অবদানের জন্য ইঅণঊচ এর প্রতিষ্ঠাতা শ্রীমৎ সত্য প্রিয় ভান্তেকে ' সম্মাননা'। পক্ষে গ্রহণ করেন মিস লীলা চাকমা, বৈশালী নগর বন কুটির উপাসিকা পরিষদের অর্থ সম্পাদক।
২. মানবিকতায় অসামান্য অবদানের জন্য পার্বত্য জেলার স্বনামধন্য সংগঠন 'উন্মেষ' কে সম্মাননা'। পক্ষে গ্রহণ করেন উন্মেষ' এর সাধারণ সম্পাদক বাবু বিটন চাকমা।
৩. চাকমা ভাষায় অসামান্য অবদানের জন্য। চাঙমা সাহিত্য বাহ্'কে 'সম্মাননা'। পক্ষে গ্রহণ করেন- বাবু ইনজেব চাকমা, এলিয়েন্স চাঙমা, পরেশ চাঙমা, প্রিয়সী চাঙমা।
৪. চাকমা সাহিত্যে অসামান্য অবদানের জন্য লেখক ও কবি বাবু আলোময় চাকমা' কে সম্মাননা'।
৫. শিক্ষাক্ষেত্রে অসামান্য অবদানের জন্য মিজ্ সুমনা চাকমা' কে সম্মাননা'।
৬. ধর্মীয় পৃষ্ঠপোষকতায় অসামান্য অবদানের জন্য বাবু অজিত বরন চাকমা'কে সম্মাননা।
৭. সমাজসেবায় অসামান্য অবদানের জন্য বাবু কান্তি লাল দেওয়ান'কে সম্মাননা' দেওয়া হয়।
