“দাঙগু কৃষ্ণ কিশোর চাঙমার হিজু কধা”

যে মানুচ ও হিল ট্রাক্স’ওত বুগ’ত লেগাপড়া শিঘানার বোম্বাবো বেগ পল্লেদি জ্বালেয়্যা,অজ্ঞান আন্ধার ধুর গরিবাত্তে শিকখের পহর চের কিত্তেনদি সিদি দিবাত্তে কম গচ্ছে তে অলদে কৃষ্ণ কিশোর চাঙমা | বারি দুগোর কধা অলদে আমা নুও যুগর মানুচউনে বেচ ভাগ তারে এজ ন’ চিনোন | তারে বেক্কুনে চিনেবার ধারাজে মুই কিজু লেঘিবার চেচ্টা গরিলুং | কৃষ্ণ কিশোর চাঙমা তে জনম লোয়ে ১৮৯৫ সালত ১৪ই জুলাই রাঙামাত্যা জেলার নানিয়ারচর উপজেলাত হেরেতকাবা মোনতলা আদামত | তা মা নাঙান অলদে সুন্দরবি চাঙমা তা বাবো নাঙান অলদে চান্যমুনি চাঙমা | তে এলদে বেগ দাঙর পোঅ, চিত্ত কিশোর চাঙমা ও হরকিশোর চাঙমা নাঙে তা তলেদি আর দি ভেই এলাক | তারা মা বাপউনে খুউব শিক্ষে গমপেয়ে মানুষ এলাক | এ সেনত্তে অগুর আদাম সেরে তেলে ও বেক্কুনে বড় বড় লেঘাপড়া সিগি পাচ্ছন | কৃষ্ণ কিশোরে ১৯১৯ সালত চাদিগাং কলেজত্তুন বিএ পাস গচ্ছে | ১৯২০ সালত তে হিল ট্রাক্স’অত শিক্ষে বিভাগত সাব ইন্সপেক্টর ইজেবে তা চাগরি গরানা জিংহানি পগদাং গচ্ছে | জুম্ম জাত্তোরে উজে নেজেবাত্তে শিক্ষে’আন আত্তের ইজেবে লারচার গরিবার ধারাজে গদা জিংহানিআন নে আলসি গরি তে হাম গুরি যেয়ে | সেক্কে দিনোত গাড়িগরা,মোটরবোট ইয়ানি ন এল এ সেনত্তে দুরত এজানা যানা হুব দুগোর এল | স্কুল কলেজআনি এলদে মেইল তিগে মেইল দুরোত | এ সেনত্তে সেক্কে দিনো বাপ,মা উনে হারাক্কাই লেগাপড়া শিগে বার ন সেদাক | সিয়ান ছাড়াও সেক্ষে যুগত রাজার শাসন আমলত রাজবংশীয় দেওয়ান,তালুকদার,খীসা এ উজুবংশ মানুষউন বাদে সাধারণ মানুষউনোর লেঘাপড়ানা আন উজুবংশ মানুষউনে গম চোগে ন সেদাক | কৃষ্ণ কিশোর চাঙ্গমা’লগে তারা গদা গোরবো’বো এ অন্যেই হামানি,রাজবংশীয় শাসনশোষণ’অর বিরুদ্ধে আঙ্গুল তুলিনে হদা হইওন | কৃষ্ণ কিশোরে স্কুলয়ে পোউনোর মা বাপ উনোরে তারা পোছাবাগুন স্কুলত পাদেবাত্তে পরামর্শ দেনা , স্কুলআনিত্তে সরকারি অনুদানর ব্যবস্থা গরি দেনা , স্কুলত ছাত্র তগেই দেনা ,নুও মাস্টরউনোরে চাগরি দেনা,টালেন্টপুল ইস্কুল্যে পোগুনত্তে বৃত্তি ,স্টাপিন্ড যুগোল গরি দেনা,উচ্চশিক্ষে লভার সুযোগ গরি দেনা এ হামানি গদা জনমান গরি যেয়ে | সাব ইন্সপেক্টর এলদে অক্তত তে মাঝেমধ্যে সাইকেল’লই যেই,দুরত পথ আদিনে শিক্ষে’র পহর ছিদি দেনার হাম গরি যেয়ে | তে পত্তম হিলট্রাক্সত ইংরেজি শিগানা চালু গচ্ছে | ১৯২২ সালত মগবান ইউপি স্কুল ও সুবলং ইউপি স্কুল,খাগড়াছড়ি ইউপি স্কুল আনি বানাদে ও তুলোদে তে নিজেআদে বল দে | সিয়ানি ছাড়া ও ১৯২৩ সালত মহাপ্রুম এমই স্কুল, রামগড় এমই স্কুল, পানছড়ি এমই স্কুল, দিঘীনালা এমই স্কুল এবং তুলাবান এমই স্কুল এ স্কুলানি বানাদে তে যে সাহায্যআনি গচ্ছে সেনত্তে তা নাঙ্গান সে স্কুলআনি যেদক দিন তেব সেদক দিন পুরি ফেলেই ন পারিবাক | কৃষ্ণকিশোর ও তা আমলত জুম্মউনে যে শিক্ষে আন্দোলন শুরু গজচ্ছোন সিয়েন যুগযুগ ধরি প্রজন্ম বেধে এজ চলের | তারা দেগে যেয়ে পদনদি আদিনেই এজচে চাঙ্গমা জাত্তো ইদ্দুর শিক্ষিত ওয়ে | গত হয়েক বজর আগ সরকারি জরিপ অনুসারে চাঙ্গমা জাত্তো ৭০ ভাগত্তুন বেজ শিক্ষিত | ইদ্দুর পদ এই পাড়ানার পিচ্ছেন্দি তার অবদান বেগত্তুন বেজ দাঙ্গর | ইয়োত এক্ষান হদা তুলি ধরানা উচিত সিয়ান অলদে মুলত কৃষ্ণ কিশোর চাঙ্গমা তার জিংহানির বেজভাগ সময় রাঙ্গামাত্তে হাদেয়ে আর জুম্মউনোর মধ্যে রাঙ্গামাত্তে বেজ চাঙ্গমা তেদাক এ সেনত্তে চাঙ্গমা’উনে বেজ তার হামোর উপকার পেয়োন | সে লগে লগে যে মারমা,ত্রিপুরাউন এলাক তারা ও শিক্ষের বেল ছদক পেয়োন | তঞ্চঙ্গ্যা, বম, খুমি, পাংখোয়া, খ্যাং, লুসাই, মুরুং ও চাক,যে জাদ মানুষউনে আর গভীন জারত তেদাক এ সেনত্তে তারা ইদু শিক্ষের পহর লুঙ্গদে আর বেজ সময় লাক্কে | সিয়ান ছাড়া ও চাঙ্গমাউনো হদা ভাষআনিলোই তারা ইয়ানি ন মিজানার কারনে ও তারা ইদু শিক্ষে পহরআন লুঙ্গদেগোই হুব সময় লাক্কে | কৃষ্ণ কিশোরে যে শিক্ষে বোম্বাবো জ্বালে দি যেয়ে তার মরানার পরেনদি মোনঘর স্কুলআনে হিলট্রাক্স’অ তিনজেলার জুমজাদোর বেগ জাদউনো ইদু সে শিক্ষে পহর আন আর বেস গরি সিদি দে দে হাম গচ্ছে…এবং এজ গরি যার | নানাবাবত্ত্যে কুসংস্কার ও হারাপ রিদিসুদোমানি দূর গরদে ও কৃষ্ণকিশোর চাঙ্গমার যথেষ্ট হাম গরি যেয়ে | দুগোর হদা অলদে জুম্মউনোর শিক্ষে ছড়ে দিয়ে বাত্তিবো মাত্র ঊনচল্লিশ বছর বয়সে ১৯৩৫ সালত তে মারা পজ্জে | হিলট্রাক্সত পার্বত্য চুক্তি সই অনার পরেদি পার্বত্য চট্টগ্রাম জেলা পরিষদে শিক্ষে ছড়ে দেনাত বিশেষ অবদান রাগানার হারণে ২০০১ সালত কৃষ্ণ কিশোর চাঙ্গমারে মরোণত্তর সন্মাননা দে …| এজ আমি বেক্কুনে এ বিরেট মনর মানুষঅরে শ্রদ্ধা গরিনে সিদত্তুন জু জু জানেই | তা দেগে যেয়ে পদেনদি আদিনেই,জুম্ম জাত্তরে চের হিত্তেনদি উজে নেজেই | জুম্ম জাদর জয় ওক …|

কপি: Published by© Ampition chakma