আমি কি আমা ভাচ ওক্কোর শিঘানা পোইদ্যানে সচেদন? কাত: দাঙগু ইনজেব চাঙমা
চাঙমা জাত্তোসান পরাকবাল্যা জাত সংসারত আর আঘন নিনা মুই খবর ন’ পাঙ। যারাত্তুন ভাচ ওক্কোর থানার পরয়্য পর ভাচ্ছোই সাহিত্য চচযা গরন- নিজর ভাচ ওক্কোর লারছার ন’ গরন। অন্য কিত্তেদি চেলে চাঙমা জাত্তো সান বর কবাল্যা এ পিত্তিমী নাঙে গ্রহবোত আর কন’ জাত নেই। কি ন’ এল’ তারার? ধর্মআন বৌদ্ধ ধর্ম। যার সুদোম অহিংসা পরম ধর্ম। রাধামন এল পিত্তিমীত দাঙর কজাল (বীর), বিজয় গিরি এল’ পিত্তিমী পৈনাঙি রাজা, এল’ রেয্য, ভাচ, ওক্কোর, সাহিত্য, সংস্কৃতি আ শিক্কে দীক্কে। বেগত্তুন বেচ যিয়েন এল’ সিআন অলদে লোবিয়ত। এক্কো ফিরিং সাত ভেইয়ে ভাক গরি খান। তিন দিন্নে উপস্যা সাত দিন্নে উপস্যারে তোরান। এধক্যে বিজক চাঙমা জাদর শিরেই শিরে মিজি এল’। মাত্তর সময়র গঙারে বেক আহ্’রে ফেলেই কন গল্লেত পরি দিক কাভুল ওই কন’ কিত্তে কুলেই ন’ পাত্তন।
দেঘা যাই চাঙমা জাত্তো গোদা পিত্তিমীত ছিদি পচ্ছোন। শিক্কে দিক্কেই আগত্তুন আজার আজার গুনে মুজুঙে আক্কোই যিয়োন। যাক যাক পিএইচডি ডিগ্রি পাদন, পিত্তিমীত নাঙ ফুত্যা বিদ্যা ঘরত কাম গত্তন। এধক পানার (অর্জন) পরয়্য কিত্তেই পরাকবাল্যা কোই যায়? চাঙমা জাত্তো এক্কান পাজা আঘে, মানজ্যা এক্কা বাঙিনি গরলে তারা জাত পাত বেক কুরি ফেলা, আঙুল মাধালোই বেরান থেঙ’ মুরি ন’ বাজেই। নিজ’ জাদর কধা, নিজ’ বংশ কধা, জাদর পাজা (বৈশিষ্ট্য) কধা বেক স্বরসত্তিবো উরি নেযায়। তলেদি রিনি ন’ চান, চেলা মোজ’সান মু আলক গরি বেরান। সিত্তেই এচ্যে চাঙমা জাত্তো পরাকবাল্যা।
তারা কি লাগত ন’ পান? কি গমি ন’ যায় তারা মাধাত? দেবানে দেবানে কোল বাজেই বাইয়েচ মুউজ চাঙমা কাবি ফেল্লোন, রাজাকার কোই কোই আদাম থিয়ে গুলি গরি মারেফেল্লো। মিজিলিক দর, ডাগিদর দর, বাধি দর, ঘগুরুক বাহিনী দর, মুখেচ বাহিনী দর, বাঙাল দর, আর্মি দর, কুকি দর, বাঘ দর গমি যেল’। কাপ্তে গোধা বানি ধুবে দিল’ আজার আজার একর ভুই-বাগান। এ কাল এয’ গমি যার তারার। এয’ গমি যার তারা কিয়েত সে সুনামি সান দাঙর দাঙর ঝর বোইয়ের। ইক্যে জাত ভেইয়োর দর। সেনে এচ্যে তারা বেন্যা বেল্যা ভাত যেই খা পরে সিআনয়্য কুরি ফেলাদন। দিঘলী আদামত দিঘলী মা এক মাচ সং এক সাচ্যা ভাত্তোই আঘে। তারার এক্কো আওজর পুঅ জিত্তো শহরত্তুন এত্তে ঝারবোউনে আধা পদত গাড়িত্তুন লামে কুধু নেযেলাক কন’ খবর নেই। সেনে তা পুবোরে ফিরি পেবাত্তে দিঘলী মা ভাত মান্নে। এক সাচ্যা ভাত খেই খেই আগাথ্যা দিন তোরার। এধক্যে হ্’নসুচুক্যা দিন মাধনত আজু নানু পজ্জন শুনানা, বেন্যা অলে থাচসাল’ আগুনত পেত পেত জুম আলু পুরি খানা, মা লক্ষী মারে ভাত দেনা, থানমান গরি গীদে রেঙে মত ভাঙ খেই সে জুম’ গপ মাধানা, গাবুজ্যা গাভুরি ছরা ইজা যানা, ঘিলে পারি দিপজ্যা মাধাত পাগানা রোদত গাজ’ ছাবাত তলে ঘিলে খারা অনা, ঘিলে লুদিলোই বটগাজ’ ত’বেয়ে ধেলাত দোলন তাঙে দুলত দুলনা বেক কুরি ফেল্লোন। মাত্তর এক্কান দাঙর কধা অলদে দিঘলী মা এধক দুগত থানা পরয়্য তে তার মা ভাচ্চোই কধা কর, তে যে চাঙমা; চাঙমাত্তুন ওক্কোর, ভাচ, সাহিত্য, সংস্কৃতি আঘে সিআনি বেক আঝা গরি নিশুলি বুগত আভর কাবে আঘে। যারা এচ্যে যারা দেজে বিদেজে নাঙ বাজাদন কধন তারা চাঙমা জাদর মাজারানি, সুদোমানি বেক আহ্’রে ফেলেই পর জাদর সুদোম্মই আওজি মনে দিন তোরাদন। খবর ন’ লন জাত ভেইউন কেঝান আঘন, ইত্তো কুদুম্মোউন কেঝান দিন কাল তোরাদন। সিআন মুই কবার ন’ চাঙ, কবার চাঙ- তারা যে চাঙমা, পত্তিক জাদর আলাদা আলাদা পাজা থাই। তারা আমানর পাজানি ধরি ন’ রাঘেই পর’ পাজালোই আমনরে চিন পুচ্যা দেদন। বেগত্তুন দুগর কধা অলদে তারা সাহিত্য চচযা গরন পর ভাচ্ছোই। ভিন জাত্তুন চাদন চাঙমাউনরে কেনে কচ্চর বানেবাক। সেনে ভিন ভাচ্ছোই, ভিন ওক্কোলোই সাহিত্য চচযা গরলে তারে মান গজাদন। দাঙর দাঙর কেজ্জো গরি ফেসবুগত, পেপারত, টিভিত তা নাঙান ফগদাঙ গত্তন। সিত্তুন উচ্চমি পেই ইক্যে মুইয়্য ভিন ভাচ্ছোই সাহিত্য চচযা গরঙর। এধক্যে গরি আমি লারে লারে অন্য জাদর সমারে মিজি ন’ যেবং কন্না যেব’। কি মূল্য আঘে সালেন পার্বত্য চুক্তি? কি মূল্য আঘে এম এন লারমা সান আজার আজার বান্দা পরান দেনা? এচ্যে মোন মুড় যেন তাক কুল, ছড়া ছুড়ি চাজা অর সমারে আমা সাহিত্য সংস্কৃতি, ভাচ, ওক্কোরয়্য কি চাজা অভ’?
সেনে মুই আমা নুয়ো পিড়ি আ ইরুক পিড়িউন’ ইধু কুজোলী গরিম- মাইকেল মধুসুদন সান আমাত্তুন ওই পরিব’। আঘে আমনর ভাচ-ওক্কোলই সাহিত্য চচযা গর’। ইআনর অর্থ এ নয় যে আমি ভিন জাদর ভাচ ন’ শিঘিবং।
কোন মন্তব্য নেই:
একটি মন্তব্য পোস্ট করুন