ক’দিন আঘে মুই খুউব চিওম্যা এলুঙ। কিত্যাই, আমার চেরোপালা মানুচর কধা ভাবি। ইধোত উদে নুয়ো রামর সে কবিদ্যা কধা। তে কোইয়ে “অজল পাগজ্যা নিজ ঝুপ দিন দিন পরেল্লি কলি যুগ, কলি যুগত সত্য নেই, বুগ ছিরি দেঘেলেয়্য পত্য নেই।” আজলে সিয়ান মুই যধবদে গরি বিশ্চেস যাঙ। ইরুক দিনত কারে কন্না থোগেই পারে, কারে কন্না কদক বেচ পরাদি পারে এধক্যে গরি দিন-কাল তোরাদন।
গেল্লে জুন মাচ এল’ আমার চাঙমা লেঘা শেঘানা মাচ। বাঙালর পবিত্র রমজাম মাজ। এ মাজত ইশকুলত লাম্বা এক্কো বন্ধ এল’। এ বন্ধ দিনত আমি দিঘীনালা উপজেলাত ১১য়ান জাগাত(হাই আ প্রাইমারি ইশকুল) চাঙমা লেঘা শেঘেয়্যাই চাঙমা সাহিত্য বা আ সাঙু পাঠাগার তপ্পেত্তুন। ইয়ত দাঙগু এলিয়েন্স চাঙমা এল’ মর ছাবা সান। বানা কি সিয়ান? না, তে মরে নানা কিজু পরামর্শ দিদ’। আ দাঙগুবী শ্রেয়সী চাঙমা, দাঙগু রিকন চাঙমা(তারা দ্বি জনে মাস্টর, বাবু ছড়া ফ্রেন্ডশিপ ইচকুলত), দাঙগু রির্টান চাঙমা(বাঘাইছড়ি, বাবুছড়া) আ দাঙগু উজ্জ্বল চাঙমা চাঙমা(বাবু ছড়া হাই ইচকুলর মাস্টর) তারারে ইধোত ন তুলি ন পাঙর। তারার এজালে চাঙমা লেঘা কোর্সু দোলে দোলে থুম গরি পারা যিয়ে।
ইক্যে কধা কত্তে, হাজাছড়া জোড়া ব্রীজ জনিয়র ইচকুলত ২৩ জুন চাঙমা লেঘা শেঘা যাদে জীপ গাড়ি ন’ পেন্যাই এক্কান হোন্ডা নেযা পয্যা। তে মত্তুন ৮০ তেঙা চাই। শেজে ৭০ তেঙালোই দর গরি লত্ দিলুঙ। মর এক্কান পাজা অহলদে মুই পাত্তে ভাগে বাঙাল গাড়িত কম উধোং। কিত্যাই, বাঙাল্যা যুনি কন এক্কান অয়? ইদোত উদে ২জুন লংগদু কধা। ৩০০ উগুরে ঘর ছেই বানে দ্যুন। সিত্যাই চাঙমা গাড়িত গরি জোড়া ব্রীজ গেলুঙ। সিধু যেন্যাই মরে এক্কো মিলে কত্তে(তে, চে রুয়ে মুই ভাড়া দেদ্যা), আ দা কত্তুন এযর? দিঘীনালাত্তুন। তে কল দিঘীনালাত্তুন জোড়া ব্রীজ একজন ৩০ তেঙা, দ্বি জন অলে ৫০ তেঙা হোন্ডা ভাড়া। মুই চাঙমা ইজেবে বিশ্চেস আঘে মরে ন থোগেবাক। সে বিশ্চেস মর লারে লারে জাঙারে ধরের।
২০১৫ সাল। দিন - পুর ইক্যে ইদোত নেই। চাঙমা লেঘা শেঘা যাঙর উত্তর রেংকায্যা হাই উচকুলত। মেরুং স্টেশনত লামিনে ম এক্কো ইচকুলর সমাজ্যা লাগত পিয়ঙ। তে মত্তুন পুজোর গরে মুই কন কুম্পানিত চাগুরি গরঙ। তা ধক বুঝি হোচ গরি কলুঙ, ‘চাঙমা সাহিত্য বা’।
-বেতন কদক পাচ?
- আপাতত ন’ পাঙ। দ্বি-তিন বজর যাদে লাখ উগুরে বেতন পেম।
এই কধায়ান শেজ অধে ন’ অধে মরে চা দোগাত আহদত ধরি থানি নিল। পেজেহ্ পেজেহ্ পুজোর গরে নানাঙ কধা। শেজে তারে দোলে বুজে কলুঙ- “চাঙমা সাহিত্য বা এক্কো অলাভ জনক সংস্থা। আমা কাম মাগানা গরানা, দেচ-জাত কোচপেন্যাই ইয়ানি গরি, চাঙমা সাহিত্যরে বিশ্ব সাহিত্য ইজেবে থিদ গরিবাত্যা। তরে লাখ উগুরে যে বেতনর কধা কলুঙ সিয়ান অলদে আমি এযাবত ৩০০জনরে চাঙমা লেঘা শিঘিয়েই। এযেত্তে বজরত যুনি যার যার মা ভাচ্ছোই ইচকুলত লেঘা শিঘি পান। তারাও চাঙমা লেঘা পারন ইজেবে চাকরী পেবাক। যুনি দুর্নীতি ন অয়। ৩০০জনত্তুন যুনি ১০জনে চাগরি পান তারা বেতন ১৫ আজার ধরল্লে ১০জনর বেতন ১৫০,০০০ আজার টেঙা। তরে এই কধায়ান কবার চেনেই এক্কো চা বকশিষ পেলুং।”
বেগ শেজে লক্ষীছড়ি উপজেলাত চাঙমা লেঘা কোর্স চালু গরিবাত্য দাঙগু সুমন চাঙমা লোই(সদস্য, সাঙু পাঠাগর) এবজর মার্চ মাজত সিধু গেলঙ। ১নং লক্ষীছড়ি ইউনিয়নর চেয়ারম্যান্যেলোই এগত্তর অই খবর পেলঙ উপজেলা চেয়ারম্যান্যে নেই। ঢাকা কামে যিয়ে। তারল্লোই কধাবাত্তায় কোর্সু দিন - পুর বানিলং, এপ্রিল ৭দিনত কোর্সু ফগদাঙি গরানা। বেক্কানি তাত্তুন পরামর্শ গরি এলঙ। শুগনছড়ি দেয়ান পাড়াত্তুন দাঙগু প্রদীপ চাঙমা তারে ফাঙগরা যেইন্যাই উপজেলা চেয়ারম্যান্যে তারে আগে ন মাধেনেই এক্কা কুজুক কুজুক পেন্যাই প্রদীপ্যা মরে ফোনে কয়দ্যা দা, তুই এক্কা উপজেলা চেয়ারম্যান্যেলোই কধা কোইচ। কধা কোইনেই চেয়ারম্যান্যে মরে কল- “ইধু(লক্ষিছড়িত) কন্না কন্না কাম গরত্তে?......শুন, ইয়ানি অলদে বৃহত্তর বিষয়-সাহিত্য বিষয়। এচ্যে বাংলাদেশ কমেলেত্তুন ধরি সাহিত্য নিনেই গবেষনা গরেত্যা। আন্দাজ্যা অহ্লে ন গাত্তো। .................এম পাশ পদে ঘাদে। দিঘীনালাত দ আর বেজ। বানা চিগেরেত খেই খেই থানদে - জুয়া খেলা খেলে খেলে। ..... তুমি আন্দাজ্যা দ’ শেঘে গেলে ন’ অহব। তোমালেই কধা কনা যথেষ্ট দরগার এল ....................(১৭ সাল কধা)”।
আঘে কোই অয়্যা উপজেলা চেয়ারম্যান্যে ন’ থানার আ ইউনিয়ন চেয়াম্যান দাঙগু প্রবীল চাঙমার সল্লা পরামর্শলোই গরবা বলা যেব কারে কারে বেগ থিক গরা অয়্যা। এই কধানি শুনি পল্যে মনত এক্কা দর সম্যে। কধা আঘে, “পদ ফুরোই সাঙু দুয়োরত, কধা ফুরোই নানু দুয়োরত। ইয়ান চিন্দে গরি নানু তগেই ৭এপ্রিল লক্ষীছড়ি পিএফসি ইচকুলত “চাঙমা লেঘা কোর্স” ফগদাঙ গচ্ছে। খামাক্কাই কোম ইয়ত আমার আত্তো আজারউগুরে তেঙা করচ অহলেয়ু আমি কোর্সু গরি পাচ্ছেই (চাঙমা লেঘা শিঘিয়ে পেলং বানা ৩ জন। তারায়্য ভুজলি চুগত্তুন এযন)। ইয়ান এই কনচুসুক্যা দিন মাধানত দাঙর পাওত্তি ভিলি মনে গরঙ।
আ আমা নুয়ো তপ্পা বা নুয়ো পিরিহ্ কধা ভাবিলে গত্তনাত কাজি দিন্যাই মরিবার মনে কয়। তারা ফেসবুক বাদে কিচ্ছু ন’ বুঝন। কুধু গেলে এক্কো দোল ছবি আপলোড দি পারিম, কন কিয়োঙত, কন তানজাঙত, কন রিঝেং-ঝুরঝরিত না পর্যটনত। বেগে এচ্যে রঙ্গতামাশাত মিজি থেবার চান। ইন্দি ঘর উন্দোরবু উদে র্আ পরের খবর নেই। ইয়ান মুই তারারে দুচ দিবার ন’ চাঙ। দুচ্ছান আমার রাজরর চেলাউনর। মুই বিশ্চেস গরঙর আমা চাঙমা জাত্তো তলে পরিয়্যা নয়। যুগে যুগে তারা সুয়োল গরি এত্তন। রেয্য পর রেয্য শাসন গরি ইচ্ছুন। সে বংশর পুঅ/ছাউন এধক্যে অহনার দাঙর কারন আঘে।
যা ওক, গেলদে ২৩, ২৪ আ ২৫ জুলাই মাজত চাঙমা সাহিত্য বা আ সাঙু পাঠাগার এই দ্বিবে জধা দিঘীনালাত তিন দিন সং যারা মুজুঙর দিনত আদামে আদামে, ইচকুলত, কলেজত চাঙমা লেঘা শেঘেবাক তারারে ট্রেনিং গরা অয়্যা। এই ট্রেনিঙত্তুন বুঝি পাচ্ছোঙ আজলে জাত্তোরে কোচপিয়ে মানুচ এয আঘন। কিত্যাই বারেজ্যা দিনত, উরহুজ্যা ঝরত তারা নিআলসি গরি ট্রেনিং গচ্ছোন, নিজ খরচে। তারা ইমে গচ্ছোন, সাপ্তাই দ্বি’ঘন্টা জাদত্যাই নিজ জীংহানিত্তুন খরচ গরিবাক।
এচ্যে সময়র গঙারে বেক্ বদলি যিয়ে, বদলি যিয়ে হিল চাদেগাঙসমুত্তু গোদা পিত্তিমীর ধক। যক্যে ভারদত কালা মেঘ চাগা ভেদা দের সক্যে মোদি বেক্কুনরে মিটিঙত দাগিলে বেগে উজে যিয়োন। মাত্তর, আমি? এই উত্তর তোমা সিধু। মুই ন’ কলুঙ। তবে ইক্যে মর আঝায় বুক ভরি যার ইয়ান ভাবিনেই, দেচ আহ্লেয়্আয মা মা ভাচ্ছান আহজি ন’ যেব’। কিত্যাই নুয়ো পিরি জাগি উত্তন।আমারে নাঙান জনে নানাঙ ধক্যে গরি এজাল দেদন। মালছড়ি উপজেলা চ্যোরম্যান্নে ২০ আজার তেঙা এজাল দিল’। মা ভাচ্ছোই সাহিত্য চযযা গত্তন। এধক্যে নালে আহদিলে হিলর ছড়াগাঙ ঝালাব্বর অহব, গাজে গজে নানাঙ ফুলে তম্বাস ছিদিব। মোন-মুড় এ্যাইল অহ্ব। যিধু যেই, যিধু থেই এই অমূল্য দরপ্পান লগে নি পাবিবং। ইধোত গাদে রাঘ হিল চাগোঙ বাদে আমা কন কিত্যা জাগা নেই।
কোন মন্তব্য নেই:
একটি মন্তব্য পোস্ট করুন