আমি পারিবং

কাচালং কলেজত চাঙমা লেঘা কোর্স

ইরুক বিচ্চায়ন ইন্টারনেদও যুগত পিত্তিমিত্তুন বহুত ভাচ আ ওক্কোর লুগি জাদন্নোই। আমার চাঙমা লেঘা আ ভাচ্চানয়্য চচ্চা ন’ থানার লুগি যেবার অক্ত। ১৮ বঝর আগে ২০০০ সালত পল্যা জানুয়ারীত এক ঝাক ভার্সিটি, মেডিকেল আ ইঞ্জিনিয়ারিঙত পোর্বায়া লগে মিলিনে চাঙমা সাহিত্যর পহ্’র ছদক চাঙমাউন ইদু আ পিত্তিমি ইদু ছিদিনে চাঙমা সাহিত্যরে বিচ্চসাহিত্য ইজেবে থিদব্বরী গরিবার অতালিয়ে ধারচ লোইনে “চাঙমা সাহিত্য বা” নাঙে এ খরহমঁরংঃরপ জধাবো বানা অয়ে। আমার আর’ লক্য আ উদ্দিচ্য অলদে, চাঙমা একাডেমি থিদব্বর গরানা, চাঙমা সাহিত্যিকউনরে মান গজানা, অজল অজল গবেসনা গরানা। ইয়ানি এক্কান রুটিনর কাম ইজেবে আমি ২০০৪ সালত্তুন ধরি এয’ সং চাঙমা লেঘা শিঘানা কোর্স চালে যের। ২০১৮ খ্রি. সং আমি ২৬৪২ জনরে চাঙমা লেঘা শেঘেলং। এচ্যে যারা হিল চাদিগাঙর বারে আঘন তারা হিলচাদিগাঙত্তুন দুরত থাগত্তে থাগত্তে মানুচ্ছুন কধ’ গেলে জাদর ভাচ, ওক্কোর আ সাহিত্যিত্তুনয়্য ফারক অই যাদন্দোই। অক্তে অক্তে বহুজনরে দেঘা যায়দে, নিজ’ মা ভাচ চাঙমা ভাচ্ছানয়্য পরি ফেলাদন। আরেককিত্তেন্দি, মিজোরাম সি.এ.ডি.সি- এ বাংলা ওক্কোর তুলি দিয়্যা, অরুনাচলর চাঙমাউনে বাংলা ওক্কোর মাদেই ন’ জানন আ তিবিরে চাঙমাউনেয়্য বাংলা ওক্কোর তুলি দেদন। তারা বানা চাঙমা ওক্কোর, চাঙমা লেঘা জানন, লেঘন আন্তজার্তিক ভাচ ইজেবে ইংজেজিয়্য জানন। ইক্যে আমি চাঙমা অইনে চাঙমা লেঘা ন’ পাল্লে লারে গরি আমা জাদর দাঙর কত্তা মিজোরাম, অরুনাচল আ তিবিরে চাঙমাউন্দোই ফারক অই যেবংগোই। সং সং চাঙমা অইনে আমি কার’ কধা ন’ বুঝিবং। যিক্যে গরি মিয়ানমার’ চাঙমাউন্দোই কধা কোই কি গল্লে বুঝা বুঝি ন’ অই। কারন আমি এব’ বাংলা ওক্কোরলোই লুদুপুদ আঘি। চাঙমা ওক্কোর, চাঙমা লেঘা ন’ পাচ্যগরি আমা পুয়ো/ঝিউনে কেনে জাদর দাঙর কত্তা অরুনাচল, মিজোরম, তিবিরে, বিহার, কক্সবাজার আ আরাকানর চাঙমাউন্দোই কুদুম্ব রাঘেবাক? এধক্যে গরি আমি তারাল্লোই লারে লারে গরি চাঙমা লেঘা শেঘানা অলিবর কারনে আমি ফারক অই যেবংগোই। আর এক্কান দাঙর কধা অলদে ইক্যে বাংলা সরকাচ্যা এ বঝর আমারে ক্লাশ টুত সং মা ভাঝর বই দিল। ইআন এ্যানে এ্যানে ন’ পেই। কধক চোগ’ পানি, লো ধালানার পর বাংলা দেঝর স্বাধীনতা ৪৮ বঝর পর আ পার্বত্য চুক্তি ১৮ বঝর পরম া ভাঝর বই পেলং। দুগর কধা অলদে আমি সে বইয়্যন পড়ে ন’ পারির। মাত্তর আমি “চাঙমা সাহিত্য বাহ্’র কাম্মোউনে সিআনি অবার দিদং ন’ চেই। সেনে আমি দিঘীনালা, মালছড়ি, পানছড়ি চাগালাত মা-ভাঝর বই পড়েবাত্তে আমি সাত্থুয়া (শিক্ষক) জুগোল গজ্জেই। আমি চেই জাদ’ ভেই বোনুনে ভিন চাগালাত বা যে যিদু থায় জাদ’ লেঘা চাঙমা লেঘা পাত্তোক। আমি তারারে শেঘেবং। আ সেত্তেই এ জুগলনা।

নান্যাচর উপজেলাত গাইন্দ্যাছড়ি হাই ইক্কুল চাঙমা লেঘা কোর্স
ফাঙফগদাঙ- ৫-২-১৯ খ্রি.

আমার এ চাঙমা সাহিত্য বাহ্ বোত আঘন তারা যে যেঙরি পারন চাঙমা লেঘা শেঘে যাদন।চাঙমা সাহিত্য পহ্’র সিদি দেদন হিলাহিলিত, ঘনাঘনিত লুমে দি যাদন।

আঝা রং তুমি বেগে খবর প’ আগেদি ঢাকাত্তুন চাঙমা সাহিত্য পত্রিকা নাঙে এক্কো চাঙমা ওক্কোর, ভাচ আ সাহিত্য বিসয়ক ম্যাগাজিন ছাবা অয়। ইক্যে দিঘীনালাত্তুন ধারাদিঘলী গরি ছাবা অয়। আমি চাঙমা সাহিত্য বাহ্’ তপ্পেত্তুন সে চাঙমা সাহিত্য পত্রিকাবো ফগদাঙ গরি আ হিলচাদিগাঙরর কনাকনি, ঘনাঘনিত্তুন ধরি ঢাকা, চাদিগাঙ আ ভিন দেজত যিদু যিদু চাঙমা জাত ভেই বোনুন থান, সিদু চাঙমা ওক্কোর, ভাচ আ সাহিত্যর পহ্’র ছদক লুমে দি যেল্লোই।

মালছড়ি মধ্য আদাম কুঠির পাড়া চাঙমা লেঘা শিঘিয়ে পুঅ/ঝিউন
০৫-০২-১৯ খ্রি.

আমি যারা চাঙমা সাহিত্য বাহ্’ কামগরি আমি বেগে কলেজত পর্বোয়া ছাত্র/ছাত্রী। মা বাপত্তুন পেইয়ে তেঙা বাজেনে আমা সাহিত্য কামানি চালে নেজের। আমি কারত্তুন চান্দা ন’ তুলি আ কারত্তুন তেঙা ন’ তুলি এব সং। মাসিক ফি আ চাঙমা লেগা শিঘিয়ে পর্বোয়াউনত্তুন যে ২০, ৫০, ১০০ তেঙা ফি লোই আ যারা আমা কামর দুক বুঝি কিঝু তেঙা মানচ্যা এজাল দুয়োন সিউন্দোই কোরেয়্য পেদেয়্য গরি কাম চালে যের। সিত্তেই এচ্যে ১৮ বঝর পরয়্য আমা জধাবো কন’ ফান্ড নেই আ এব’ এক্কান কম্পিউটার নেই। সেত্তেই লক্য-উদ্দিচ্যআনি বাস্তবায়ন গরি ন’ পারির, যুনিয়্য আমাত্তুন বল, মেধা, ধৈর্য্য, সাওচ আ ইচ্ছাশক্তি আঘে।