চাঙমা সাহিত্য পত্রিকা(এওজি, দিঘীনালা): চীবর অহ্’লে ভান্তেদাঘি উরন্দে কাপর। যে দিনত চীবর দান গরিবাক সেদিন বেন্যাত্তুন ধরি তা কেল্যা বেন্যা সং সুদ তুলনা, থেয়ানা, বাজানা, বুনানা, কাপানা, সেলানা, রং গরানা, ধনা আ শুগনা এধক্যে আগাথ্যা কামানি গরানা।
এ বাদেয়্য আর’ কিঝু আগাথ্যা রিদিসুধোম
পালানা সমারে এ চীবর দানান থুম অহ্’য়। সিত্যাই চীবর দানর আগে কঠিন র’বো বাজেই
দিন্যাই কঠিন চীবর দান নাঙ দিয়্যা অহ্’য়।
ইরুক নানান কোম্পানি বানেয়্যা আ
সেলেয়্যা চীবর ভান্তেদাঘিরে দান গরন।
কঠিন চীবর দান অবার আগেদি ভান্দেদাঘি শবাশালত আ নানান জাগাত্তুন কাপড় তোগে উরন –পরন। মাত্তর সিয়ানি বেচ আজর অহ্’না বুদ্ধ হুম দেনায় গম চীবর উরি-পিনন।
ইক্যে ভান্তেদাঘি ধর্মসুধোমে নানাঙ ফাংশান গরি যা যা কিয়োঙত তিনমাঝ্যা বর্ষাবাস থুম গরন, তারার দায়ক-দায়িকাদাঘি এ কঠিন চীবর দান গরন। তিন মাঝ্যা বর্ষাবাস থুম অহ্’লে ধর্মসুধোমে দোলে দোলে প্রবরণা পূর্ণিমা পালান। আ এ প্রবারণা পূর্ণিমা তা কেল্যা দিনত্তুন ধরি কাদি পূর্ণিমা সং এ এক মাস কাঠিন চীবর দান গরিবার সুধোম থায়।
বুদ্ধ ধর্ম মতে, পিত্তিমীত যেধক্কানি দান আঘে সে দান সেরে কঠিন চীবর দান অহ্’লদে দাঙর দান। বেক দান’ পারমি জমা গরিলেয়্য এ এক্কান চীবর দানর সমান পূণ্য পা ন’ যায়। কঠিন চীবর দান দিন্যাই যে ফল পা যায় জনমে জনমে সে দানর সুফল আ নির্বাণ লাগত পেবার হেতু উৎপন্ন অহ্’য়। সেনে তারে দানোত্তম কঠিন চীবর দান নাঙ দিয়্যা অইয়ে।
কঠিন চীবর দানর ন’ পুরেয়্যা পূণ্য আ নানান বাবত্যা গুন কধা মাধাত রাঘেই এ দংগাপিড়ে করোনা ভাইরাসর সেরে সেরেয়্য উহ্’জে উহ্’জে দোলে দালে নানান কিয়োঙত কঠিন চীবর দান গরা অইয়ে।
এ দিন বর্ণাঢ্য কর্মসূচির মধ্যে রয়েছে-মঙ্গলাচরণ, জাতীয় ও ধর্মীয় পতাকা তুলনা, বেন্যা পৈনাল গরি বুদ্ধ পূজা, অষ্ট -সংঘদান, পূজ্য ভান্তেদাঘিরে পিন্ডদান, পঞ্চশীল/অষ্টশীল লনা, কঠিন চীবর দান আ কল্পতরু উৎসর্গ, ফানাচ উড়ানা, আজার বাত্তি জ্বালানা, বিশ্বশান্তি আ দেঝর মঙ্গলত্যাই তবনা আ বিদর্শন ভাবনা গরা অহ্’য়।
এ কঠিন চীবর দান’ অক্তত চাঙমা সাহিত্য বাহ্ নানান কিয়োঙত চাঙমা লেঘা চার্ট দান গচ্ছে। যা কন’ কালে এ দানান গরা ন’ অহ্’য়।
1. শ্রীমৎ চন্দ্র কীর্তি ভান্তেদাঘি মিঙিনি চাগালাত অনুত্তর পূণ্যক্ষেত্র পার্বত্য ভিক্ষু সংঘ নকবাচ অহ্’নার পোইদ্যানে: চাঙমা লেঘা চার্ট আ সাঙু (চাঙমা লেঘা শিঘিবার বই) মান গজা অইয়ে। সামরে শ্রীমৎ তেজ বংশ ভান্তেদাঘিরেয়্য চাঙমা সাহিত্য বাহ্ পাবলিসার্শত্তুন পত্থম ফগদাঙ অইয়ে “ঘিলে ফুল” (চাঙমা ছড়া বই, লেঘিয়্যা: সুনানু রনজিত চাঙমা) আ সাঙু (চাঙমা লেঘা শিঘিবার বই) মান গজা অইয়ে।– ৭ নভেম্বর ২০২০ ইং।
2.
সাধনাটিলা বন বিহার থিদ গরিয়্যা শ্রীমৎ বুদ্ধ বংশ ভান্তেদাঘিয়ে চাঙমা লেঘা চার্টলোই মান গজা অইয়ে। সামরে শ্রীমৎ নন্দ পাল ভান্তেদাঘিরেয়্য চাঙমা সাহিত্য বাহ্ পাবলিসার্শত্তুন পত্থম ফগদাঙ অইয়ে “ঘিলে ফুল” (চাঙমা ছড়া বই, লেঘিয়্যা: সুনানু রনজিত চাঙমা) আ সাঙু (চাঙমা লেঘা শিঘিবার বই) মান গজা অইয়ে। আ যার এজালে চাঙমা সাহিত্য বাহ্ ২০ বঝরত খুচ দিল সে স্বর্গীয় সুনানু পাহাড়ীকা চাঙমা উদিজে চীবন দান গরা অইয়ে। - ১৩ নভেম্বর ২০২০ ইং।
3.
পান ছড়ি সংঘ মৈত্রী বৌদ্ধ বিহার নানু শ্রীমৎ তেজ জ্যোতি ভান্তেদাঘিয়ে চাঙমা লেঘা চার্টলোই মান গজা অইয়ে। সামরে খাগাড়াছড়ি জেলাপরিষদর নানু কংজোরি চৌধুরীদাঘিরেয়্য চাঙমা সাহিত্য বাহ্ পাবলিসার্শত্তুন পত্থম ফগদাঙ অইয়ে “ঘিলে ফুল” (চাঙমা ছড়া বই, লেঘিয়্যা: সুনানু রনজিত চাঙমা) আ সাঙু (চাঙমা লেঘা শিঘিবার বই) মান গজা অইয়ে।– ১৪ নভেম্বর ২০২০ ইং।
4. কুকিছড়া ত্রিরত্নাংকুর বৌদ্ধ বিহার’ নানু শ্রীমৎ অনিত্য লোক ভান্তেদাঘিয়ে চাঙমা লেঘা চার্টলোই মান গজা অইয়ে। ১৪ নভেম্বর ২০২০ ইং।
5. গোলাবাড়ি আর্য্য গিরি অরন্য কুঠির’ নানু শ্রীমৎ জ্ঞান আনন্দ ভান্তেদাঘিরে চাঙমা লেঘা চার্ট আ চাঙমা সাহিত্য বাহ্ পাবলিসার্শত্তুন পত্থম ফগদাঙ অইয়ে “ঘিলে ফুল” (চাঙমা ছড়া বই, লেঘিয়্যা: সুনানু রনজিত চাঙমা) আ সাঙু (চাঙমা লেঘা শিঘিবার বই) মান গজা অইয়ে। - ২০ নভেম্বর ২০২০ ইং।
6.
তেঁতুলতলা অগ্রমৈত্রী বিদর্শন ভাবনা কেন্দ্র থিদ’ গরিয়্যা শ্রীমৎ তেজ বংশ ভান্তেদাঘিরে চাঙমা লেঘা চার্টলোই মান গজা অইয়ে। - ২০ নভেম্বর ২০২০ইং।
7. আর্য গিরি বন বিহার থিদ গরিয়্য শ্রীমৎ অমর রত্ন ভান্তেদাঘিরে চাঙমা লেঘা চার্টলোই মান গজা অইয়ে। সমারে শ্রীমৎ শাসন রক্ষিত ভান্দেদাঘিরে চাঙমা সাহিত্য বাহ্ পাবলিসার্শত্তুন পত্থম ফগদাঙ অইয়ে “ঘিলে ফুল” (চাঙমা ছড়া বই, লেঘিয়্যা: সুনানু রনজিত চাঙমা) আ সাঙু (চাঙমা লেঘা শিঘিবার বই) মান গজা অইয়ে।– ২৪ নভেম্বর ২০২০ ইং।
কোন মন্তব্য নেই:
একটি মন্তব্য পোস্ট করুন