 |
| ছবি: তিতাস চাঙমা |
কি এল’ সে গেংখুলি গীদত? কি এল’ সে বিজক(ইতিহাস) আ উপখ্যান? চাঙমা রাজার কধা, চাঙমা কন’ মিলে কধা, চাঙমা কন’ ভালেদি জীংকানি কধা। সক্যে চাঙমাউনর রাজা এল’, রেয্য এল’, সুক এল’ চাঙমাউনর জীংকানিত। মিলেউনর মুয়োত অনসুর আজি এল’, বুগত এল’ আঝা আ কোচপানা, চোগত এল’ পোতপোত্যা সবন। সক্যে কাজালং, চেঙে, মিঙিনি, শঙখ, বরগাঙ আ ফেনী এল’। সে গেংখুলি গীদ’ সুরত ফুদি উদি সে কধা, গাঙর কদা, মোন মুরহ্ কধা, মোন-মুরহ্ হ্’েইল তারুম ঝারর ফুল, পেইগ’ কধা আওজি মনে রিবেঙত্তুন কারি শুনেদাক। সক্যে বিঝু এল’, ফুল বিঝু, মুর বিঝু আ গয্যাপয্যা দিন। ফুল বিঝু দিনত বেগে চিদ’ সুগে, মন’ সুগে রেত সংভাগত ঘুমত্তুন উদি ফুল তুলি গঙামারে ভূজিদাক, বর মাগিদাক। মুর বিঝু দিনত রাঙা বেলাল মু ভেদা দেদে কুর’ আদার দিদাক, ঝাক ভুদি ভুদি বিঝু খেদাক, গীদে রেঙে। গয্যাপয্যা দিন বুরো-বুরিহ্’রে ঘাদেদাক। গাবুয্যা গাভুরি, গুর’-বুরহ্’ বেগে ঝাগে ঝাগে কিয়োঙত যেদাক। ফুল বাত্তিলোই বুদ্ধরে পূজিদাক। সাত বেইল সং ঘরত, ধিঙিসালত, গাঙত, কুর’- গরু ঘরত বাত্তি আঙে সয়সম্পত্তি বারিবাত্তে বর মাগিদাক। বেগ’ মঙ্গলত্যাই, গিরিত্তি ভালেদিত্যাই, আদাম ভালেদিত্যাই, সমাজ উজন্দিত্যাই বর মাগিদাক। নিজ’ মনর মানুচ্ছোরে তোগেদাক জুম’ থুপ থুপ সুধোগলাত, ঘোচ্ছে তাগাত, রিঝেং, ঝোরঝরিত সে ভাদ’ মাজ্যা পাগানা ধান সিজেত।
জুম’ ধান গোলাত তুলানা থুম অলে মিলেউনে বেইন বাজান, বেইন বুনন, খাদি, বেজোন বুনন। বেজোনত দোল দোল বট গাচ, কিয়োঙ আ চাঙমা ওক্কোরুন আঁগান। সে বেজোনানি তারা কোচপানা মানুচ্ছোরে বুকশিচ দ্যুন। যারে নিনেই তার সবন দেঘন- দোল এক্কা সংসার গরিবার তারে।
মোন-মুরহ্’ত চাগালা থিয়্যা জুম কাবন। কাদিমাচ জুম ফাঙ গরন। আওন-পুচ মাচ জুম কাবা ধরন। চোত মাচ জুম পুরন। আরা কারি, আনুনি সুলি বোজেক-জেতমাচ ঝর পরল্লে ধান কুজোন। গাবুজ্যা - গাবুরি জুম’ কাম গরন, সাজন্যা লামি এত্তে ঘরত ফিরন, গীত গেই গেই। যে গীদত কন’ দুক নেই, নেই কেলচ-আভিল্যাচ। ইআনি তারার সবন। ইত্তুন বেচ তারার দাঙর সবন ন’ এল’। কাম গত্তে গত্তে এধক দুক পান ত্যুঅ তারার মুয়োত গান এল’, নাচ এল’, সুক এল’ জুম্মউনর জিংকানিত। কিত্তেই, সক্যে হ্’েইল ঝার এল’, এল’ চিগোন - দাঙর ছরাহ্-ছুরিহ্ আ বানা জুম্মউন এলাক। তারা বাদে অন্য কন’ জাত ন’ এলাক এ রেজ্যত। সে পরে উত্তুন যেন এলাক অন্য মানুচ চাঙমাউনর জিংকানিত, মুরুল্যা জিংকানিত। এ সের ন’ পিয়ে দুগতয়্য তারার “মজুর” ন’ এল’ কন’ দিন। নিজ কাম নিজে গরিদাক। পোত্যা রাদা দাগত ঘুমত্তুন উদি ভাত রানি দিদাক মিলেউনে। পহ্’র ফাদি এত্তে ন’ এত্তে ভাত মোজা পুনত বানি বাগত লামিদাক মরত্তুন। কন’ বান্দা (ব্যক্তি) কাম বোরে ন’ এলে তারা তারে বল দিদাক, এক লগে গীদে - রেঙে। কন’ গিরি বঝর ভাদে খেই ন’ পারল্লে তারে মন’ এজাল, ধন’ এজাল দিদাক। মাত্তর এচ্যে তারা “মজুর” অই যিয়োন। ঝার তারুম বেক ভচ যিয়ে, ছরাহ্-ছুরিহ্ শুগেই যিয়ে। ঝুরি মাধাত্তুন পানি ন’ থেপাই, থেপাই বানা মা-বোনর চোগ’ পানি, বাপ- ভেইয়োর লো। কাপ্তে গধা দিনেই চাঙমাউনর ঘর, বাগান, ভূইবেক ধুবি যিয়ে। ছিত্রিং-পাত্রাং অলাক চাঙমাউন। মা-বাপ, ভেই-বোন আ নেগে মোগে, পুয়ে-ঝি ফারক অই কন’ জনে ছিদি পরলাক অরুনাচল, মিজোরাম তিবিরে রেজ্যত আ বার্মাত। কাপ্তে গধা সুফল তারার কবালত ন’ মিলের। তারা এয’ পার্বত্য চুক্তি পরয়্য আন্দারত আঘন। জাগা জমি এয’ ফেরত ন’ পান। আলু কুরি খেবার ঝার নেই। চাদা দেদে তারার জিংকানি ভচ যার। কুধু লেঘা পরাহ্! ভান্তেউন নির্বান সবন দেঘেই দেঘেই দান নাঙে চাঁদা লদন। বৌদ্ধ নাঙ ভচ নেঘাদন। বৌদ্ধ জাগাত বন বিহার লেঘদন। রাজনীতি চেলাউনয়্য অধিগার পেবার নাঙে চাঁদা লদন। পত্থমে (বাস্তবে) কিচ্ছু নেই। মোন-মুরহ্ বেক সেটেলার বাঙাল, বিজিপি আ আর্মিউন আহ্’ঞ্জামে। মা-বোন জিংকানি ইক্যে বানা দুক আ দুক। জুমত যেবার, কাম গরিবার তারা আওচ নেই, খুজি নেই। অনসুর দরদর থরথর- কায় কুরে কন’ দি থেঙ্যা সেটেলার বাঘে ঝাবান নিনা।
ইক্যে মুরল্যা জিংকানিত কন’ সুক নেই। সিঙে, খেংগরঙর র’ নেই। নেই ধুদুগ’ র’। যে জাগানি, যে মোন মুরত জুম কাবি দোলে দোলে জিংকানি তোরেদাক ইক্যে সে মোন মুরহ্’ত পর্যটন অয়ে, আর্মি - বিজিপি ক্যাম্প অয়ে। যে আদাম নাঙান এল’ ফুলচান কাব্বারি পাড়া সিয়েন ইক্যে রসুলপুর নাঙ অই যেল’। নুয়ো নুয়ো পাকা পথ সে রসুলপুর আ ইসলামপুরত অই যেল’। কাপ্তাত জলবিদ্যুৎ অইনেই চাঙমাউনর কি লাভ অয়ে? কিচ্ছু নেই। যিয়োত আর্মি, বিজিপি ক্যাম্প, যিয়োত বাঙাল পাড়া, ইসলামপুর, রসুলপুর সিয়োত কারেন, সিয়োত পাক্কা পথ।
এচ্যে চাঙমাউনর জিংকানিত্তুন বেক আহ্’জি যেল’। দেচ আহ্’জি যেল’। এধক্যে দুগত্তুন তারা মুয়োত আজি নেই, দাগ’ কধা, বানা, ভাচ,ওক্কোর, রিদিসুদোম বেক ভচ যার। সাচ লামি এলে আজু - বেবেহ্ পজ্জন শুনেদাক, ইক্যে তারার মুয়োত চিদে কধা বাদে কিচ্ছু নেই।
এচ্যে হিল চাদি গাঙত জুম্মউন থেবার কন’ ভ’ (পরিবেশ) নেই। হিলর ধক বেক বদলি যেয়ে। ঝার-তারুম ন’ থানার ছরাহ্-ছুরিহ্ শোগেই যেল’। সেটেলার বাঙাল, আর্মি, রবার বাগান, সাকগোন বাগান, ইটভাটাউনে হিল বুক জেলাঙ জেলাঙ গরি দিলাক। জুম্ম মিলেউন ইক্যে মোন-মুরহ্ ভাঙি ভাঙি পানি তুলদন, চিগোন ছরাহ্- ছুরিহ্ শুগেই যানার। হিল আদি মানেউন অলাক পিত্তোমরা, দিককাভুল। রেত তোরেলে দিন্নোলই চিদে, দিন তোরেলে রেত্তোলোই চিদে। ওলোনসাল’ আহ্লালা দারবোসান আঙে বানা আঙে তারা বুক। এ হিল চাদিগাঙরে আধুনিক সভ্যতা কোচপানা দুর’ কধা। বেক ভচ গরি দের। ঝার-তারুম আ জুম্মউন এক্কান্নোই এক্কান ধরাধচ্যা সিআন আদুনিক বাংলাদেচ ইধোত ন’ রাঘায়। ইক্যে আর’ দেরি অই যার। ইক্যে জুম্মউনর জিংকানিত্তুন শিক্কে নেযা পরিব। ঝার-তারুম, ছরাহ্-ছুরিহ্, মোন-মরহ্, গাচ-বাচ, মেদেনিরে অতালিয়ে কোচপানা দিনেই যত্তন’ গরন বেগ’ মঙ্গলত্তেই, বেগর ভালেদিত্তেই।
