 |
| দাঙগু সুপয়ন দার ছবি। |
ভাচ অলদে এক্কো জাদর পরান। ভাচ ন’ থেলে জাদর কন’ চিন পচ্যে ন’ থায়। যে জাদর ভাচ নেই সে জাত পরসাল্লো সান যুনি বাজি থেলেয়্য। সক্যে তুই চাঙমা কোলে ন’ পারিবে। সক্যে ত’ সাহিত্য, রিদি সুদোম, বিজক, পাজা বেক ভচ যেবগোই। তুমি দেঘর পত্তিক দাঙর জাত, শাসক জাদর পাজা অলদে চিগোন চিগোন জাত্তোনরে তারা লগে আভরানা। তারা পাজানি ছলে, বলে কৌশলে চিগোন জাদ’ ইদু ঝাবে দেন। ইক্যে পিত্তিমীত্তুন গধেল গধেল ভাচ লুঘি যিয়ে, ভচ যিয়ে।
ভাঝর কাবিলউনে কধন- পিত্তিমীত ৬৯১২ আন ভাচ আঘে। ইত্তুন বেচ ভাগে ভাচ আঘে ধীমে ধীমে, মরা থের থের গরি। যিআন আমি কোই খামামাধাত খাচ্যে গাচ। সিত্তেই ইউনেস্কো উচ দিয়্যা- পত্তিক ১৪ দিনে এক্কান ভাচ পিত্তিমী বুগত্তুন ভচ যার। যিআনি ভচ যার সিআনি অলদে, যারা আমনর ভাচ চচযা ন’ গরন আ যারা ৫০ আজার কম মানুচ আঘন। আর’ কোইয়ে- যুনি ৫০ আজার থেলেয়্য গুর’, কারজ্যা, গাভুজ্যাউনে চচযা ন’ গল্লে সে ভাচ্চান খামাক্কাই ভচ যেব’। সালে আমা ধক কি অভ? এক্কান কধা কলে বুঝি পারিবা। সিআন অলদে-
২০১৫ সালর ১৪ ফেব্রুয়ারি দৈনিক সমকাল পত্রিকা রাজীব নূর ‘চাকমাদের দুঃখিনী বর্ণমালা’ নামে একটি গবেষণামূলক প্রবন্ধ লিক্কে। তে পার্বত্য চট্টগ্রামত নানাঙ জাগাত ঘুরি ঘুরি চাঙমা ওক্কোর লারচার পোইদ্যানে এক্কান সার্বে চালেয়ে। তে লিক্কে- “১৪-২৩ জানুয়ারি তিন পার্বত্য জেলাত কোণা-কুণিত ঘুরিনেই এন্টি চাঙমা সান অনেক চাঙমালোই দেঘা অয়, যারা নিজ’ ওক্কোর ন’ চিনন, ন’ জানন। আ দুগ’ কদা বেগর মানবলা অনন্ত বিহারী খীসা, জনসংহতি সমিতির এমএন লারমা গ্রুপের প্রধান সুধাসিন্ধু খীসা, পার্বত্য চট্টগ্রাম নাগরিক কমিটির সভাপতি ও রাঙামাটি পার্বত্য জেলা পরিষদের সাবেক চেয়ারম্যান গৌতম দেওয়ান, জনসংহতি সমিতির তথ্য ও প্রচার সম্পাদক মঙ্গলকুমার চাকমা, জুম ঈস্টেটিকস কাউন্সিলের সভাপতি মিহির বরণ চাকমা, সহ-সাধারণ সম্পাদক গঙ্গামানিক চাকমা, তথ্য ও গবেষণা সম্পাদক তুষারশুভ্র তালুকদার, মোনঘর শিশুসদনের শিক্ষক ও লেখক মৃত্তিকা চাকমা, সাংবাদিক-লেখক হরিকিশোর চাকমা, সাংবাদিক বুদ্ধজ্যোতি চাকমা, আদিবাসী বিষয়ক গবেষক তন্দ্রা চাকমা, আদিবাসী নেতা দীপায়ন খীসা, শিল্পী কালায়ন চাকমা ও ইউপিডিএফের সংগঠক রিকু চাকমাসহ শতাধিক পর্বোয়া চাঙমা দাঘী নিজ’ ওক্কোরলোই নিজ’ নাঙান লিঘি ন’ জানন। বানা দি’ জনে নিজ’ নাঙ লিঘি পাচ্চোন- একজন সাত্থুয়া/শিক্ষক ও লেখক মৃত্তিকা চাঙমা, অন্যজন ইউপিডিএফ নেতা রিকু চাঙমাদাগী।”
শেজে ডারউইনের ভাঝে কবার চাঙ- 'survival of the fittest' বাংলায় ‘যোগ্যরাই টিকে থাকে আ চাঙমা যার সেদাম বেচ তেয়্য থিগি থায়।’ জুম্মউনর চিত-কলজ্যা (অস্তিত্ব) রক্কা গরিবাত্তে নিজর সেদাম (যোগতা) বারাহ্ পরিব। সেদাম বলা অই উদ পরিব। সেদাম বলা, বুগ’পাদা ধর অই পরিব। মুই ইরুক পিরিহ্উনরে কঙর। ইক্কে চেরবো বেরচাগা ভিদিরে থেবার সময় নয়। এয’, চ’। বানা চোক এরে চেই থেবার সময় নেই। এ সময়আন জাগিউদিবার সময়। বিশ^রে জানিবার সময়। আমা মাধাজুধোউনর বল পরি যার। তারা জাগানিত তোমাত্তুন গজি লোই পরিব। এচ্যে দেঘর দ’ জাত্তো কত্তমান লেঙ অই বোই আঘে। আমা সাহিত্য,আমা রিদি সুদোম (সংস্কৃতি), আমা ভাচ, আমা ওক্কোর ফুদো আঙারা সান ধীমে ধীমে গরি আঘে। আমা নিজর চিনপচ্যে আমি দি ন’ পারির। এ দেচ আমারে মনে যা চাই সিয়ান গরের। কাক্কে বাঙ্গালী, কাক্কে উপজাতি, কাক্কে পাহাড়ী, কাক্কে নৃগোষ্ঠী চিনপচ্যে দি যার। আ আমা ভাচ্ছানরেয়্য কাক্কে উপভাচ বানেদের। সিত্তেই আমাত্তুন জাগি উদ’ পরিব। এ ভাচ আমা পরান, এ ভাচ আমা মা, আমা জীংকানি।
তুমি দেঘর- হিলত মা-বোন, বাপ-ভেইয়োর উগুরে তচ্যা, পেরেচার, কষ্ট-কজলা খাদন সিআনি তুমি কেনে চোক পেলে পেলে গরি চেই আঘ? এধক্যে মারানা সমান। থানাত্তুন ন’ থানা গম পিত্তিমীত। তোমার কি রক্ত নেই? আমাদ’ রক্ত আঘে। অলর গরি থেই ন’ পারিবং। যে যেঙরি পারে আমাত্তুন লাড়েই গরি যা পরিব।
ভান্তেউনরে চেলেয়্য বুক ন’ ভরে! তারায়্য তিন চের ভাক! আ বানা নির্বান- দান’ কধা কন। দেচ ন’ থেলে কন’ জনে নির্বানত যেই ন’ পারিবাক। সিআন তারা খবর পেলেয়্য তেঙা দান মাগানা কধানি কুরি ফেলে ন’ পারন। শিব চরণে কোইয়ে-
“গাঝত ফুল ন’ ফুদিলে মধু পেবং কুধু
জাত ন’ বাজিলে ধর্ম থেব’ কুধু”
আ কবি, লেঘিউনর কধা কলে বুক সুলাই। তারা নিজর ভাচ, ওক্কোর থাগদে পর ভাঝে সাহিত্য চচযা - গরন গত্তন।
ও নুয়ো পিরিহ্, তুমি জাদর, দেঝর মুজুঙর দিন চান। তমা মু চেই এয’ বাজি আঘে হিলচাদিগাঙ। আঘে মিঙিনি, চেঙে, কাজালঙ, ফেনি, শংখ-মাতামুহুরি আ বরগাঙ। সিত্তে আমি ফেসবুগত নিজ’ ভাঝে, নিজ’ ওক্কোরলোই লিঘিবং। ভাচ রক্কে গরিবার যা কিঝু গরা পরে খামাক্কাই গরিবং- ইআন ওক এচ্যে আমা ইমে (প্রতিজ্ঞা)।
কোন মন্তব্য নেই:
একটি মন্তব্য পোস্ট করুন