আর চেবার ন’ চেই

দাঙগু সুমঙ্গল চাঙমা, পানছড়ি সরকারি কলেজত চাঙমা লেঘা শেঘানা খেন।

“কি আঝা গরির, কি অর! কি সবনে দিঘি, পত্তমে কি পের। ও ভগবান! কিত্তে তুই মরে কান্ পাদে ন’ দিলে, কিত্তে মরে কাল পাদে ন’ দিলে। ইয়ানি ন ’দেঘঙ পারা, ইয়ানি ন’ শুনঙ পারা। এম্বা কিয়ে অয়্যাদে এয’ এধক্যে কিয়ে জিক্জিকাইদে ঘটনা ম’ চোগত ন’পরে ভেইয়ে ভেইয়ে এধক্যে গরি কাবা-কাবি।” এই কধানি মর নয়। গেল্লে ১৩/১২/২০১৬খ্রি: মঙ্গলবার রেদোত্ কাজালঙ বঙ্গতলিত্ গমি যিয়ে ঘটনা ফটোউন দিঘি দিঘি ধারা ধারা চোগ পানি ফেলে ফেলে কল’ বেগর মা মেদেনি হিল চাদেগাঙ।

তার এক বুগ আভিল্যাচ। তা’পুঅ/ছাউনরে বোঝে ন’ পারের। তার বুগত অনসুর দুগর তুবোল বেই যার। দ্বি’চোগ বারিষ্যা দেবাসান। এক্কু মা তিগুচ্যা আঝা গরে, “তা’ পুঅ ছা’উন রাম-লক্ষণর সান অনসুর কোচপানা থিদ ওক। আলুল্লো-দুলুল্লো সাত নাল্ সুধোলোই বেরাবেচ্যা গরি এ জীংকানি গঙেদি আর এক জীংকানিত পর জীংকানি ভেইয়ে ভেইয়র কোচপানা থেপ্থেপ্যা গরি থোক, রাণ্যা সুদগোলা সান্ ফুদি থোক অনসুর। এধক্যে গরি থেবার তিগুচ্যা গোজেন বদ্ধত্তুন তবনা গরে।

মুই সত্য যুক লাগত ন’পাঙ। মাত্তর, তা বিজক ম’ আজুত্তুন শুন্নং। সে পাচ ভেই পা-ব কধা সে রাম - লক্কণ কধা। পাচ ভেই পা-ব দাগি ইক্কু মিলেলোই পাচ ভেইয়ে ঘর-গিরিত্তি গরি তোড়ে যিয়োন। ইত্তুন আমি বুঝি পারি কত্তমান কোচ পেলে, কত্তমান দয়ে-মেয়্যা থেলে এধক্যে দোল এক্কান সংসার বানে বারে। বুঝিলিং ইক্কে সত্য যুগ নেই, কুলি যুক তেহ্ হি অয়্যা? আগত্তুন বেচ আমি দ শিক্কে-দিক্কে ডাঙর অয়্যাই। আগাজত লুঅ হত্তা এক জাগাত্তুন এক জাগাত পাদে দির। এক কোণাত্তুন আর এ কোণাত কধা কোর। এক্কান জাগাত বোই পিত্তিমীত বেক খবরানি আমি পের। এদক্যে শিক্কে-দিক্কেই ভালেদি অনার পর এধক্যে গরি ভেইয়রে ভেইয়ে মারে ফেলানা দেশ জাদত্যাই শুভ নঅয়।

মর এ তুদি কন্না বা শুনিব! গোদা পিত্তিমীত্ যিয়ান বাংলরা ভাঝে কন “স্বার্থপর” সে স্বার্থপর এচ্যা কোণা-কুণি, গোণা-গুণি সেরে সুমি আগে। আগ দিনত এক বদল মদত্তোই ভজিলে মাজন্যা মনান গলি যায়। ইক্কে! তেঙা। বানা তেঙা। তেঙা নয় জাত্তুরে আগে বাজে রাঘা পরিব। জাত্তুন ন বাজিলে সে তেঙা কন দাম নেই। ইরুক দিনত এক্কান কধা ভারি গরি কন্, “ তেঙা থেলে গাঙহ্ পানি আগারেদি নাল আহ্দি যায়”। এধক্যে আমি ন’ চেই। এচ্যা কযেক মাজ অল ভেইয়ে ভেইয়ে মারা-মারি শুনা ন’যায়। যানে, হত্তমান সঞ্জুক, বল্ পিয়ে লাগে সিয়ান দ কন ভাজে ফগদাঙ গরিবার বল্ নেই। মাত্তর, এ’ কয়দ ১/২ মাস আগেত্তুন ধুরি এধক্যে আর নুয়ো গরি দিঘির, শুনির। ইয়ানি তমা নুয়ো পিঁরিউনে চেবার, শুনিবার, দিঘীবার ন’ সান। তারা চান, আগাজত পেইখসান এথুমত্তুন ওথুমত দুয়ো মিলি উড়িবার। তারা চান, দোল এক্কান ঘর-সংসার। যে সংসারত কন কোল্-কজ্যা নেই, হিংসে-পিজুম, রুগ-রুগ্যা নেই। যে সংসারত দুগ নেই, নেই কানানি বানা থেব আজি র্আ আজি, আলুল্লেরা-দুলুল্লো দোল এক্কান জীংহানি। সে জীংহানি দিদ চাই হিল চাদেগাং। সালেন তুসি কি পারিবা মা’মেদেনী সবন পালেদি???

(১৪/১২/১৬ বরগাঙ)