 |
| সাহিত্য তেম্মাঙ। লালন দা ঘরত। |
পুগ’ আগাজত রাঙা বেলান উদিব’
পজিম মোনত বেল ছদক পরিহ্’ব
সক্যে তেহ্,
বিঝু তরে-
মন খুলি, চিত খুলি
তল পেদত্তুন ছাগি তুলি কিজেক কারিম;
সাত নাল সুদোলোই বেরেহ্ রাঘেম,
সাত জাদি ফুল তুলি সাত ব্যান, সাত রেত
সং পুজি বিদেয় জানেম।
ইক্যে দ’ দিন কাদাকাথ্যা
চেরো মেক্যে ঘুরঘুচ্যা কালা মেক
অনসুর আগাচ বোময়, পেরাক কারে
ঝালগা ঝলগা বোইয়ের
এক লেজাত্তুন এক লেজা দাঙর!
এ্যালুনি পেলুনি গরিদের হিল চাদিগাঙ।
অপজহ (অহংকারি) বর ব’ত,
কন’ কিচ্ছু তান ন’ মানের
মুজুঙত যিয়েন পায় সিনি নেযার
নেই আর মুই আগ’ সান অলুঙ অনুসার (পশ্চাদপদ),
এধক্যে গরি কেনে লোম গজি তরে
বিঝু তুই এযরত ভিলে।
বিঝু!
তুই এযত ম’ বুগত
কি আঘে মর ইক্যে!
বানা আঘঙ ছলঙান।
দেঘর দ’-
মরা থের থের গরি, দি এক্কান ধভুল কের বাদে
বার গরিবা কি আঘে?
বিঝু!
কি কোই বোঝেম তরে!
ভারদ’ হনুমান্যা অদুঙ দেঘেদুঙ বুক সিরি,
আভাকবাক গরি, এ অট্টীযনা (জালাতন) বুক ভরন
দিঘিলেন সক্যে।
দুলু বাজর সীম সীম্যা দুলুগত ঘা
থেপ থেপ লো জুরি পরের।
ইক্যে মুই-
আঘঙ!
আঘঙ!
আঘঙ মুই
কুল নেই সাগরক ভাজি ভাজি।
তুই এলে খুজি মনে
ম’ সিদু, ন’ পারঙ তরে লোবিয়ত গরি
সিত্যাই তুই যেলে পর’ সিদু?
তুই দ’ সালেন দুলধচ্যা (দালাল), তুগুন বাচ?
না, না, না-
ত ধক সেধক্যে নয়!
সালেন কিত্তেই-
পৈনাল গরি আহ্’দিলে রাজ পদে পদে
ধুলে দগরে বেড়র?
বুঝিলুঙ, বুঝিলুং-
ত’ ধক সেধক্যে নয়।
বেড়া যেলে বানা তুই,
সিত্তেই তরে দিঘি খুজি অই
ভিন জাদর সুদোমলোই ভিন জাদে গজি লদন।
যেক্কে উদিব’ পুগ আগাজ বেলান
সেক্যে তুই ম’ বুগত ফিরি এইচ
ইক্যে মুই আঘঙ ভারি দিন কাদাকাথ্যাত।
ছবি: লুসি চাঙমা।
কোন মন্তব্য নেই:
একটি মন্তব্য পোস্ট করুন