কদক তচ্যা গমি যেব

কামাক্কাই কোই যায়, ইরুক দিনর চাঙমা জাত্তো দ্বি/তিন ভাগে ফারক। ইয়ান জুম্ম জাত্তোত্যাই বিরেত খোদাকতালাক-আগাজ বাজ। পুরনি আমলত্তুন ধুরি নানাঙ রাজনৈতিক উত্থান পতন ক্রমবিবর্তনের পদ ধুরি মুজুঙে উজাদে উজাদে এক অক্তত চাদেগাঙত এন্যাই থিদব্বরী ঊয়োন। মাত্তর এ থিদব্বরী শেজ অধে বেজ সময় ন লাগে। তারার এক্কু অংশ একসময় নানাঙ কারনে মূল ভূখণ্ডত্তুন অন্য কিত্তে ধেই যেই পিয়োন। বৃট্রিশ শাসনামলত বিংশ শতাব্দী প্রারম্ভে বুকুত চাঙমা পরিবার কাদে-কাযে রেয্যত ধেই যেউন। তা পিজেদি এল রাজনৈতিক কারন। ভারত-পাকিস্তান ভাগ ন অবার আঘেন্দি হিল চাদেগাঙ এল চাঙমাউনর চাগালা। মোট মোট জনসংখ্যা ৯৫% এলাক চাঙমা। এ চাঙমাউনর রেয্যয়ান ১৯৪৮ সালত পাকিম্তানর ভাগত পল্লে  বকুত চাঙমা সরকারী কর্মচারী ভারদত ধেই যিয়ন। চাঙমা পত্তম গ্রাজুয়েট দাঙগু যামিনি কুমার দেবান, এমবিবিএস নির্মল চন্দ্র দেবান আ পত্তম নিদুকতুক্যা আইসিএস অফিসার মুকুল কান্তি খীসা এই ডাঙর ডাঙর শিক্কিত মানেউনে দেচ ছারি যানারচাঙমাউনর বিরেত অপূরণীয় ক্ষতি অয়্। তারার ইত্তোকুদুমউন টিবিরে রেয্যত লারে লারে থিদব্বরীউয়ন। আ যারা স্বদেজত এলাক তারার নানাঙ তচ্যা, পেরাসানি, করোল্লো অই আধামরা। বিজগত দেঘা যায়,”১৯৫১ সালত জেলা সেনাসার্স রিপোর্টত কোইয়ে এ জেলাত অর্থনৈতিক অবস্থা সন্তোষ জনক নয়। বহিরাগত উনর আহ্দত বেক্ ব্যবসা বানিজ্যা। এই জেলাত ৬৬য়ান বাজার আঘে এ সেরে খুউব কম সংখ্যক আদিবাসী দোকানর মালিক। ফেরীওয়ালাউন বেক চট্টগ্রামত্তুন ইচ্যা বাঙাল।”
হিল চাদেগাঙর বাজারানি লারে লারে বাঙালীউনে সংবদ্ধ নিয়ন্ত্রণ গচ্ছোন যে, আদিবাসীউনে তারা মালানি অজেঅজ দাম ন পান। এ পোদ্যানে একজন পর্যবেক্খ লিক্খ্যা—-
“বাঙালি ব্যবসাউনর কানে কানে, চুপে চুপে সল্লা এল সল্লা এল আদিবাসীউনর থোনপাত্, ফল মূল মালামাল সল্লা দামত্তুন বেচ দিন্যাই ন কিনেনা। এ দাম বাজার দরত্তুন বুকুত  কমে। আদা ন্যায্য বাজার এল সের পত্তা পাচ টেঙা। সক্যেনে বান্দর বানত বাজারত এক আদিবাসী ৫/- মণ দরে এক্কু দোকানত আদা বিজ্যা। ইয়ান দ্বি’চোগে ন দেলে বিশ্চেস ন এযে। মাত্তর, ইয়ান বাস্তব সত্য। মুই নিজে বাজারত যেন্যাই দিক্খোং এক আদাবসী মিলেত্তুন ১০০ কাখুজি ২০/- দিন্যাই এক বাঙালেত্তুন বিজ্যা। ৫মিনিত পরে বাঙল্যা আ এক চিটাগাঙত্তু ইচ্যাবাঙাল্লেত্তুন ৭৫%টেঙা দিন্যাই বিচ্চে।”
১৯৭৮সালত ১৯ এপ্রিল ইকনমিক এণ্ড পলিটাকেল উই কলিত কোই অয়, পার্বত্য চট্টগ্রামত কলকারখানা প্রতিষ্ঠিত ফলে আদিবাসীউনর কন লাভ নেই। কিত্তেই, ইয়ত বেক পদত্থানিত অআদিবাসীউনরে নিয়োগ দ্যি অয়্যা। ইয়ত আর কলকারখানা বজানা মানে সংভূইর অআদাবাসীউনরে চাকরী দেনা আ আদিবাসীউনরে তচ্যা-পেরাসানি বাড়ে দেনা। যেমন, চন্দ্রঘন্র কাগোজকারখানাত ছ’আজার শ্রমিক কর্মচারী উনর সেরে আদিবাসী বানা ৪০জন।
১৯৭৩-৭৪ সালত পার্বত্যচট্টগ্রাম দীঘিনালা, রুমা, আলীকদম এ তিনান মিলিটারী ক্যান্টনমেন্ট থিদব্বরী গরা অয়্যা শুরু অল লাড়েই। হিলচাদেগাঙর বুগত বারেট কালা মেঘ চাগা জনম লুয়্যা। রাঙামাত্যা, খাগাড়াছড়ি, দীঘিনালা আ বান্দবনত চেরান ব্রিগট হেডকোয়াটার, রুমা আ আলীকদম দ্বি’য়ান গ্যারিসন, পত্তিক উপজেলাত সেনা ছাউনি, কাপ্তায়ত দ্বি’য়ান গান ভোট, বান্দরবান আ গুইমারাত পাচ্চান রিজিওন্যাল হেডকোয়াটার, তেইচ্চান আর্মি জোন, তিনান বিডিআর জোন,মালছড়িত এক্কান এন্টিগেরিলা ট্রেনিংসেন্টার চালু অয়। এ বাদে দ্বি’শ ত্রিশ্চান আর্মি ক্যাম্প, এক’শয়ান বিডিআর ক্যাম্প আ আশি’য়ান পুলিশ ক্যাম্প থিদব্বরী গরা অয়্যা। এ সংখ্যা আর বাড়ি যিয়ে। গদা পার্বত্যচট্টগ্রামত সাম্মুউল স্ন ফুদি আঘে। যা জুম্মউনরে কামা’মাধাত খাচ্চে গাছ গুরি রাঘানা। বানা সিয়ান নয়, এ সিদিরে পুক্কুণ্যা বোনর লো’য়ে রাঙা গুরি দ্যুন মা-ভূমি। ভেইয়োর লো’য়ে ভিজি দ্যুন মোন মুড়। এজ মা-বোনর দ্বি’চোগত বারিষ্যা লামে, বান অয়। শাসক গোষ্ঠীউনে আমারে থুম গরি দেনা জালান বুনোনা থুম ন অয়। বানি যাদন। মিজে মিজে ইস্যু নিনেই সেটেরার বাঙালউনে হরতাল, অবরোধ, ধর্মঘট, মিছিল, মিটিং গরন। মাত্তর আমি……………..!!!!!
বুবে স্ববন দেঘে পারা। কোি ন পারে। দাগে কোই যিয়োন ভাঙি কলে রণ গরে, মনত থোলে গুণ গরে। বুগ কধা বুগত রাগানা দোল। এ তচ্যা বুগত বানি, আপন মনে জীংকানি তোড়ানাদন একদিন পুগ মোন মাধাত বেন্যা রাঙা বেল আজিবু এই আজায়।

এপ্রিল ৬, ২০১৬ Injeb Changma নিজো লেগা, রাজনীতি