চাঙমা জাদর মরন কাভুক কাপ্তে গদায়ানে কারি নিল
জাদর সুগ-শান্তি। ভাঙি দিল মনর অতালিয়ে স্ববন। কলং ছিত্রিং’পাত্রাং।
পুত্তোপারা অই ছিদি পচ্ছেই নেপা(অরুনাচল), বার্মা, মিজোরামসমুত্তু
কোণা-কুণি, গোণা-গুণি ছেড়ে, নানাঙ কিত্যাত। মা’কারেল তা আওজর পুঅ, বা’কারেল
তা’আওজর ঝি’। ইক্কে গরি নেকে-মোকে ফারক অইবাকী জীংকানি
বুগদিপ্যা’দিপ্প্যা, বেসঞ্জুক গরি একবুগ আবিল্যাজই দিন’কাল তোড়ে পিয়ন,
তোড়াদন। ইয়ান আমা চাঙমা জাদর বাস্তব চিত্র। কালা বিজগ। এচ্যে যারা দেচ কুলত
আগন তারা খুউব গম নেই। আ যারা দেচকুর ফেলে বেদেজত আগন তারা কি গম আগন???
মিজোরামত যারা আগন তারাদ দরদর থরথর। কুউকিউনে তারারে তুলি দিবার চাদন।
নানাঙ তচ্যা পেরাশানিত আঘন।তেহ্, অন্য দচ/পাজ সান ১৯৭৯ সালত দাঙগু মকর কান্তি চাঙমা(ত্রিদ্বিপ) সশস্ত্র গ্রুপত যোগ দ্যি। গৃহযুদ্ধ শেজ গরি ১৯৯১ সালত বুড় মা বাপর টানে ঘরত ফিরিল। ঘর সংসার গরল্ল। ন্যঅ স্ববন বিজি সারেই তা জীংকানিয়ান সাজেবাত্যা ার এক লাড়েয়ত আমিজে মিজি এল। ত্যঅ জাত্তোরে কুরি ফেলে ন পারে- ন পটরে দেচ্চানরে। দেচ, জাদর টানে কনসুচুক্যা দিনমাধানত্তুন ধুরি ২০০৫ সাল সং গ্রাম পঞ্ঝায়েত জধানানু কামান নিশুলি, নিঅালঝি গরি পালন গচ্ছে। সিত্যাই, এচ্চে তারর পত্তিক কধামাধাত, কামত ইদোত তুলন, নাঙ গিনন। আবিল্যাজখান তে ন’থানার, হয়দ স্বাভাবিক ভাবে পুজোর এযে তে কুদু? কি অয়্যা? তে, আগে, বাজি আগে খাগাড়া ছড়ি জেলখাজাদত। এচ্চে তিন বজর আট মাজ পশিচ দিন পুরন অল।
মুই যা স্ববনর কধা কধুং চাঙর তে মকর কান্তি চাঙমা। শান্তা বাহিনীত থাক্কে তারে ত্রিদ্বিপ নাঙে ডাগন। ২০০৬ সালত ১৪ জুন পত্তিক দিনর সান দিঘীনালা উপজেলা মেরুং বাজারত পান বেজা যেন্যাই পুলিশে ধুরি জেল খানাত ঢোগে দুন। ইয়ানরে কয় দেবা কালা নেই গরি আগাজর বাজ পরানা। তবে ইয়োত বিরেট এক্কান বিজগ আগে, আগে যড়যন্ত্র। সে যড়যন্ত্র শিকার এ্যে মুই বনবাসত আ মকর কান্তি জেলখানাত। সে যড়যন্ত্র যতই দরমর ওক সত্যই একদিন এই দিগত্তুন আমারে এরান গরিব। কিত্যাই, মকর কান্তি এই পোইদ্যানে সুদ্দ-সাঙ্গ, পবিত্র। শত শত মানুচ তাল্লাই কানদন, আবিল্যাজ খাদন।
যা ওক, মর এ লেগায়ান মকর কান্তি স্ববন নিনেই। সিত্যাই অন্য কধা ন’ বাড়েলুঙ। অক কধা কধ গেলে, মকর কান্কি এক্কান নীতি আর্দশ নাঙ, সুদ্দ-সাঙ্গ নাঙ। যার কন দাগ নেই। তার খুউব কায় এলুঙ মুই।তার পত্তিক কধা-বাত্তায়, চিদে চযজায় থুব থুব ফুল ফুদন।
অন্যান্য আদামর তুলনায় বাজেই ছড়া আদামান ভালেদি ন এল। আদামত লেঘা-পড়া খুউব ভালদি ন এল অন্য আদামানি তুলনায়। বানা জুয়া আ জুয়া। এক সময় আদামর মরোব্বিউনে গত্তনাত কারমনিয়াম টাঙে ঘর বেড়েই বেড়েই মদ ভাঙ খেই আদামান ভরি তুলিদাক। উত্তর কোণা দয়িন কণা দ্বি’ ভাগে ভাগ অবার অক্ত। এল রুগ-রুগ্যা। আদামর গাবুজ্জে গাবুরি বেড়া-বেড়ি হরি ন পারিদাক।এ দক্যে দিনত্তুন মকর কান্তি তা ভালেদি চিদে চযযাত্তুন দোল এক্কান সমাচ ফিরি আনিল। এক জনর আ একজনর উগুরে বিশ্চেস আ কোচপানা সংসারত শান্তি ডাগি আনে আ মদ ভাঙ খেই খেই ঘর বেড়েলে সমাচ ভাঙে। সিত্যাই, মকর কান্তি সে মদ সমাজত ন মিজি বজং মানুচর সান ঘর সংসার আ সমাজ ভালেদিত্যাই তিগুচ্যা মিজি থেদ। স্বয়ং তে, এক আজার কাত্থোল গাছ লাগেই নিজ কামান ডাঙর আ মদ ভাঙ খেই অযথা সময় নষ্ট গরানা বজং ইয়ান সমাজরে দেঘেই দিয়্যা। তা মুহ্ত সবম্ববন এল এক্কান আদর্শ আদাম, তজিম পুর আদাম, দোল সমাজ থিদব্বরী গরানা। আ এক্কান আওজ এল পাঠার বানানা, বানানা সমবায়সমিতি। সক্যে পাঠাগার বানে ন পাল্লেয়্যু সমবায়সমিতি বানেয়ে ১৯৯৯ সালত। ২০০৬ সালত প্রায় ২৫০০০ টেঙা জমা উয়োন। উদ্দেচ্চো এল ২০০৮ সালত জীব গাড়ি আ ২০০ শতক জাগাত পুজকুনিত মাছ ছাচ গরানা।
এতো স্বন, এ তো পথচলা।ইক্যে ইক্কু সমাজ চেজিয়্যারে জেলখানাত রাগানা দেচ আ সমাচ বিরেট ক্ষতি।
মাক্তর, এচ্যে! থিবুরুক খা’পচ্চে। ভাঙ গেল দোল এক্কান স্ববন, দোল এক্কান ঘর সংসার। যে সংসারত তিহুচ্যা অাজি মিজি থেদ, সে সংসার এচ্চে ছারানাদা। ধীমে ধীমে অল বাজেই ছড়া,। সে মামলা তদারক গত্তে সমিতি টেঙা ন কোলেই, তার ৪০শতক ভূই বেজা অয়্যা আ ১ম শ্রেণী ভূই ৬০ শতক বন্দকত আগে। বেক কিজু শেজ অই মকর কান্তি তিন্নু ঝি (চম্পা, দিপা, জোনাকি) পদ কিত্তে চেই আঘন, বাবা ফিরি এব আজায়।
তবে শেজ বলতে কিচ্চু নেই। একদিন মকর কান্তি ফিরি এব। বাজেই ছড়া ন্যুঅ গরি জাগি উদিব। গাজে গাজে ফুল ফুদিবাক, পেইগে গীদ শোনেবাক। পাগোন আভা ফিরিবু। সমাজত, আদামত দোল আভা বেই যেব। সেদক দিন সং গম থাগ, গম থাক্কু।
(২০১০ সালত ১২ফেব্রুয়ারীত লিক্কোং)
কোন মন্তব্য নেই:
একটি মন্তব্য পোস্ট করুন