 |
| ১৭ ডিসেম্বর ২০১৬খ্রি: পাবলাখালী কৃপাপুর সঃ প্রাঃ ইশকুলত চাঙমা লেঘা সার্টিফিকে বিতরণ অনুষ্ঠান। |
মুই এ’বজর(এপ্রিল ৪, ২০১৬ইং) ২৮নং রেংকার্য্যা মুউজ পাগলা মাজন্ আদামত্ চাঙমা লেঘা শেঘানা পোইদেনে সে আদামত্ যিয়োঙ। পাকালা মাজন্ কার্বায্যা দাঙগু লক্ষী বিকাশ চাঙমালোই মুজুঙো-মুজুঙি হলুঙ। তাত্তুন পুজোর্ গরল্লে তেহ্ কল, ‘‘আমার্ ভাদ্-পানি রাদ্।’’ আজলে মুই আঝা গচেছাঙ তেহ্ জাদর লেঘা, চাঙমা লেঘা শিঘানা রাদ কধা কব। আ মুইয়ু সিয়ান্ আঝা গরানা বজং বাদে কিচ্ছু নয়। আমা সমাজত্ এই কধায়ান ভাহদ গুরি কন্ ‘‘পেত্ থিক্ দনিয়ে থিক।’’ যে জাগাত্ ভাদ্-পানি রাদ্ সে জাগাত্ অন্য কিজু আঝা গরানা নিজরে হেমান সান্ ভাবঙর্। নানাঙ কধাবাত্তায় হবর পেলুং তারা সিয়োত(মেরুং ইউনিয়নর ভিদিরে) কায়-কুয় গুরি তিনান্ আদাম আগে(পাকাল মাজন পাড়া, জান্দিমুড় আ মধ্যেছড়া/শিবঙ্গ পাড়া আ ১০০-১১২গিরি থান)। এই আদামানি খাগাড়াছড়ি উপজেলা সিমিনেত্। ১৯৮৫খ্রিঃ ১৯শে ডিসেম্বরত রঞ্জনমণি কার্বারী আদম্যা মানেইউনরে আর্মি-বাঙালে কাবিলে পরান্ বাজেবাত্যাই তারা ২৯নং ছোট মেরম্নং ভূইয়োছড়া আদামত্তুন পাকালা মহাজনপাড়া, জান্দিমুড় আ মধ্যেছড়াত ধেই যেই কন বাবত্যাই বাহ্ বানি আঘন। ইরম্নক দিনত পাকালা মাজন পাড়াত্ এক্কান প্রাইমারি ইশকুল(সরকারর ঘোষিত ৩য় ধাপ) থিদববর গরল্লেয়্যু কন টিবিল-বেঞ্চ নেই। বানা কাগজত কলম্মোই লেঘা আগে পাগলা ‘‘মহাজন পাড়া সরকারী প্রাথমিক বিদ্যালয়’’। ইক্কুলত চের জন মাষ্টর থেলেয়্যু তারা ক্লাস ন গরন। ক্লাস ন গরানা কারন অলদে বেতন ন পান আ মাষ্টরুন ঘরানি চৌধুরী পাড়া(৮/১০কি.মি. দুরত, ছড়াগাঙ আমোন-মুড় ভাঙি ভাঙি যা পরে<খবর পিয়োঙ, এই ইশকুলান বোইরে ফেলে দ্যি)। সিত্যাই, আদাম্যেউনে বজর হিরিজ গরি ইক্কু পারন দ্বি’বে পারন প্রাইভেত্ ইজেবে মাষ্টর রাঘান। ইক্কু বটগাজ তলে একছালাগুরি ৮- ১২ আহ্দ লাম্বা-বাধি ইশকুল ঘরান। মাধা উগুরি রাঙা-এ্যাইল এক্কান বাবদা পত্পত্ গুরি উড়ে।
কধাবাত্তা কধে কধে কার্বায্যা মরে গাদিম্ নিনা পুজর গরলস্ন। ইক্কে গাদদে গেলে ৩/৪ ঘন্টা লাগিব। হিত্যাই, ঝুরিত পানি নেই। ঝুরি ভিদিরে ইক্কুগুরি কুওত্ পানি থায় সিয়োত্ ১০/১২ গিরিয়ে লারছার গরন। সে কুওবুয়ো নালমরা। বেল্যামাধান অলে বেগে কামত্তুন এযন, পানি হযা যান, গাদন। তেহ্ কল, তারা পোত্যা রাধা ডাগত্ ঘুমত্তুন উদি পানি হযা যা পরে। দিরি অলে বাঢা ন পায়।
আ জুম্! জুম গুরি গুরি কয়বি ধান গলাত তুলি পারন। ইন্দি কাবদে খেই পুরান। এক্কান কধা আগে, ‘‘ভাদ মাজ্যা ক’বুয়ো গিরি’’। ইক্কে সিয়ান নেই। ইয়ানি দ্বি’চোগে ন দিঘিলে বিশ্চেস ন এযে। পাদার্ থিয়্যা জুম্ নেই। বেক্ জগলা অই যিয়্যা। ছড়া-ছড়িত পানি নেই। নেই চিঙে-ঢুধুক বানেবার বাজ। বেজ ঢেরি ন অল, ২০০০সালত্ এই আদামানিত মজা ঘর এল। অজল অজল পিবেক কাবিয়্যা গলা ঘর। ইক্কে! চিওন চিওন ভাঙা মাত্যা ঘর। সিত্যাই, দাঙগু কার্বায়্যার্ চাঙমা লেঘা রাদ কধা কধ ন চায়।
বানা তারা এ’দজাত নয়। তারা সান্যা বেগোদো মানেই এধক্যা দুগত্ দিন কাল তোড়াদন। নেই থিদ। বান্দর সান্ এ’মুড়ত্তুন ও মুড়ত্ জুম্ কাবি কাবি জীংহানি তোড়াদন। ঝার থোনপাত বিজিবিজি কন বাবদে পরানানি তোড়াদন। যা ওক্! ইয়ান গেল জনম দুগী মানেয়োর কধা।
এচ্যে যারা লেঘা-পড়া শিঘি চাগরী-বাগরী গত্তন তারা দ জাদর বারবো দরপ্পানিত্ চোক্ নেই। পেনোন্ -হাদি লারছার ন’গরিনেই সেলোয়ার-কামিজ-শাড়ী, জাদর লেঘা ন’ শেঘেনেই বাংলা-ইংরেজী, আমনর্ ভাচ ন’ শেঘেনেই পর ভাচ্ লারছার গরি। সে জাত্ দুগত্ ন’থেব কন্ জাত্ দুঘত্ থেব??? কধা আগে ‘‘আমন ভাচ্ আমনর লেঘা আমনর গীত- ন’জানিলে ন’থায় চিত্’’। এচ্যা সেনে আমাত্তুন চিত নেই, নেই পরান্! বেইয়ে বেইয়ে রম্নগরম্নক্যা। সিত্যাই দাঙগু নুয়োরামে হোই যিয়ে,‘‘ অজল পাগজ্যা নিজ ঝুপ্, দিন দিন পরেলিস্ন হুলি যুগ। হুলি যুগত্ সত্য নেই বুক্ ছিরি দেঘেলেয়ু বিশ্চেস নেই’’।
ত্যুয় মর ইরম্নক দিনর পড়োয়া ভেই-বোনুনরে দিঘি বুক ভরি যার। অন্তত তারা কিয়োঙত গেলে পিনোন-হাদি পিনোন। পিনোনুহাদি ছবি দিন্যাই ফেসবুকত পেইজখুলদন, আমনর লেঘা, আমনর ভাচ্ লারছার গত্তন। আর এক্কান সুগর খবর অলদে, গেলেস্ন ০৭/১২/২০১৬খ্রি:দিঘীনালা ডিগ্রী কলেজর ইক্কু ভেই রেত্ মরে ফোন দিন্যাই চাঙমা লেঘা বই আগন নিনা তালাচ লর। তারা নিনা চিৎমরঙ ইদু শিক্ষা সফরত যাদন। সিদু যারা যারা যেবাক তারারে চাঙমা লেঘা বই বুক্সিচ(উপহার) দিবাক। ইয়ান হামাক্কাই জাত্তুরে মুজুঙে আক্কোই নিবার ডাঙর ধক। আ নানাঙ জাগাত্ চাঙমা লেঘা কোর্স চালু অয়্যা। এই ধারবু মুজুঙে উজে যোক – থিদ্ ওক। লেঙে লেঙে, ফোপে ফোপে অলেয়্যু যে যেঙরি পারে তে সেঙরি জাত্তুত্যাই কাম গরা পরিব। দাগে হোই যিয়ন, ‘‘ কালা বেঙেনা হেইদ দাত্ খায়’’। ইক্কে গুরি একদিন আমি আমা জাত্তুরে তজিমপুর গরি পারিবং।
কোন মন্তব্য নেই:
একটি মন্তব্য পোস্ট করুন