কদক পারমি বলে এস্যে মানব কুলত্ ভজমান দাঙগু তরুনী কুমার চাঙমা আ দাঙগুবী বিজয় শোভা চাঙমা সুক্-দুগর্ দোল এক্কান সোনার সংসারত্ বেগ দাঙর পুঅ হিজেবে জনম লনাই মুই নিজরে অজল-দাঙর্ ভাবঙ। মাত্তর, মা-বাপর অতালিয়ে আঝা-সবন হয়দ পুরেই দি’ন পারঙর। এ পুজি যুগত রুজি খারাত্ মুই নেই। আত্তুয়া খেইয়ে এক মানেই। ইক্কে দনিয়ে সুদোম, অন মা-বাবে ন চাঙ এ পুজি যুগত পুঅ/ছা’য়ে ফগির কদোক। নাদং ছারা জীংহানি তোরাদোক। বেগর সবন গাড়ি-বাড়ি, সুগর দোল এক্কান সংসার। যে সংসারত তিগুচ্যা আজি ঝুরি পত্ত। দুগ ন’ থেদ।
মাত্তর! মুই গুরি বেড়াং তিদিক তিদিক এ কোণাত্তুন অই কোণাত। ফগির। সিত্যাই মরে নিনেই মা-বাপর যদ চিদে। না, মুই ফগির নয়! মুই পাগল জাত্তুত্যাই। স্ববন এল জাত্তুত্যাই কাম গুরিম। কাম গুরি যেম। এই আঝা নিনেই মাদত আগঙ। হনসুচুক্যা দিন মাধানত ধন্ বল্ ন থানার বেজ দুরত ঘুরিবার জু ন অলেয়ু দিঘীনালা উপজেলাবুত ঘরিবার বল আগে। সিত্যাই যা সেদাম আগে আমন ভাচ অমনর অঝাপাত পিত্তিমী বুগত থিদববরীত্যাই কাম গরঙ। ইয়ানিলোই মা’ তোমার বুগ ন ভরে খবর পাঙ। বুড় কালে দুগ পর্ । কি গরিম মা? তোমা শেব বর্তায় এস্যে পিত্তিমী মু দেঘঙর। তোমা শেব বর্তায় ইনজেব চাঙমা নামে দজ পাচজনে চিনন। ত্যুঅ তোমার বুগ ন ভরে!
মা! ও মা! মুই তোমা পুঅ নয় ভাবি নেয। ম’নাঙে তোমা পুঅ নেই। তোমা দুগ দিনত তোমারে যুনি এক চিলোন দারু খাবেবার জু মর ন অয় কিত্যাই তোমা পুঅ কলুঙ। আজলে ভাবদে মরয়ু দুগে বুক ফাদি যার। এই কধানি কধে ম গত্তনাবু গেইত্ বুদি এযে। ত্যুঅ কোই পাঙর মা! কি গরি, কদক্ দুগে হনচুসুক্যা দিন-মাধানত লেঘা পরা শেঘেয়ু। ইয়ানি মর চোগত্ তল। আদা ফুল বিজি বিজি লেঘা শেঘেয়ু। মোন – মুড় ভঙি ভঙি, ছড়াগাঙ সিরি মরা মোচ্যা গরি হুলোদ বিজি বিজি এস্যে মরে দাঙর দিঙর গজ্যে। এক্কান সুগর আজায়। সে অক্তত , এ মাধানত মর এজাল ন পর। ইয়ান বানা তোমা দুগ নয়। মরয়ু দুগ।
কি গরিম মা! জাত্তুরে আগে রিনি চা পরের। আমা ভাচ, অঝাপাত, সাহিত্য-সংস্কৃতি বেক লুগি যার। ইয়ানি বাজে রাঘা পরিব। অয় মা! তোমা কধানি থিক। এস্যে আমা সমাজত দাঙর দাঙর অজল অজল শিক্কিত মানেই আগন। তারা অলর আ ম সান্যে এক বজং মানেইয়ে এদক্যে কাম গরানা শোবা ন পায়। ত্যুঅ কিত্যাই গরিবার মনে অয় কিজেনী মা। গরি যেম।
বা! ও বা! ত কধানি আমল দি শুনি থাং। অয়, ম দ নয় ভগবানর দিবে সোনা মানিক আগন। তারাত্যাই কিচ্ছু গরি ন পারঙর। তবে বা, মুই তারারে ইক্কু পাঠাগার বানেই দিলুং। তুমি বিশ্চে গর এই পাঠাগরবু তারারে অজলত তুলিব। তুমি চিদে গুরি ন দুঅ। কি গুরিম বাঃ, জাত্তু বেহালত আগে। যা সেদামে কলাই জাত্তুরে এক্কা অলেয়ু বেইলত আনি পারিম এ বিশ্চেস ম আগে।
ঝু ঝু
কোন মন্তব্য নেই:
একটি মন্তব্য পোস্ট করুন