 |
| সুনানু মুকুন্দ চাঙমা। ছবি: ইনজেব চাঙমা |
পুরান’ কধা ইধোত তুল্লে মনান কেঝান গরে,
পরানে কয়দে সেধক্যা গরি থেদুং জনম ভরে।
চিগন কালর সে সব খেলা, সে সব সঙ্গি ভেই;
জীবন সাগরত ধুবি যিয়ন- ইক্যেনে কিচ্ছু নেই!
বেইল্যা অহ্’লে “গুদু খেলা” আরও কদক কি,
দ্বিবর কাল্যা “নাদেং খেলা” মনত পরে নি?
সে কধানি মনত তুল্লে মস্ত সুখ লাগে,
স্যানি ভাবি ইক্যেনি খেলদুং পরানে মাগে।
মুরা উবরে মোন’ - ঘরত বাঝি এক্কোয়া লই,
দগিন’ বয়্যার এজেরস্যা - গায় গায় রয়চ বই।
ধানুন উন্দি লুঙি এত্তন, তদেগ ধাবা পরে,
সিদ্যায় বিলি ম’ মা-বাপে ফেলি যিয়ন মরে।
পে’গে এলেস্যা বাদোল মারর, বাঝি বাজর উন্দি,
সময় সময় সিয়েইন্যায় চর পেক খাদন খুন্দি।
এক ঝলগা স্যা বয়্যার গেল ধানুন লারি ন্যায়
নুয়া গরিন্যায় বাজর বাঁঝি পরান ধরিন্যায়।
পুনং চানর জুন পহ্’রত সঙ্গী - সমার লই,
ত’ মন’ কধা করস্যা তুই এক্কান জাগাত বই।
সে কধানি ইধোত তুল্লে পরান কানি উদে,
পুরান কালর সুখ দিনত মনান ধাবা ছদে।
সেক্কে দিনর সে আহ্’জি - গীত, সে সব সঙ্গী ভেই
কুদু গেলাক - ইক্যেনে দ’ মত্তুন কেঅ নেই।
কোন মন্তব্য নেই:
একটি মন্তব্য পোস্ট করুন