জীংকানি- দাঙগু ইনজেব চাঙমা

জীংকানি আর’ এক্কান নাঙ কি দুক?
আমল গরি ভাবঙ,
আঙুল’ পাপ গনং,
যোক - বিয়োক - গুন - ভাক বেক গরি চাঙ
কন’ কিচ্ছুত মেলেই ন’ পারঙ।

ভাবং গাচ্ছুন নিনেই,
তারায়্য দ’ ম’ সান!
এক খেবত ফুলে পাগোরে
পেইখ’ কিজিক-কাজাগে ফাগোনর মিধে আহ্’জিয়ে
সাতমাচ্যা গুর’ ধক;
অনসুর বিঝু জগরা রুজি ঝরে।
আর এক অক্তত?
কি থাই তার?
পাদা, ফুল-ফল ঝুরি যেই
পিগিরে জেরেবার ব’ নেই।
কি আঝায় বাজি থাই?
ফাগোন চোত মাজ্যা ধাঙধাঙ্যা খরানত
দাঙর আঝা সবন বুগত বানি
তিগুচ্যা থাই থিয়ে।
ইআনর নাঙ কি জীংকানি?
যিয়েনরে নিনেই বার গরি,
দি চোগত সবন বুনি নিআলঝি গরি,
ঘুরঘুচ্যা বারিঝে ঝরত
সে সবন সে আঝা
ধংগা ভাঙি যাই, মিজি যাই ফুত্তে বালুচরত।
ইআন নাঙ কি জীংকানি?
নুয়ো ঝরে কোর উদে,
পিত্থিমীআন এ্যাইলে সাজে
গাজে গাজে ফুল ফুদোন
নানাঙ পেইখ গীদ’ সুরে
জাগি উদে মা মেদেনি
ইআনর নাঙ জীংকানি।