মা! - দাঙগু ইনজেব চাঙমা

ছবি: সুখেন্দু চাঙমা

উরগুম্যা দেবা সান ন’ মাদচ
ন’ বুলর, বানা আহ্নজাবাত দাবা দি
সানা ভুরবোত বজি
নিগুচ নিগুচ থানর।
চোক চেলে রাঙা, চুল জেধেরা
কি এধক আভিল্যাচ?
কবে মা? তুই আমারে।
মা! মা!! ও মা!!!

আমি দ’ ছাবলক অয়েই
এ্যাধো শিরে মোজুরি পারি
তর কি এধক কিত্তে চিদে?
কবে মা? তুই আমারে।
ও পুত! শুনি থাগ’ কঙ তমারে ভাঙি
ম’বুগর গরেঙর কধানি,
ছাবলক অইয়ো দাঙর কধা নয়-
তুমি দ’ আহ্’জে ফেল্লো জাদর সাহিত্য, সংস্কৃতি আনি।
ম’ ভাঝে ন’ মাদ’
ম’ আহ্’দে বুন্নে উরোন পিরোন ন’ রেন’
পর’ দরপ্পানি গম ভাব’
ইত্তুন বেচ আভিল্যাচ কি থেই পারে!
মরে তুমি ভাঙি ক’।
ত’ বাবা নেই, ত্যুঅ দ’-
রানি পিদি জংকানিত দাঙর গল্লুং তমারে।
তমা চোগত তলে
ইক্যে,
ঘর পাদা ধুজি নেই মাজারা
তুয়ো দ’ তুমি ন’ বুঝর
তুমিয়্য অই গেলা ছেত্রা।
ইক্যে মুই কারে নিনেই
বুক বানিম?
কা আঝায় দিন তোরেম?
তোমারে ভাবি থেনেই
কি মুই ভুল গচ্ছোঙ?
কধে চাঙ,
তুমি মরে কি বুক বানি দিবা?
না, মুই সন্দভাচ মাদঙর।
মর দুচ, বেক মর দুচ
ম’ কবাল গম অদ’
পর ভাঝে লেঘা শিঘি ন’ পেদা,
সক্যে,
নিজ’ ভাঝে নিজ’ অহ্’রগে
সাহিত্য চচযা গরি
মান, বজমান কোরেদা।