 |
| ৩০ জানুয়ারী ২০১৯ খ্রি. দৈনিক কালের কন্ঠ |
মুই বার বার কঙ, আমা চাঙমা জাত্তো যুনি পিত্তিমী বুগত মাজারা রাঘাদে বারি আগাথ্যা খেন অই এযের। কালা দিন বা কাল খেন আর কধক গঙে দিবং! কি গমি ন’ যায় চাঙমাউনর মাধা উগুরে? সিআনি কি এক্কায়্য ইধোত ন’ উদে? সে মিজিলিক দর, কুকি দর, মুখোশ বাহিনী দর, বাধি দর, জাত - বেজাদর দর সমুত্তু দেবানে দেবানে কোল বাজেই ২২ মুউজ’ চাঙমা কাবি পেলাক। সে দর এয’ থুম ন’ অয়। অনসুর এক বুক দর নিনেই কিঝু নুয়ো পিড়িউন কাম গরি যাদন। তারা কোনা-কুনি, গনা-গুনি সেরে মা ভাচ্ছান বাজে রাঘেবাত্তে রোদে পুরিহ্, ঝরে ভিজি আনুনি নুনচো আঙুল’ মাধায় মাধায় ভাত খেই আ কন’ সময় অনা ভাদে এ মুরহ্’ত্তুন ও মুরহ্’ত ভঙি বেরাদন।
ইক্যে তারা গণ প্রজাতন্ত্রী বাংলাদেচ সরকাররে এজাল দিবাত্তে দিঘীনালা, পানছড়ি, মালছড়ি সরকারী প্রাইমারি ইক্কুলাতি “ম’ বই’বো পড়েবাত্তে আক্কোই এলাক। সিআন গেল্লে ৩০ জানুয়ারী ২০১৯ খ্রি. #দৈনিক কালের কন্ঠ ফগদাঙ অয়ে- পাহাড়ে স্বেচ্ছাসেবী সংগঠণ ‘চাঙমা সাহিত্য বাহ্’ অন্ধকারে আলো শিরো নামে ফগদাঙ অয়্যা।
কধা এল’ তারা ফেব্রুয়ারী ভাঝর মাজত্তুন ধরি ক্লাশ আরগানি গরিবাক সাপ্তায় এক দিন। এ খবরান এটিও সুপায়ন খীসা গেল্লে মাজত মাসিক মিটিঙত পত্তিক সাত্থুয়াউনরে জানে দি দিয়্যা।
ইক্যে কধা কত্তে “আমি যুনি বেগে উযে ন’ এযি সালেন কন’ কাম বাক থুম গরি ন’ পারিবং। তুমি খবর প’ এচ্যে তারা জাত্তোরে কোচ পেনেই, দেচ্ছানরে কোচপেনেই মাগানা চাঙমা ম’ বইবো পড়েবাত্তে এত্তন তারা তমাত্তুন পাত্তুরুতুরু জানা দরগার। সে জাগাত তুমি তারে তচ্যা খাবেলে দ’ থিক ন’ অভ। তারা তমাসান বেতনধারি সাত্থুয়া নয়। তমাত্তুন তারারে এজাল দিয়্যা পরিব, জু গরি দিয়্যা পরিব। ইক্যে গরি আমি আমা ভাচ্ছান থিদ’ গরি পারিবং।
আমি খবর পেলং কন কন ইক্কুলত এয’ বই ন’ লুমনদোই। বেতনধারি সাত্থুয়া(শিক্ষক)উনে যারা মাগানা(বিনা বেতন) লেঘা শেঘেবাত্তে যাদন তারারে বইউন শিক্ষা অফিজত্তুন নিবার হুম দেদন। যিয়েন এক্কো মানুজর বিবেগে ন’ দে। মুই খবর ন’ পাঙর- কেনে তারা সে কধা আন কোই পারিলাক?
এধক্যে অলে কি আমা সমাচ, জাত ভালেদি এব? মুই তমা ইদু দ্বি আহ্ত জুরে তুদি গরিম - তমা কাম তুমি গর আমা কাম আমারে এজাল দিবার চ’। শিক্ষা অফিজত্তুন বই সরানা কামান আমার নয়, তমার।
