যে গদা জীংকানিসং নিজ’ ভালেদি কধা ন’ ভাবি চাঙমা ভাচ, ওক্কোর ভালেদি পদত আনিবাত্যাই লেতপেত গরি রয়ে তে অহ্’লদে কবি, সাহিত্যিক আ লেঘিয়্যা সুনানু নোয়ারাম চাঙমা। তে জনম ন’ অহ্’লে অঝাপাত হয়দ’ আহ্’জি যাদে আদং নেই। তার চেদন বলে এচ্যে আমি আমা অঝাপাত দোলে দোলে লারচার গরি পারির।
তারার জনম ২২ জানুয়ারি ১৯২২ খ্রি. মরন: ৮ নভেম্বর ১৯৭৮ খ্রি.।
সুনানু নোয়ারাম চাঙমা, বাপ: সুনানু শুক্রমণি চাঙমা, মা: সুনানু কালাবি চাঙমা। পুঅ/ছা: ১। বাসন্তী চাঙমা, ২। আরতি চাঙমা, বিরতি চাঙমা, ৪। মনদেবী চাঙমা, ৫। কল্যাণ সাধন চাঙমা, ৬। রিনা দেবী চাঙমা।
সুনানু নোয়ারাম চাঙমা নাবালক অক্ত গোমেতকুলত্তুন তা জেত্তা সুনানু সাপ্যে চাঙমা সমারে মিঙিনি চাগালাত বাজেইছড়া আদামত খুচ দিল’। সুনানু সাপ্যে চাঙমা গোমেত কুলত বেড়া যেনেই মা আহ্’রা সুনানু নোয়ারাম চাঙমারে লগে গরি আনে। লেঘা পড়া শিঘিবাত্যা এক্কো ভান্তে সমারে চিতমরং যেল’।
সক্যে এ ধক্যে গরি আদামে আদামে কিয়োং, ইক্কুল ন’ এল’। চিতমরঙত্তুন চংড়াছড়ি ফুলচান কারবারি পাড়া আদামত কন’ এক্কান কেজ্জোত ফাং গরি আনিলে সে ভান্তে লোই সুনানু সাপ্যে চাঙমা দেঘা অহ্’য়। নানান কধা সেরে সুনানু সাপ্যে চাঙমা ভান্তেরে সুনানু নোয়ারাম চাঙমা কধা কয়। ভান্তেত্তুন চিতপুরি উদি লেঘা শেঘেবাত্যা তা সমারে চিতমরঙত নিল। ভান্তের আর’ এক্কো গুর এল’। তা নাঙ সুনানু কালীকুমার চাঙমা। কালি কুমার চাঙমা সুনানু নোয়ারাম চাঙমাত্তুন কিয়্যাদি উজোল অহ্’য় ভজান। তারা দি’ জনে থেদাক-খেদাক আ এক সমারে ইক্কুলত যেদাক। ইক্যে গরি ক্লাশ ত্রিত উদিলাক। সুনানু কালি কুমার চাঙমা সল্লা পরামর্শলোই সুনানু নোয়ারাম চাঙমা চলি পেদ। তা কধা ন’ মুনিলে সেজা খেই পায়। সুনানু কালি কুমার চাঙমা ভারি ধেং এল’। অক্তমজিম ইক্কুলত ন’ যায়। গেলেয়্য পদত পল্লে থায়। আ সুনানু নোয়ারামরেয়্য ইক্কুলত যেবার বানা গরে। যে দিন ইক্কুলত যানা ন’ অভ’ সে দিনত তারা ধেং গরিদাক। কুচ্চেল চর গরি খেই দিদাক। এক দিন সে কারবারানি ভান্তে কানত এল’। ভান্তে সুনানু নেয়ারাম চাঙমাত্তুন পুজোর গরিলে সুনানু নোয়ারাম চাঙমা বানা সিরেবো পচ্চে পচ্চে থায়। তা ধক বুঝি ভান্তে কয়- তে চুর গরি ভিলিন তুইয়্য চুর গরিবে?
পরে ভান্তে তারারে কিয়োঙত ন’ রাঘেবার মঞ্জুক গরে। সিয়ান সুনানু কালি কুমার চাঙমা খবর পেল। সুনানু নোয়াম চাঙমারে দাগি কল এবার আমার ইধু থেবার জাগা নেই। কলিকাতাত ধেই যেই। ভান্তে আমারে ধাবে দিবার কর। সুনানু নোয়ারাম চাঙমা এক্কা চিদে সমেল’। মাত্তর কি গরিব’ ভাবি কুল ন’ পায়। তে চায় লেঘা পড়া গরিবার। সুনানু কালি কুমার চাঙমা সুনানু নোয়ারামরে বার বার কুজোলী গরে ধেই যেবার। পরে নোয়ারাম চাঙমারে বুক বানি দিনেই কল। চিদে ন’ গরিচ, তুই বানা ম’ সমারে যেলে অভ। মুই বেক জুগল গরিম।
দিন পুর থিক গরি তারা কলিকাতা মুক্কে লর দিলাক। ইন্দি ভান্তে খবর পেল। বেক জাগায় জাগায় খবর দিল। কয়েক দিন পর কন’ বন্দরত্তুন তারারে ধরি আনি ভান্তে ইধু গজে দিলাক। ইক্যে ভান্তে আর বেচ চিদে অহ্’ল। কয়েক দিন যাদে লংগদু ভাঙা মুড়ত্তুন যাত্রামণি নাঙে এক বন্দা চিতমরঙত মান্নে সেরা যায়। ভান্তে তারে কয়- এ গুরবোরে বাজেই ছড়া সাপ্যেরে গজে দি দিচ্ছোই।
ঘরত লুমি সুনানু সাপ্যে চাঙমা সুনানু নোয়ারাম চাঙমাত্তুন বেক উদ’ লোই পুজোর গরে তার ঘরত গরু চরা থেব নিনা। সুনানু নোয়ারাম চাঙমা রাজি অহ্’ল। কিত্তে, তার ডেনে চেলে নেই বাঙে চেলে নেই কন’ গাহ্’ত বাচ্যে কিত্তে কুদুম। তা জেত্তাবো সমারে এনেয়্য ভান্তেরে গজে দিল। ইআনি ভাবি বাজেইছড়া আদামত এবার তার বুক ন’ বানে। ইক্যে সুনানু যাত্রামণি চাঙমা ঘরত তার বাহ্ আ গরু চরানা।
সে ভাঙা মুড়ত এক্কো মাস্টর আঘে। তে লেঘা শেঘাদে সুনানু নোয়ারাম চাঙমা বজঙানি ধরি দে। এক দিন যাত্রামণি চাঙমা সিআন খবর পেই পুজোর গরি তুই চিতমরঙ’ ইদু কি গচ্ছোই। ভান্তে তারে লেঘা শেঘেয়্যা ভিলে অহ্’ল। ইয়ান খবর পেই সুনানু যাত্রা মণি চাঙমা তারে গরুচরানা বদলে মাস্টর বানেল। ইক্যে সুনানু নোয়ারাম চাঙমা মন’ বল ভারি গেল। জু পেলে কবিদ্যা লেঘে। নানাঙ শাত্র কধা কয়। ফাজালমি (কৌতুক) দেঘায়। চাদে চাদে বেগে তারে গম পান।
সুনানু যাত্রামণি চাঙমা তা ঝি ফুলেশ^রী চাঙমারে সুনানু নোয়ারাম চাঙমালোই বাজে দিবার মানুচ ধরিল। ফুলেশ^রীর মানচ্যের কোচ ন’ পিয়্যা বেধি আঘে, ফারাঙি (কুস্ত রোগ)। ত্যুঅ সুনানু নোয়ারাম চাঙমা রাজি অহ্’ল। যাত্রমণি ছাবা পেনেই ইক্যে তারে মাস্টর ইজেবে চিনন। বচন চেই এক মহেন্দ্র খেনত তারা দি’জনে জধন অহ্’ল। দিন দিন ফুলেশ^রী বেধিয়ান ভারি যার। সমারে তারও সে বেধিয়ান সাজুরিল। পরে তে খবর পেইয়্যা চন্দ্রঘোনা সিধু ফারাঙি চিকিৎস্যা গরন। আ কয়েক জনও গম অই এলাক। তারা সিদু যেলাক। ডা. স্ক্রোব তারে এক্কান শর্ত দিল। খ্রীস্টান অই পরিব, তে ফারাঙির চিকিৎস্যা পেব। সুনানু নোয়ারাম চাঙমা তা শর্তয়ান মনে ন’ অলেও গজি লদে বাদ্য অই পিয়ে।
ডা. স্ক্রোব লোই চিনপচ্যে অনার পর তে ভাঙামুড়ত এক্কান ইক্কুল থিদ’ গরে। সে ইক্কুলত তেয়্য মাস্টর। পরে সিয়ান জুনিয় ইক্কুল অয়। সে ইক্কুল নাঙান তিলোন থাঙ্যা সঃ প্রাঃ ইক্কুল। সক্যে সিয়োত হেডমাস্টর এল’ সুনানু অংগদা রঞ্জন চাঙমা, শিবদাস, গোপাল কৃঞ্চ দাঘি। ডা. স্ক্রোবত্তুন সুনানু নোয়ারাম চাঙমা মনত পরিলে তারে কন’ এক্কান কামে ময়মনসিং বিরিশিরিত পাদায়। সিদু তিন বঝর থানা পর ঘরত ফিরি এজে।
গদা পানি এলে তারা ভুই জমি ধুবি যায়। ধুবি যেল তারা সবন, ভাজি গেল আঝা। সে কালাদিন তোড়ে উদে ন’ উদদে মিজোউন পরিলাক। তার আর সে জাগাত থানা ন’ অহ্’য়। কিত্তে সক্যে তেয়্য এক্কা এক্কা আওয়ামী লীগ সমারে বেইল দিদ। ১৯৭০ সালত ছোট মেরু আদামত ধেই এজে।
তথ্য এজাল: কল্যাণ সাধন চাঙমা
ধরাদিঘলী চলিব।