দুগর লামা

আহ্ মা হিলচাদিগাঙ! জনম জনম ত’ বুগত

কিত্যে এধক ভেইয়ে ভেইয়ে রেনা-রেনি;

যারা চলিবার কধা এক পদে

তারা গত্তন মারা-মারি।

দেবানে দেবানে কোল বাজে কাবি পেল্লোন বার’ মুউজ

মক কুগিত্তুন কাবান খেই লেঙ অয়ে চাঙমা জাত্তো।

কাপ্তে গধা কারি নিল’ চাঙমাউন বল,

ছিদি পরলং বার্মা, তিবিরে, মিজোরাম আ অরুনাচল।

জাদর পাত্তলি এম.এন, লারমা থিধি উদি

দেচকুলর মানেউন এক গরি, মাগিল’ জাদর অধিগার

বাংলাদেজ’ আওয়ামীলীগে ইজ্জত মারি হিলচাদিগাঙত

ধোগে দিল’ লক্ষ লক্ষ সেটেলার মসুলমান।

বাংলা সরকারে দেজে-বিদেজে জাল পেলেল’

ভাক গরি দিল’ লাম্বা-বাধি,

এ লাড়েইত আহ্’রে লং জাদর নক্ষত্র

জুম্ম জাদর পাত্তলি।

জাদর আহ্ল ধরি পাত্তলি সন্তু বাংলা সরকারলোই ১৯৯৭ গরিল’ চুক্তি

সে চুক্তি মানি ন’ লোই ইউফিডিএফ বানেল’ খীসা প্রসিত।

সিত্তুন ধরি আর নুয়ো গরি ভেইয়ে ভেইয়ে বাজি গেল’ কোল,

চেঙে মিঙিনি কাজালং পানি ন’ গঙেই গঙে যার লো।

জীংকানি লামা - ইনজেব চাঙমা

কন্না বুঝে দুগর কধা। ছবি- ইন্টারনেট

আজল নীজ’ মোন মুড় ছড়া ছড়ি ভরা
এ দেজত জনম মর পুরেল’ মন’ আঝা।
শাওন ভাদ মাচ এলে এ্যাইল এ্যাইল ধানানি বোইয়েরে নাজে
চিত জুরে যায়, মন গলি যায় এ দেজর ফুল তুম্বাজে।
চাগালা চাগালা জুম মুড়োই মুড়োই ঘরানি
জুম ঘরত ইজোর মাধাত জুন পহ্’র বোই
শিঙেবোদি দাগে জুম্মবী।
পেইখ গীদ’ সুরে পহ্’র অয়, ডুবি যায় বেল,
এধক্যে এক্কান জীংকানি কুধু আ্হ্’জি গেল।
কধক আহ্’ঝি কধক গীত, রঙে ঢঙে জীংহানি,
কত্তুন এল’ কালা মেক আহ্’রি নিল’সবনানি।
ভাঙি দিল’ সবন মিদে জীকানিত,
ও পরান দা মরে বাজ্জে থেইচ
এইম ফিরি মুই ত’ বুগত।
ফিরি এইম খামাক্কাই এইম ফিরি,
ত’ ফেলে যিয়োচ কোচপানা ধনান
সাবালক গরি।
এক সমারে জনম লবং আর’ এ দেজত
হিলর মানেইউনরে শেঘেবং কোচপানা কারে অয়।
বুদ্ধ সান কোচপানা ছিদি দিবং গোদা পিত্তিমীত,
বেগ’ মুয়োত আহ্’জি ফুদে দিবং আনি দিবং স্বাধীন।

ধনপুদি - INJEB CHANGMA

ছবি: ফেসবুকত্তুন

তুই ত’ মনান দর' গর,
মানেই কুলত সত্য নেই, নেই পত্য
সত্য পত্য ফিরে আনিবার নুয়ো গরি লাড়েই গর।

রাধামনে সত্য লাড়েত পরান দিল' বলি
তা ধক্যে লাড়েই গরিবং এক দিন অবং বিজয়ী।
জাগি উদ’ ধনপুদি
আর নয় চোগ’ পানি
রাধামনে কোই যিয়ে কধানি
অক্ষরে অক্ষরে পালন গরি।
এ জাগা আমার, আমার এ মাদি
মরলে মরিবং এ মাদিত বুকদি।
গাচ্ছুনরে চ’
এক অক্তত,
ফুলে পাগোরে পেইখ কলরবে অধক
আর’
এক অক্তত?
পাদা ফুল ঝুরি যেই নুয়ো গরি লয় সলং।
ধনপুদি!
তুই দ’ সেই ধনপুদি,
আজার দুগত ন’ পরচ ভাঙি
দর’ মাদি ফুরি উদোচ
নুয়ো সবন, নুয়ো আঝা বুগত বানি।

কেনে থান গম - ইনজেব চাঙমা

ছবি: মিদে

দেজর আভা গরম অই এল’
    কেনে থানা গম,
কন’ কিত্তে চিত ন’ জুরাই
    মনান অহ্’ল আঅহ্’ল-পাঅহ্’ল।

সমাজ্যাউন পুজোর গরন
    কেঝান আঘচ দা?
কি কোম, কি ন’ কোম ভাবিনেই,
    অন’ কুল ন’ পাং।


বেন্যা অলে দেবাবো
    সুদোমু অই থায়,
মোন -মুড়ত ছড়া ছড়িত
    পানি ন’ গঙায়।

শাওন ভাদ’ মাচ এলে
    আহ্’জি ফুদে বেগর মুয়োত,
সে দিনুন কুধু আহ্’ঝি গেলাক
    ভাবি ভাবি দিন তোরাং।

এ্যাইল ঝারত তারুম বনত
    পশু পক্খি ন’ দগরন,
ধারা ধারা চোগ’ পানি
    মা-বোনর চোগত।

ছবি: মিদে

ঘর শাল পানি দ্য
    রেত্তো পরি ঘুম নেই,
ফা আগুন ন’ জ্বলে
    বাজারত যেবার ব’ নেই।

মাচথিয়্যা বাজার বন
    তেঙা ধরন ঘন ঘন,
ভাবি ভাবি গধা দিন্নু
    ব’ লিঝেত এযে ঘন ঘন।

ভাবি চ’ ভেই - বোন লক!
    কেনে থানা গম,
ভাবনা রেয্যত ডুবি যাঙ
    কুল ন’ পিয়ে সাগরত।

এধক্যে গরি ক’ দিন থেবং
    সার গর’ মনত,
মরিলে মরিলং, বাজিলে বাজিলং
    বেগে সং জোয়ারে মাদ’।

সবত - ৩

(কালালং সরকারি কলেজত চাঙমা লেঘা শিঘিয়ে দাঙগু সোহেল চাঙমার মন’ কধা)
ছবি: এলিয়েন্স চাঙমা

চোগত বনা বনা সবন
বুগত আঘে অতালিয়ে আঝা,
সাগর তুবোল’ সান অনসুর বেই যায়
জাদর ওক্কোর, ভাচ, সাহিত্য সংস্কৃতি ফুদে তুলিবার।

মাত্তর,
জাদর ভাগ্যাজত(ভাগ্য আগাজ),
কালা মেঘে ধাগি আঘে আগাজ’ তারাউন
তুয়্য তারা ফুরি উদিবার সান
যেধক্যে, ফুরি উদন গাচ বাচ্ছুন।

সবন - ২ ইনজেব চাঙমা

১০/০৮/২০১৮ কাচালং ডিগ্রি কালেজত চাঙমা লেঘা শিঘিউন। ছবি: এলিয়েন্স চাঙমা

ধানর বারেঙ এক্কো সিবেয়্য ভাঙা
ইয়োত ত’ উবোত ত’ গত্তে গত্তে মারিল’ চেরান জাগা।
ইক্যে, 
এক্কা গরি ঘরানত
নেই সচপদর থোবার জাগা
বিজর আলু কুচু রেঙ মক্যে নানাঙ বিচবিজিদি,
ভেইয়ে ভেইয়ে রেনা রেনি
গরি থানার ন’ গুজুরে ধিঙিকিলি।
ত্যুঅ তারা সবনানি অনসুর থায় তরুনু,
উদ’ দন সোঝেই চাঙমা জাদর নুয়ো পিড়িউন।

সবন- ইনজেব চাঙমা

কাচালং ডিগ্রি কলেজর এইচএসসি (২ বর্ষ) ছাত্রী দৃষ্টি চাঙমা মন’ কধা। ছবি এলিয়েন্স চাঙমা।

সবনানি বুগত আমার নিত্তো লাগায় তচ্যা
মুজুঙত এক্কো অজল তারেঙ মোন ফারি
আহ্দ’ ইজিরেদি দাগে আমিজে ।
সাত গাঙ তের’ দেবা সাজুরি পার অবং,
চাঙমা জাদর আরাং দরপ, সিরিসুদোম
আমি ধরি রাঘেবং।
ইআন অল’ ইরুক কালর পুরবোউনর সবন।

‘‘এধক্যে টানাকিস্যে দিনতয়্য আমাত্তুন আর’ জধা অই মা-ভাঝর কাম গরা পরিব’

মানবলা দাঙগু লালন চাঙমা পুরবোয়াউন উদিজে কধা কর। ছবি এলিয়েন্স চাঙমা

চাঙমা সাহিত্য পত্রিকা ডেক্স: হিলচাদেগাঙ কধা কলে ন’ ফুরায়। কন কিত্তেদি চিত জুরেবার আঝা নেই। কধ গেলে এক্কো ঘুরগুচ্যা আন্ধার রেত। যে রেদোত কন’ পুক জুকর র’ নেই আঘে, আঘে বানা ঘরে ঘরে বুক ভরা আভিল্যাচ। এধক্যে এক অক্তত চাঙমা সাহিত্য বাহ্ নানাঙ কলেজত চাঙমা লেঘা আ ভাচ রক্কে গরিবাত্তে এক ঝাক ভাঝর লরবো নিআলঝি গরি কাম গরি যাদন। চেঙে, মিঙিনি, কাচালং কুলসমুত্তু নানাঙ জাগাত চাঙমা লেঘা শিঘিবার জায়জুগল গত্তন, শেঘেই যাদন। ইআনি দিঘী এক্কা অলেয়্য বুক ভরে, মরা গাজত থুপ থুপ ফুল ফুদন।

এচ্যে ১০ আগস্ট ২০১৮ ইং এক সিজি কেন শুক্কর বার বেন্যা মাধান ১০ অক্তত কাচালং চাগালাত দাঙর বিদ্যাঘর কাচালং ডিগ্রি কলেজত চাঙমা সাহিত্য বাহ্ ধারাজে এক্কো তিন মাজ্যা ‘‘চাঙমা লেঘা সার্টিফিকেট কোর্স’’ ফাঙফগদাঙ গরা অয়ে। এ খলাবোত সাত কাম ফেলে  আ এ ফগদাঙি খলাবোরে সাতকাম মনে গরি মোমবাত্তি জালে ফাংফগদাঙ গচ্ছে কাচালং কলেজ লেকচারাল মানবলা দাঙগু লালন চাঙমা, মুলুক গরবা ইজেবে এল’ কাচালং মডেল বালিকা হাই ইচকুলর প্রধান শিক্ষক মানবলা, কবি দাঙগু ভদ্র সেন চাঙমা আ কাচালং কলেজ’ লাইব্রেরীয়ান মানবলা দাঙগুবী স্বর্ণা চাঙমাদাঘী।

কোর্স মোমবাত্তি জালেই ফাং গরের এক ভান্তে

        চাঙমা সাহিত্য বাহ্, গরা কমিতি বা’কাবিদা্যাঙ (সাংগঠনিক সম্পাদক) দাঙগু এলিয়েন্সে চাঙমা কধা কধগীয়ে (সঞ্চলনায়) ফাংফগদাঙি খলাবো আরগানি গরা অয়। চাঙমা সাহিত্য বাহ্ গরা কমিতি তপ্পেত্তুন ইয়োত আর’ মু দেঘেয়্যন এ জধার দাঙর কাবিদ্যাঙ দাঙগু ইনজেব চাঙমা, ফগদাঙ আ ছিদানা কাবিদ্যাঙ দাঙগুবী শ্রেয়সী চাঙমা, দিঘীনালা কলেজ ধেলার জধানানু দাঙগু ধর্মবিকাশ চাঙমা, এজাল জধানানু দাঙগু নভেল চাঙমাদাগী।

        কধগীউনে কোইয়্যন, ‘‘এধক্যে টানা কিস্যে দিনত আমাত্তুন আর’ জধা অই মা-ভাঝর কাম গরা পরিব’। এক্কো জাদর তার দাঙর চিনপচ্যে তার ভাচ, ওক্কোর, সাহিত্য সংস্কৃতি। ইআনি আহ্’ঝি গেলে আমি আমা চাঙমা চিনপচ্যে দি’ ন’ পারিবং। সেনত্তেই এচ্যে আমাত্তুন একাচিত্তে এগামনে নিজে চাঙমা লেঘা শিঘি অন্যজনরেয়্য শেঘেবার আ শিঘিবাত্তে বেক্কনরে কুজোলী রাঘেয়্যন।

দাঙগুবি দৃষ্টি চাঙমা মন কধা ভাঙি কর। ছবি: এলিয়েন্স চাঙমা

যিধু যিধু চাঙমা লেঘা সার্টিফিকেট কোর্স চলের:

দাঙগু সুফল চাঙমা, দাঙগু প্রকাশ চাঙমা আ দাঙগু সুপায়ন চাঙমা – মহালছড়ি ডিগ্রি কলেজত, দাঙগু পরেশ চাঙমা, দাঙগু নতুন জীবন চাঙমা আ দাঙগু কেটন চাঙমা – মাইসছড়ি হাই ইচকুলত আ বাবুছড়া মুখ হাই ইচকুলত দাঙগু সম্ভমিত্র চাঙমা, দাঙগু রিকন চাঙমাদাগী। ইআনি বাদেয়্য মহালছড়ি উপজেলাত ১১ আন প্রাইমারি ইচকুলত, সাজেক ইউনিয়নত ১২ আন প্রাইমারি ইচকুল চাঙমা লেঘা শেঘা অর।

পুজোর - ইনজেব চাঙমা

মোন কানের, ছড়া কানের - কানের চাদেগাঙ
চেরো কিত্তে মরা কিজেকে বোমার আগাচ পাদাল।
রেত্তো অলে বেরেচ কানন, ঝক পরন তদেক,
জাদর পাত্থলি দাগি কর,
বাংলাদেজর আদি মানেইউন, অলর গরি
এ দেচ সারি ধেই যাদন অন্য দেজত।
মোন কানের, ছড়া কানের - কানের চাদেগাঙ
থেবাক কেনে?
ভূই আহ্’রেলাক, বাগান আহ্’রেলাক - আহ্’রেলাক ঘর’ ভিদে;
ইরুক দিনত,
ইন্দি দে দ্য উন্দি দে দ্য পেদত ভাত ন’ পরে।
আর্মির তচ্যা, বাঙালর তচ্যা - তচ্যা জাত ভেইয়োর;
বুক বানিবার কি আঘে?
এধক তচ্যা মাধাত গরি কেনে তরানা পরান।
সিত্তেই তারা এ দেচ সারি ধেই যাদন ।
ত্যুঅ,
আমার চেদন নেই?
কিত্তেই এধক পাষান ভেই?
নিজ’ কধা নিজে ভাবর,
নিজ’ আলুত্যাই কি লাড়েই গরর?
জাত্তোর আঘে আন্দারত।
কারে নিনেই তমা এ লারেই?

পর্বোয়া - ইনজেব চাঙমা

পর্বোয়া, ভাজে ধোয় মন দুক-আভিল্যাচ দার (শান) গর’ মন
হিলর মাদি বলা বুঝোদোক শুকুনর দল।
জাদর শুত্রুউনরে মার’ তেগ’ ঘুম যেবার নেই অক্ত
এগাচিত্তে - এগামনে লাম’ ভাত মোজা পুনত বানি
জাত উদ্দোর কামত।