মন কধা:(ন’ কয়দ্যা কধা কোই পাঙর)

২০০৮ সালত এ ঘরান তুল’ অয়্যা

মুই যক্কে চিগোন এলুঙ মুই দ্বি’চোগে দিক্খুন আমা ঘরানি পুরি যাদে। এক বার নয় সাত বার। শুনঙ রঞ্জন মণি কারবারি পারা সমুত্তুন হিলত সেটেলার বাঙালে আ আর্মিয়ে চাঙমা কাপ্পুন। সিত্তুন ধরি মর সবন এল মুই জাত্তোত্যাই কাম গরিম। সবন এল শান্তি বাহিনীত যেম। মাত্তর, শান্তি বাহিনীত যানা ন’ অয়। কিত্তেই, মুই এস.এস. সি পরিক্কে দেদ্যা ন’ দেদ্যা পার্বত্য চুক্তি অহ্ল। শান্তি বাহিনীউন ফিরি এলাক। পার্বত্য চুক্তি পর পি.সি.পি দ্বি কত্তা অহ্ল। জাত ভেইয়ে মারা মারি, ধরি নেযা নেযা আ মারে ফেলা ফেলি যক্যে গাভুর অই এল মুই মনে মনে ভাবঙ মুই ইক্যে কি কাম গরিম? শেজে এক্খান বুদ্ধি জুগোল অহ্ল। মর তিরোচ বা সবন জাদত্তেই কাম গরানা। বেক্খানি ভাবি চেলুঙ, মুরত পরি আমল গরি। ভাবদে ভাবদে চাঙগে আমা দলুন অন্যন্যা দাবী পয়ধেনে দ্বি’ মত থেলেয়্য ভাচ্চানত বেক্খুনে এক মত। সেনে ভাঝর কাম ১৫ সালত্তুন ধুরি এগামার গুরি গরি যাঙর।ইক্যে মুই গায় নয়, এক ঝাঁক সাহিত্য কাম্মো জুগোল অহ্লাক। বেগর চোগত মুহ্ত সবন চাঙমা সাহিত্যরে পিত্থিমীত বুগত ছিদি দেনা, বিশ্ব সাহিত্য ইজেবে চিনপুজ্যে গরানা। এ ধগে কাম চলি যার। বেগে এচ্যা বুড় মা-বাপর কধা ন’ ভাবি, চাগুরি কধা ন’ ভাবি, আমনর ঘর সংসারর কধা ন’ ভাবি বানা বানা দেচ্ছানরে আ জাত্তোরে কোচ পেনেই, লেঙে লেঙে, ফোঃপে ফোঃপে, অনা ভাদে নিআলঝি গরি কাম গত্তন।
ইক্যে ইয়োত আর’ কধা উদের। যা হিলত বুগত পিড়ে দে। কুচি কজমা বুগত তুজ’ আগুন আঙে। সালেন, মা মেদিনী কেনে, কারে নিনেই বুক বানিবো? ইয়ানি আমা নেতাউনত্তুন বুঝা পরিব। বেক্ পার্টি কর্মিউনরে দৃষ্টিভঙ্গি পয়ধেনে অনতত তিন মাজে একবার অলেয়্য ক্লাশ গরানা দরগার। নানাঙ বই পরানা দরগার চিগোন দাঙর কর্মীউনত্তুয়্য। সক্যে মানুচ দোলে চিনি পারিবাক।কধা ন’ উদিব। না’ অয় আমি আর’ দোল দোল পুঅ আহরেবঙ। কধা আঘে, যা যিয়ে জলের ভাজি যা আঘে লুহর আহ্জি। ইক্যে যারা বাজি আঘি, বেক্কুনর ইদু মর কুজোলী যারা সাহিত্য কাম গরত্তন তারারে সাধীনতা দেনা দরগার। মর বিশ্চেস তারা কাররে ক্ষতি ন’ গরিবাক বা সে ধক্যে চিন্তে নেই তারার। তারার এচ্যে দ্বি চোগত ঘুম নেই ইআন ভাবিনেই, মেলোচ মা ভাচ্ছানরে কেনে মদঙমাধাঙ গরিবাক। তারার চোগত - মুহ্ত সবন লুদুঙ মরা সহিত্যরে কেনে পিত্থিমীত ছিদি দিবাক। ইআন বাদে তারা কন সবন নেই।
এধক্যে সবনত্তুন আমি ২০ আজার চাঙমা লেঘা শিঘিবার বই হিলত মাগানা ছিদি দিবাত্তেই এক্কো “সাঙু- ২০১৭ ফগদাঙি পরিষদ” নাঙে জধা বানিলঙ। তা কাম বানা Sponsor তোগানা। আমি ২০ আজার জাগাত ৬ আজার বই ছাবেই পাচ্চেই।যারা এ বইবো ছাবাদে তেঙা এজাল দিলাক তারারে ইধোত গাদে রাঘেয়্যাই আ ভালেদি – পাত্তুরুতুরু জানের। ইক্যে সে বইয়্যন ছিদি দি ন’ পারির। কেনে কি গরিবং? দিঘীনালা, খাগাড়াছড়িম পানছড়ি, মালছড়ি আ রাঙামত্যা (জেলা পরিষদ) পত্তিক জন প্রতিনিধি দুয়োরত হুচ দিলং। কন জন প্রতিনিধি আমারে তেঙা ন’ দিলাক। তারা ইধু যাদে যা Sponsor দাগনিত যে তেঙা পিয়েই সিত্তুন ২০ আজার খরচ অই গেলাক। মাত্তর দুগর কধা অহ্লদে আশুতোষ দা(৫০০০) আ শতরুপা দি (৫০০০)বাদে কারজনরে উদ ন’ পেই। এমন কধা শুন্নেই “ম’ ঝিবো জন্ম দিন পেলে দি ন’ পারঙ আ তমারে.........” ।
শেজে বাবা মরে সেগুন গাচ বিজি বাত্তে হুম দিল। ৩২ গড়া। এ কামত্তেই নয়। ম’ ঘরান তুলিবাত্তে আ পোহরবো বানিবাত্তে। ২একর ৪০ ডিসিমেইল ভূই(বিল) আঘে সিয়োত গদা দিবাত্তে। মাত্তর, দুগর কধা বাবারে পরাহ্ দিলুঙ। ঘরত কামত ন’ লাগেই চাঙমা লেগা বইউন ছিদিদেনা আ চাঙমা লেঘা সার্টিফিকেট কোর্স আ কবিদ্যা জিতবাদত কামত লাগাঙর।