পাহাড়ীকা চাঙমা বানা এক্কান নাঙ নয়, নয় এক্কো মিলে আ এক্কো মা। তে এক্কো সমাচ ভালেদি কাম্মো। যে কামর বলে বাজি আঘে মানচ্চোর মুয়ে মুয়ে, থেব’ যুগে যুগে, কালে কালে। জেধক দিন সং হিল চাদিগাঙ থেব’, থেব’ এ দেঝর সরা গাঙ। জেধক্যে গরি ফুল পিবির পিবির মিদে মিদে বোইয়েরত দুলি দুলি থান, রেদো আগাজত তারাউন জলন। পুগ আগাজত পূন্নিমা জুনান পহ্র সিদিব, সিদিব’ পুগ’ সে রাঙা বেলান।
কন্না সে পাহাড়ীকা: চাঙমা সার্কেল মিঙিনি গাঙত এক্কান দোল ভরন পিরোন আদাম যে আদামান দেঘিলে পূন্নিমা জুনান লাজে মু ফেরায়। অজল নিজ’ মোন-মুড় বুক সিরি হ্ঙো বেঙা গরি বেই যিয়ে সে চংড়াছড়ি গাঙ পারত সিগোন এক্কো ভিদেত ১৯৮১ খ্রি. ২৩ সেপ্টেম্বর পাহাড়ীকা চাঙমা জনম অহ্’য় ২৯ নং ছোট মেরুং মুইজ’ হেডম্যান স্বগীয় সুনানু সুশীল জীবন চাঙমা আ সুনানু মেরুনী বালা চাঙমার দোল কোচপানা এক্কান সংসারত। কনসুচুক্যা দিন মাধান নিজ’ ঘরপাদা জাগা ফেলে ১৯৮৬ সালত ভারদত শরনার্থী জীংকানিত দাঙর-দিঙর অই ১৯৯৭ সালত নিজ’ আদামত ফিরি এজন। তারা দি ভেই, দি বোনর সেরে দি’ জনর তলেদি পাহাড়ীকা চাঙমা। লেঘাপরা জীংকানি থুম গরি ২০০৩ সালত আসার মাচ বাজেই ছড়া আদামত সুনানু তরুনী কুমার চাঙমা আ সুনানু বিজয় শোভা চাঙমা বেগ’ দাঙর পুঅ ইনজেব চাঙমার ঘরনি ইজেবে এজে।
পাহাড়ীকা চাঙমা চিগোনত্তুন ধরি কাম্মো। কন’ কাম তার আগাথ্যা নয়। ভারদত তা’ বর ভেই সুনানু রাইটার চাঙমা ইরুক হেডম্যান লেঘাপরা থানাকিজে পরি গেলে পাহাড়ীকা চাঙমা খাদি, কজাল (ঝলা) বুনি বিজি লেঘাপরা খরচ তা বাপরে বল দিদ’। আ নিজ’ লেঘাপরা খরচ থুবেদ’। মানচ্চোলই কন’ দিন কোল ন’ বাজায়। নিজর খুহ্’তি অহ্’লেয়্য কন’ সুয়োল ন’ গরিদ’। তা বাবা হেডম্যান ইজেবে তারা ঘরত গ’ গ’ মানুচ এজন। কধ জেলে ফা আগুন ন’ মরে। তার বর বোন ভেই থেলেয়্য কন’ পিজুম নেই গরি ভাত রানি লোবিয়ত গত্তে তার কন’ বিরিং বারাং নেই। সেনে তার এ গুন কারণে তারে বেক্কুনে চিজি দাগন। তার গুর ভেই টুয়েন চাঙমা মরানা সং বেহ্ ন’ দাগি চিজি দাগি জিয়ে।
১৭ বঝর সংসার: সুনানু ইনজেব চাঙমার সুনানু পাহাড়ীকা চাঙমা জধন অহ্’য় ২০০৩ সালর আসার মাচ। এক্কা কধা ন’ কলে ন’ অহ্য়- ১৯৯৪ সালত ভারদত্তুন যক্যে পাহাড়ীকা চাঙমা নিজ’ ঘরপাদা জাগাত বেড়া এল’ সক্যে ইনজেব চাঙমালোই পত্থম দেঘা। এ দেঘা তারা দাঙর এক্কো ইধোত গাদে রাঘেবার দিন অভ’ তারা কন’ দিন ভাবি ন’ পারন। দি’ জনে এক সমারে জালা লাগেয়্যন। যনিও ইনজেব চাঙমা জালা লাগে ন’ জানে। ১৯৯৭ সালত ভারদ’ শরনার্থীউন আমনর ঘরপাদা সাগিনত বেক্কুন ফিরি এজন। সক্যে হ্ডেম্যান্নেরে গজি লবাত্তে তা মুউজ’ মানুচ্ছুন মেরং প্রাইমারি ইক্কুলত থুব অলাক। তারে দুলে দগরে গজি ললাক। সে সভাবোত ইনজেব চাঙমা এল’। সিয়োত তারা দি খেপ দেঘা। এ পর ১৯৯৮ সালত চংড়াছড়ি বরাদমত “ভিক্ষারি ছেলে” যাত্রা দিলাক। সক্যে পাহাড়ীকা চাঙমা খাগাড়াছড়িত লেঘা পড়া গরিদ’। ঘরত কি এক্কান গরজে এলে তেয়্য যাত্রা চা গেলে ইনজেব চাঙমালোই দেঘা। ইক্যে গরি তারা দি’ জনে একজনে আর একজনর কায় গেলাক। মাত্তর তারা ভাঙি কোই ন’ পারন- “মনর কোচপানা কধা।” বানা ভাবে বুঝা যায় একজনে আর’ একজনরে ন’ দেঘিলে থেই ন’ পারন। চোগত্তুন আহ্’জি যেলে তগা তুগি গরন। এক দিনে ইনজেব চাঙমা পাহাড়ীকারে চিদি লেঘিল’। সিত্তুন ধরি তারার কোচপানা কধা মুয়েদি কোই ন’ পারিলেয়্য চিদি দি দি গরিদাক। পরে সমাজ্যা ঘরত বেড়েম্মো গরি পাহাড়ীকা চাঙমা ইনজেব চাঙমা দাগিদু বেড়া এজে। এ পদত সমাজর মানু”উন ভারি সজাক। পরে বেগে খবর পেলাক তারা দি জনর কোচপানা কধা। তারা ঘরর মানুচ্চুন ন’ চান ইনজেব চাঙমালোই তার জধন ওক। সিত্তুন ধরি কন’ বেইল সুক নেই পাহাড়ীকা চাঙমার। পত্তিক বেইল ভাত খাদে ইনজেবরে লালি মারিদাক। সিআনি তার সহ্য ন’ অহ্’য়। ধারা ধারা চোগ’পানি লোই এক দিনে ইনজেবরে চিদি লেঘিল’- “পরান, তুই যনি মরে সত্যি সত্যি কোচপাচ মত্তুন দুরত যা। খামাক্কাই পরান, তুই খবর পাচ এ কধাআন ম’ মুয়োত্তুন ন’ এজে। ত্যুঅ কোই পাঙর। লেঘদে আহ্’ত গিরগিরাই। ত্যুঅ লেঘি পাঙর। আঝা গরঙ মর মঙ্গল তবনা গরিবে।
তা ১ বঝর পরে লেঘিল- “পরান, তুই মরে দুরত নেযা। ত’ ছারা মুই সুগি অই ন’ পারিম। বিশ্চেস গর পরান, তরে দুরত যেবার কোইয়ং সিত্তুন ধরি কন রেত ঘুম নেই গরি তোড়ে দুঙর। মরে যুনি সত্যি সত্যি কোচপাচ মরে বাজা পরান। ত’ ভাঙা ঘরত থেলেও মর স্বর্গ। না অহ্’ ম’ মরা মুআন দেঘিবে।” ..........................................................................................................................................
[থুম ন’ অহ্’য়। ইবে এক্কো উপন্যাস। লেঘিয়্যাবো আঝা গরের ২০২১ সাল ফেব্রুয়ারিত ফগদাঙ অভ।]