মরয়্য লো আঘে, আঘে রন্
দ্বি’বে চোক্-কান্,
আহ্ত-থেঙ
মুইয়্য দ’ মানুচ।
তেহ্, এধক কিত্তেই চোগত
ন’ বাজানা?
অহয়, অহয়,
মুই তমসান গায়গধরে নয়,
তমাসান বুদ্ধি - বল্
নেই, জনে ধনে হীন।
মাত্তর,
মুইয়্য দ’ মানুচ।
রাজানগর, বিবির হাট, নাজিরহাট
আহরি নিলা
লক্ষী গুর’সান কিচ্ছু ন’ কোই
আজারো দুক বুগত বানি
এলুঙ
মুরোল্যা দেজত, হিল
চাদেগাঙত।
কধক রন দুগে, কেজ্যে নল
খাগারলোই লাড়েই গরি
অনাবাদি জমি বানেলুঙ
ভুই।
আন্দার মোন জুম কাবি
গুরিলুঙ বাগান, ঘর।
সিআনিয়্য তমার চোগ’ শাল!
ছিদি পরল্লঙ যিন্দি চোক’
পহ্ র দেঘে,
পরান তোড়ে পারে,
এক ধুব’ বাশ অলঙ ফারক।
কিও গেলঙ নেফা, মিজোরাম,
তিবিরে ভারত,
কিও থেলঙ দেচকুলত।
নেগে - মোগে, বাপে-পুদে,
ভেইয়ে-ভেইয়ে,
বোনে-বোনে
ইত্তোহুদুম্মোই অলঙ ফারক।
তোমার,
ত্যুঅ তিত্তি ন’ অয়? ঈল
ন’ মরে?
চেঙেই, কাজালং, ফেনি,
মিঙিনি কুল নিলা আহ্ রি।
সালেন,
কধক আর্ গায় সয়োনা?
ইক্যে,
চোগর মুজুঙে মামারে
ঝাবাদন,
নোনিয়ে বোন্নুরে ধরি
নেযাদন;
বাবারে বানি নেযাদন
দাধা আ নোনিয়ে ভেইবোরে
জেলত দেদন।
ভেইয়ে ভেইয়ে কোজ্যা
বাজেই দেদন।
ত্যুঅ মুই কিত্তে অলর?
কোন মন্তব্য নেই:
একটি মন্তব্য পোস্ট করুন