 |
| লংগদুত পরা টোন্নই তুল্যা ঘর। |
দিন গঙে রেত এযে আর’ পহ্র অয়। পত্তিক দিন পুগ’
আগাজত বেন্যা রাঙা বেল আহ্জে। এধক্যে গরি দিন সাপ্তা মাস ভিদি আমনর
জিংকানিত্তুনআর’ এক্কো বজর গাজ’ পাদার সান ঝুরি যার। গেলেস্ন কেল্যা এল’ ফুল বিঝু।
এচ্যে মুর বিঝু। ধনী, গরিব, নেয়্যা-নাধা, চিগোন-দাঙর, গুর’-বুর’ এক্কান জাগাত থুবো
অই পৈনাল গরি এক সমারে মিঙিনি, চেঙেই, কাজালং, বরগাঙ সমুত্তুন যিধু যিধু চাঙমা,
তিবিরে, মগ...... সমুত্তু তারা ফুল ভাঝেলাক। বানা লংগদু চাঙমাউনে কবালত আহধ দি
উরগুম্যা গরি আঘন।
মুই কেল্যা দিন্নু আমল গচেছাঙ। বেন্যা মাধান এল’
পোতপোত্যা এ্যাইল আগাচ। আগাজত ধুপ ধুপ মেঘ কত্তা কত্তা গরি উত্তুরে আগাজত ভাজি
যার। মনে কর বিজয় গিরি আ রাধামন ধনপুদিরে হিলর খবর কোই দিয়্যা যার। তারা দোলে বিঝু
পালাদন। তারারে বলান্যা দিয়্যা যার। মিদে মিদে বোইয়ের, কোগিল’ হু হু র’য়ে ধনপুদি
বুগত রাঙা খাদি বানি, চুলত নাকশা ফুল গজেই মেঘ চাগা লগে সমার অই তেয়্য হিলর মানেই
লগর সমারে ফুল ভাঝা এযের। মাত্তর, সেধক্যে ন’ অয়। তারা খবর পিয়োন হিলর আভা গম নেই,
নেই ঘর দুয়োর হিলর মানেউনর। এ্যাইল আগাজত তলে বোই আঘন। রেদোত তারা, জুনি আ জুনানে
অক্তে অক্তে সমার কন। নানাঙ কিত্যে কন। যে কিত্যে শুনি গেলেস্ন কেল্যা আগাচ্ছানে
উরগুম্যা মু গরি থেপ থেপ চোগ’ পানি ফেলে ফেলে ফুল বিঝু বিধেয় নিল।
 |
| বামে লংগদু স: প্রা: ইক্কুলত সাঙু - ২০১৭ বই ভাক গরি দেনা ছবি। |
কি গমি গেল’ হিল চাদেগাঙত - লংগদুত?
সে দিন এল ২ জুন ২০১৭খ্রি:। বাবুছড়া হাই
ইক্কুলত চাঙমা লেঘা শেঘাঙর ইক্কুলর পুঅ/ঝি’উনরে। এ অক্তত সুমন দা(কোরল্যাছড়িত্তুন)
ফোন গরি কল’ লংগদুত চাঙমাউনর ঘরানি বাঙালে আগুন বাজে দ্যুন। সমারে আর্মি পুলিশ আঘন।
কিত্তে আগুন বাজে দিলাক?
নয়ন নাঙে এক্কো সেটেলার বাঙাল’ মরা খাগাড়াছড়ি চের
মেলত পা যিয়ে। সিবে ঘর লংগদুত। সেনে তারা চাঙমাউনর ঘরানি(২১৩) আগুন বাজেই দি ছেই
বানে দিলাক।
এচ্যে ১০ মাস ভিদি গেল’। তারা (চাঙমা) এয ঘর তুলি
ন’ পারন। কেনে তুলিবাক? উরন পিনন বাদে কন তেঙা পয়স্যা বাজে ন’ পারন। বেক পুরি যেই
ছেই অহ্ল। আমি (শ্রেয়সী, টিংকু আ পরেশ) ৮-৯ মার্চ ২০১৮খ্রি: লংগদুত ‘‘সাঙু- ২০১৭’’
বইবো ভাক গরি দিয়্যা যেনেই দ্বি চোগে দিঘি এলং, এলং তারা কি ধক্যে গরি দিন কাল
তোড়াদন। সে পরা টোনানিলোই কন’ বাবদে ঝুপুর থাঙে থাঙে আঘন। রেদোত তারা, জুনি আ
জুনান অক্তে অক্তে সমার অন। কধ সময় আগাজত মেঘ উদিলে তারারেয়্য সমার ন’ পান। মুজুঙে
বারিজে আঘে। কেনে দিন কাল তোড়েবাক? সেনে এচ্যে তারা বিঝু পালে ন’ পাত্তন। পালেবার
আওচ থানা সত্ত্বেয়্য।
এ বিজু পালে ন’ পারানা হিলত এক্কান সুধোম অই এল’।
বাংলাদেচ আমল পচ্যে ধরি পরান চোক চোক গরি বিঝু পালান। কন’ কন’ জাগাত পালে ন’ পারন।
বেগত্তুন বেচ চোগত পরে সে ১৯৯২ সাল’ ১০
এপ্রিল লোগাঙ কাবা খানা সমুত্তুন এচ্যা শেজে লংগদুত ঘর আগু বাজে দেনা এ ধক্যে কয়েক
ডজন ঘটনা হিলর জুম্মউনরে অমঅহ্ধ বুক ভাঙি দেয়।
এধক্যে তচ্যা, পেরাজারত্তুন এচ্যে একঝাঁক সাহিত্য
কাম্মো খনসুচুক্যা কু-দিন মাধানর সেরে সেরে আমনর সাহিত্য সংস্কৃতিরে ধরি
রাঘেবাত্তে, আমার ওক্কোর ভাচ পিত্তিমিত ছিদি দিবাত্তে অনা ভাদে নিআলঝি গরি কাম গরি
যাদন। তারা চোগত মুহত সবন, আঝা নিজর ওক্কো ভাচ, সাহিত্য সংস্কৃতি বিশব বুগত থিদববর
গরিবার। এযে পয়ধেনে তারারে ইধোত ন’ তুলিলে ন’ কর। তারা অলাক্কে এলিয়েন্স, শ্রেয়সি,
বিকেন চেগে, পরেশ, টিংকু, ধর্ম বিকাশ, সোনামণি, জেকি, প্রত্যাশাসমুত্তু ৩০ জন
কাম্মো। আর’ তারা সমারে সমার বদিবাত্তে চাদন। সমার অবাক।
মুজুঙে দিনুন দুক ন’ থেব’, আভিল্যাচ ন’ থেব’ বানা
মুয়েদি কলে দ’ ন’ অহব, সিতেত্তই আমাত্তুন নিআলজি গরি কাম গরি যা পরিব’ লেঙে লেঙে
ফোপে ফোপে অহলেয়্য। পথ আরা পরিব। নুয়ো পিড়িউনরে জাগা দি পরিব, মন’ বল দিয়্যা
পরিব’, কন’ আন্দার থুম নয়। আন্দার কাদি গেলে পহর অয়। সেধক্খন সং আমার জাগি থা
পরিব’।
এ মাদির আমার ঘরপাদা জাগা। ইয়োত জনম লনা আ মরানা
আমা আরাং অধিগার। এই জাগাত আমার বাজি থানা তিরোচ মরে। এচ্যা হিলর ধক গম নেই। অনসুর
গো-গুল মিজি আঘে। তিগুচ্যা মা-বোনর মরা খিজেক, বাপ-ভেইয়োর লো নালে ঝুরি বোই গেল’।
মা-বোন চোগ পানিয়ে সাগর অই গেল। কধ গেলে হিল চাদেগাঙ ইক্যে শবাশাল অই উত্তে।
ত্যুঅ আমার আঝায় বুক ভরে, গধেল গধেল আঝায় তিরোচ
মরে যে এই দুক আ আন্দার এক দিন ন’ থেব’। ঝাক ঝাক পর্বোয়া শিক্ষিত অহ্দন, দেজে বিদেজে চাঙমা নাঙ ছিদি পরের।এক
জনে আর’ এক জনর দুগত উজে এত্তন। আমারে সাঙুু ২০১৭ বইবো ছাবাদে যেধক্যে গরি এজাল
দিলাক সিআন জাদত্তেই দাঙর মঙ্গল। মিলেত্তুন পিএইচডি ডিগ্রি পাদন, উঙকাঙ সেরেত্তুন
বল খেলাত নাঙ বাজাদন। আগত্তুন ইক্যে বেচ চেদন অই উত্তোন, আদুনিক অই উত্তোন। আ শিক্ষিত অইনে ফারক অই গেলে ন’ অহব, বানা নিজ’
ঘর-গিরি ভালেদি কধা ভাবিলে ন’ অহব। সে শিক্ষে
ছিদি দিয়্যা পরিব’ মোন-মুরহ্ সেরে, হুয়োঙ-রিঝেঙ তারম্নমত। যে শিক্ষে জাত্তোরে পর গরি দেয়, দুরত থিলি দেয় সে শিক্ষে কন’ মূল্য নেই। জাদর গাভুচ্যা - গাবুরি
জাগি উত্তোন ইত্তুন বেচ। সাগর তবোল সান কোচপানা, আলুলেস্না দুলুলেস্না বেই যোক মোন
মুড় সেরে। হিলর দুক্খ এক দিন ন’ থেব’, কন’
দুকক্খ থুম নয, কন’ আন্দার জনম জনম নয়, তচ্যা পেরাসানি পোইদ্যানে গরিবং সুওল। মুজুঙে সে বেন্যা মাধান রাঙা বেল’ ছদক
পত্তিক দিন ফুদে, পহ্র অয়, পেইক দগরন। মুই সে আমা হিল চাদেগাঙর হিত্তে চেই বুক
ভরে, আমা জীংহানি, সাহিত্য সংস্কৃতি, ভাচ-ওক্কোর তজিমপুর’ ওক ইআন ওক এচ্যে বিঝুর
ইমে।
কোন মন্তব্য নেই:
একটি মন্তব্য পোস্ট করুন