 |
| ক্যাপশন যোগ করুন |
এচ্যে ১২ এপ্রিল ২০১৮ বাংলাদেজত ফুল বিঝু। কেল্যা
মুর বিঝু পরে গজ্জে পচ্যে দিন। এ তিন দিন চাঙমাউনে বিঝু নাঙ দিলাক। তিবিরেউনে কন
বৈসুক আ মারমাউনে কন সাংগ্রাই। আঘ দিনত বিঝু এলে চাঙমাউন খুজিয়ে তুবোল বেই যায়।
থেয়্যা, নাধা বেগর মনত খুজি তুবোল ফাগোন’ আভা ধক বেই যার। মাজনউনে তারা খরাবি অজন
রাঘেই বাঘি ধানুন ঘরে ঘরে ভাক গরি দুন ভিলি আমি এয বুড় বুড়ি মুহত্তুন শুনি। ভেইয়ে
ভেইয়ে কধক দোল কোচপানা জীংকানি এল, এল আলুল্লো দুলুল্লো। কন’ জনে দুগত থেলে
বেগে তারে এজাল দিদাক। মাত্তর ইক্যে! আমি তিবিরে রেয্যত এমএলএ দাঙগু সম্ভু লাল
চাঙমা গান্নুত্তুন বেক অনুমান গরি পারি আমা চাঙমাউন কুধু কেনঝান আঘি। মা পেদত জাগা
পেয় মাত্তর, পিত্তিমিত জাগা ন’ পের। সেনে দাঙগু সম্ভুলালর আভিল্যাচ -
পরা কবাল মহ্র বেড়েয়্যা মনান,
ন’ দ’ চাঙ তুয়োদ’ মুই, নিত্য বেরে পাঙ। ২
এ দেজত্তুন উদেজত উদেজত্তুন উদেজত
বানা বেরে পাঙ।
পরা কবাল মহ্র।ঐ
কন্না বুঝে ম’ ধক্যে, কন্না চিদে গরেহ্
কাপ্তে গধায় বর পর’ঙি বানেয়ে মরে্ \২
ডুবে দিল ভূই সাগিন ডুবে দিল স্ব সমবল
আহ্রি নিল ইত্তো হুদুম রাজ ঘরান্নো পানিত তল\
পর কবাল মুই সেনে
মুইদ’ মরে কঙ
 |
| লংগদু ঘরানি পুরি দেনা পর এধক্যে গরি ঝুপুর বানি আঘন। |
মুইদ’ মরে কঙ।ঐ
ও! বর পরঙদ’ অরম্ননচলত ১৯৬৪ যিয়োন, খালিক এযবো..!
ছি ছি ঘি ঘি কোইনেই মরে ধাবে দুন
যাগোই যাগোই কোইনেই তারা জাগায়্য ন’ দুন\২
আহ্জি যিয়ে গিরিত্তি কধক সুগর,
সুক নেই সুক নেই ঘরত ভিলি ভেইউন কোল গরন\
পর কবাল মুই সেনে
মুইদ’ মরে কঙ
মুইদ’ মরে কঙ।ঐ
এচ্যে
ফেসবুকত দেঘা যিয়ে, ফুলে ফুলে গোদা পিত্তিমিআন রাঙেয়্যন। মনে কয় কন’ দুক নেই। আজলে
আমি বেগে খবর পেই লংগদু[1] কধা। বানা সিআন নয়! বাংলাদেচ আমল পচ্যে ধরি কন’ বিঝু দোলে দালে ন’ কাদে।
তিগুচ্যা আগাজর কালা মেঘ সান এক কিত্যেদি নয় এক কিত্যেদি এ্যাইল আগাচ্ছানরে কালা
মেঘে
ঢাগি থায়, জুম্মউনর ভাগ্য। লংগদুত চাঙমাউনর ইক্যে ঘর নেই, অন বিঝু পালেদাক,
ফুল ভাজেদাক। তারা বিঝু ন’ পালেবার রাজ দাগি দাগি কধন। মাত্তর, দুগর কধা আমা কানত
কি সমে?
 |
| দিঘিনালাত ফুল ভাজানা |
বিঝু দ’ আজার দুগ থেলেয়্য এক্কা অলেয়্য মনত সুগ
এযে। মাত্তর, সে সুক এধক গরেঙ নয়। তক পায়। আ দুকআন! মুর, গরেঙ। অন’ তক ন’ পায়।
অনসুর বুক আঙে, তুজ’ আগুন সান আঙি আঙি যার। এচ্যে ফুল ভাঝানা অই পারে যাহাতে ১৪২৫ (বা:) বজরবো
দোলে, সুগে কাদে যানা বর মাগানা এক্কান জু। বানা কি সিআন! এচ্যে পার্বত্য চুক্তি
বাস্তবায়ন ন’ অনার আমা নেতাউন চের কত্তা অই ভেইয়ে ভেইয়ে কোল বাজেই হিলত লো নাল
বোই গেল। ভেইউন ন’ কলেই বোনুনরে আহত তুলির। সিত্তুন সরান পেবার বর মাগানা এচ্যেএক্কো
দিন।
বানা কি বর মাগিলে পায়, নিজ’ মনান পুরিষ্কার ন’
থেলে? লোভ দ’ বেগর থায়, চাহিদা বেগর থায়, আমা চাহিদাআনি আমা কধা ন’ শুনের। আমারে
যোক্কো পাগলে ধচ্ছে পা ধরি যিয়ে। সিত্তেই আমি আমি ধালি ধালি দি দি গরির। কধক কা
পেরাজার খেবঙ? কা পেরেজার কধক আ গায় সয়েবং? জাত ভেইয়োর না অন্য জাদর পেরেজার।
যা ওক, জাদর যনিু দুগর সাদা থায়, জাত্তো যুনি অক
পদত থায় সালেন একদিন সুক পেব। এ সবন আ আঝা বুক বানি এ বিঝু আ নুয়ো বজর ওক জাদর
মুক্তি বিঝু আ বজর। বেগর মঙ্গল ওক।
[1]
১০ মাস আগে ২ জুন ২০১৭ খ্রি:নয়ন নাঙে এক্কো বাঙাল
খাগাড়াছড়ি চে মেইলত কন্না মারে ফেলেস্ন সে পয়ধেনে পুরি দিয়্যা অয়্যা তিনান
আদাম(বাত্যা পাড়া, তিন তিলা, মানিবিছড়া)। তারা কন বাবত্যা এক্কা ঝুপুর থাঙে থাঙে
আঘন।
কোন মন্তব্য নেই:
একটি মন্তব্য পোস্ট করুন