এক কালে চাঙমা কলে পিত্তিমি গিরগিরাই। যিন্দি যায় সিন্দি নাকশাফুল তুম্বাচ
সান চাঙমা নাঙ সিদি পরে। ধনে-জনে-গিয়ানে, বুদ্ধিয়ে, কজাল-বলিয়্যা কন’ কিত্তে উন’ ন’ এলাক। দুক ন’ এল’। তচ্যা, পেরাসানি ন’ এল’। এল বানা সুক আ সুক। মাত্তর, সে পতপত্যা শাক্য জাদর মানুচ আমি চাঙমাউন বিজগর নানা ঘুলন্যাত পাক খেনেই ইক্যে
নানাঙ দেঝত, নানাঙ জাগাত সিদি পরি আঘি। ভারদত-বাংলাদেচ-বার্মা আ নানান দেঝত অইনেই জাত- বেজাতর চাবত পরিনেই আহ্’রে ফেলের আমার বেক
দোলদোল সুদোম আনি। বেক কিঝু আহ্’রেনেই ইক্যে বানা ছলঙান্নোই আঘি।সিত্তেই লারমা আভিল্যাচ খেই কল’- “আমার বার গরিবা কিচ্ছু
নেই।”
ইক্যে আঘে বানা ধম্মআন। অঝাপাত্তোয়্য ধীমে ধীমে অই আঘে।
ভাচ্চান লুঘি যার। এ দিয়েন আমার আরাঙ সম্পত্তি বুঘত ধরি রক্ষে গরি ন পারিলে চাঙমা জাত একদিন পিত্তিমীত্তুন আহ্’যি যেবগোই, ইআন খামাক্কাই।
ইয়েনির বেক্কানির কারন অহ্লদে আমার লেঘা-লেঘিত
চাঙমার বদলে বাংলা ওক্কোরুন লারচার গরানাহ্। আমি যুনি আগেত্তুন ধরিনেই আমা লেঘা-লেঘিত চাঙমা
ওক্কোরুন বেচ গরি লারচার গরি এধঙ সালেন পত্থমত্তুন ধরিনেই চাঙমাআন আলাদা ভাচ ঈজেবে স্বীকৃতি পেই এলুন আ আমা ভাষাআন ভালেত গরিবাত্যেই নানাঙ বাবদর বলাবলো বেচ পেলঙুন। আজলে বাঙালা ওক্কোরুন আমি যেধক দিন সঙ লকফক গরি থেবং সেধক দিন সঙ আমার ‘টিলা বাঙাল’ বন্নামানো ন’ যেব’ আ চাঙমা ভাষাআনয়্য আলাদা ভাচ ঈজেবে স্বীকৃতি ন পেভ’।
ভাঝর
কধা আ জদার কধা কলে গৌতম বুদ্ধরে ইধোত উদে। বিরূঢ়ক রাজা যক্যে শাক্য
বংশউনরে কাবিবাত্তে যার যক্যে গাঙ কুলত বোই এল’। সিআন দেঘি রাজা ভাবিল
বুদ্ধ জ্ঞাতি কুলদি বাজের। সে পরে আর’ একবার কাবিবাত্তে যেল’। সক্যে এক্কো
মরা গাঝত তরে বোই এল’ দেঘি পুঝর গরল্ল, ও গোজেনঝুবুর গাঝ তলে বোই ন’ থেই
কিত্তে মরা গাঝত তলে আঘচ। বুদ্ধ কল, ‘জ্ঞাতি ছাবা সান দাঙর ছাবা নেই’। এ
কধা মুনি রাজা আর’ ফিরি এল। আ বুদ্ধ যক্যে ধর্ম প্রচার গচ্ছে
সে অক্তত বুদ্ধ পুরন’ বৈদিক-সংস্কৃত ভাচ এল বলবলা আ দপদবা। সে ভাচ্চোই
ধর্ম প্রচার ন’ গরি পালি আ মগদি ভাচ্ছোই ধর্ম প্রচার গচ্ছে। মাত্তর, দগ কধা
ইরুক যারা বুদ্ধ পুয়ো দাবি গরন তারারে সেধক্যে দেঘা ন’ যায়। অথচ, মগ
ভান্তেউন তারা তারার ভাচ্ছান পত্তিক কিয়োঙে কিয়েঙে শেঘেই বাজে রাঘেয়্যন।
বিজগত নাঙ গিন্যে আঘে যে আমা জাত্তো প্রায় ৬০০ বঝর আগে
দৈংনাক্যা, আনক্যা, তোঙতোঙ্যা– এ তিন ভাগে ভাক ওহ্ই যেয়ে। কয়েক দিন পরে আমার ভিদিরে হয়ত জনম লভ’ বাংলাদেচ্যে চাঙমা, ভারত্যা চাঙমা, মিজোরাম্যা, অরুনাচল্যা চাঙমা – এবাবদর আর নুও নুও
ধেলা। একমাত্র অঝাপাত্তোই পারিবো আমারে এ মরনর পধত্তুন ফিরেই আনি। একমাত্র চাঙমা
লেঘার রেগাদি পারিলেই মিলি পারিবোঙ আমি দৈং নাক্যা-আনক্যা-তোঙতোঙ্যায়। মিলি
পারিবোঙ দেজ কুল্যা- অরুনাচল্যা- মিজোরাম্যা-তিবুরাকুল্যায়, বার্মাকুল্যয়। সালেই আমি বল বলাগরি
নাঙ কোলেই পারিবোঙ – অহ্য় আমি শাক্য
জাদর মানুচ – আমি হন জনত্তুন কন’ হিত্যেদি উন’ নয়।
তাবিত (সূত্র): ফেসবুক।
কোন মন্তব্য নেই:
একটি মন্তব্য পোস্ট করুন