“নিজ’ ভাচ, নিজ’ লেঘা, নিজ’ গীত- ন’ জানিলে ন’ থায় চিত্” -এই নকবাচ্যা কধাআনর মেইত আমি এয ন’বুঝি, বুঝিবার ন’ চেই। সিত্তেই জাদর দুক্ক-দযা তিগুচ্যা বিনি আধা গুরি বাজি আঘে। এচ্যা আমার বেক্কান রাহ্’ত। পানি রাহ্’ত, ভাদ রাহ্’ত, শিক্ষে রাহ্’ত আ চিকিচ্ছে রাহ্’ত আহ্ জাগা রাহ্’ত। কধ গেলে রাহ্’দর কন থুম নেই।
মুই এ’বজর (এপ্রিল ৪, ২০১৬ইং) ২৮নং রেংকার্য্যা মুউজ পাগলা মাজন আদামত চাঙমা লেঘা শেঘানা পোইদেনে সে আদামত্ যিয়োঙ। পাকালা মাজন কার্বায্যা দাঙগু লক্ষী বিকাশ চাঙমালোই মুজুঙো-মুজুঙি অলুঙ। তাত্তুন পুজোর গরল্লে তেহ কল, “আর্মা ভাত-পানি রাহ্’ত” আজলে মুই আঝা গচ্ছোঙ তেহ্ জাদর লেঘা, চাঙমা লেঘা শিঘানা রাহ্দ’ কধা কব। আ মুইয়্য সিয়ান আঝা গরানা বজং বাদে কিচ্ছু নয়। আমা সমাজত এই কধায়ান পাগত গুরি কন “পেত থিক দনিয়ে থিক।” যে জাগাত্ ভাত-পানি রাহ্’ত সে জাগাত অন্য কিজু আঝা গরানা নিজরে হ্’েমান সান ভাবঙর। নানাঙ কধাবাত্তায় খবর পেলুং তারা সিয়োত (মেরুং ইউনিয়নর ভিদিরে) কায়-কুয় গুরি তিনান আদাম আঘে (পাকাল মাজন পাড়া, জান্দিমুড় আ মধ্যেছড়া/শিবঙ্গ পাড়া আ ১০০-১১২গিরি থান)। এই আদামানি খাগাড়াছড়ি উপজেলা সিমিনেত। ১৯৮৫খ্রিঃ ১৯শে ডিসেম্বরত রঞ্জনমণি কার্বারী আদম্যা মানেইউনরে আর্মি-বাঙালে কাবিলে পরান বাজেবাত্যাই তারা ২৯নং ছোট মেরুং ভূইয়োছড়া আদামত্তুন পাকালা মহাজনপাড়া, জান্দিমুড় আ মধ্যেছড়াত ধেই যেই কন বাবত্যাই বাহ্ বানি আঘন। ইরুক দিনত পাকালা মাজন পাড়াত এক্কান প্রাইমারি ইশকুল (সরকারর ঘোষিত ৩য় ধাপ) থিদব্বর গরল্লেয়্যু কন টিবিল-বেঞ্চ নেই। বানা কাগজত কলম্মোই লেঘা আঘে পাগলা “মহাজন পাড়া সরকারী প্রাথমিক বিদ্যালয়”। ইক্কুলত চের জন মাষ্টর থেলেয়্যু তারা ক্লাস ন গরন। ক্লাস ন’ গরানা কারন অলদে বেতন ন’ পান আ মাষ্টরুন ঘরানি চৌধুরী পাড়া (ইক্কুলত্তুন ৮/১০কি.মি. দুরত)। সিত্যাই, আদাম্যেউনে বজর কিরিজ গরি এক্কো পারন দ্বি’বে পারন প্রাইভেত ইজেবে মাষ্টর রাঘান। এক্কো বটগাজ তলে একছালাগুরি ৮- ১২ আহ্দ লাম্বা-বাধি ইশকুল ঘরান। মাধা উগুরি রাঙা-এ্যাইল এক্কান বাবদা পতপত গুরি উড়ে।
কধাবাত্তা কধে কধে কার্বায্যা মরে গাদিম্ নিনা পুজর গরল্ল। ইক্কে গাদদে গেলে ৩/৪ ঘন্টা লাগিব’। কিত্যাই, ঝুরিত পানি নেই। ঝুরি ভিদিরে ইক্কুগুরি মরোঙত পানি থায় সিয়োত ১০/১২ গিরিয়ে লারছার গরন। সে মরোঙয়্য নালমরা। বেল্যামাধান অলে বেগে কামত্তুন এযন, পানি কজা যান, গাদন। তেহ্ কল, তারা পোত্যা রাধা দাগত ঘুমত্তুন উদি পানি কযা যা পরে। দিরি অলে বাদা ন’ পায়।
আ জুম্! জুম গুরি গুরি কয়বি ধান গলাত তুলি পারন। ইন্দি কাবদে খেই পুরান। এক্কান কধা আগে, “ভাদ মাজ্যা ক’বুয়ো গিরি”। ইক্কে সিয়ান নেই। ইয়ানি দ্বি’চোগে ন’ দিঘিলে বিশ্চেস ন’ এযে। পার্দা থিয়্যা জুম্ নেই। বেক জগলা অই যিয়্যা। ছড়া-ছড়িত পানি নেই। নেই চিঙে-ঢুধুক বানেবার বাচ। বেজ দেরি ন’ অল’, ২০০০সালত এই আদামানিত মজা ঘর এল। অজল অজল পিবেক কাবিয়্যা গলা ঘর। ইক্কে! চিওন চিওন ভাঙা মাত্যা ঘর। সিত্যাই, দাঙগু কার্বায়্যার চাঙমা লেঘা রাহ্’দ কধা কধ ন চায়। সিয়ান তা চোগত দাঙর নয়, দাঙর অলদে বেন্যা বেল্যা ইধে পাদা ফেলে পারিলে দ্বি’ চোক কাদি পারল্লে অয়।
বানা তারা এ’দজাত নয়। তারা সান্যা বেগোদো মানেই এধক্যা দুগত দিন কাল তোড়াদন। নেই থিদ’। বান্দর সান এ’মুড়ত্তুন ও মুড়ত জুম কাবি কাবি জীংকানি তোড়াদন। ঝার থোনপাত বিজিবিজি কন বাবদে পরানানি তোড়াদন। যা ওক্! ইয়ান গেল জনম দুগী মানেয়োর কধা।
এচ্যে যারা লেঘা-পড়া শিঘি চাগরী-বাগরী গত্তন তারা দ জাদর বারবো দরপ্পানিত্ চোক নেই। পিনোন্ -খাদি লারছার ন’গরিনেই সেলোয়ার-কামিজ-শাড়ী, জাদর লেঘা ন’ শেঘেনেই বাংলা-ইংরেজী, আমন ভাচ ন’ শেঘেনেই পর ভাচ লারছার গরি। সে জাত দুগত ন’ থেব’ কন জাত দুঘত থেব’??? কধা আগে “আমন ভাচ আমনর লেঘা আমনর গীত- ন’জানিলে ন’থায় চিত্”। এচ্যা সেনে আমাত্তুন চিত নেই, নেই পরান্! বেইয়ে বেইয়ে রুগরুক্যা। সিত্যাই দাঙগু নুয়োরামে হোই যিয়ে,“ অজল পাগজ্যা নিজ ঝুপ্, দিন দিন পরেল্লি হুলি যুগ। হুলি যুগত্ সত্য নেই বুক ছিরি দেঘেলেয়ু বিশ্চেস নেই”।
ত্যুয় মর ইরুক দিনর পড়োয়া ভেই-বোনুনরে দিঘি বুক ভরি যার। অন্তত তারা কিয়োঙত গেলে পিনোন-খাদি পিনোন। পিনোন খাদি পিনিনেই ছবি ইুদ ফেসবুকত পেইজ খুলদন, আমনর লেঘা, আমনর ভাচ লারছার গত্তন। আর এক্কান সুগর খবর অলদে, গেল্লে ০৭/১২/২০১৬ খ্রি:দিঘীনালা ডিগ্রী কলেজর এক্কো ভেই রেত মরে ফোন দিন্যাই চাঙমা লেঘা বই আঘন নিনা তালাচ লর। তারা নিনা চিৎমরঙ ইদু শিক্ষা সফরত যাদন। সিদু যারা যারা যেবাক তারারে চাঙমা লেঘা বই বুক্সিচ (উপহার) দিবাক। ইয়ান খামাক্কাই জাত্তোরে মুজুঙে আক্কোই নিবার দাঙর ধক। আ নানাঙ জাগাত চাঙমা লেঘা কোর্স চালু অয়্যা। এই ধারবু মুজুঙে উজে যোক - থিদ’ ওক। লেঙে লেঙে, ফোপে ফোপে অলেয়্যু যে যেঙরি পারে তে সেঙরি জারত্তাত্যাই কাম গরা পরিব’। দাগে হোই যিয়ন, “ কালা বেঙেনা হ্’েদ দাত খায়”। ইক্কে গুরি একদিন আমি আমা জাত্তোরে তজিমপুর গরি পারিবং।
***
কোন মন্তব্য নেই:
একটি মন্তব্য পোস্ট করুন