দুখ্যে মানব সেবিয়্যা “মানবকি কল্যাণ সংঘ”(মাকস) এ তিন বঝর পুন্নো ২০২০ খ্রি.

জানুয়ারি ৫, দুখ্যে পিড়িল্যা মানজর কায় থেইয়্যা জধা “মানবিক কল্যাণ সংঘ” তিন বঝর পুন্নো অহ্’ল। নানাঙ অনটনে ৫ জানুয়ারি দিন্নো পালে ন’ পারিলেয়্য ৩১ জানুয়ারি মাকস এ জনমপুর পালা অইয়ে। এক্কান কধা ন’ অহ্’লে ন’ অহ্’য় এ দিন্নো এমপি কুজেন্দ্র ত্রিপুরা নকবাচ্যা গরবা ইজেবে থেবার কধা থেলেয়্য তা’ মাহ্ অসুক থানার এ খলাবো আহ্’জিল অই ন’ পারে।
বেন্যা মাধান ১০ টা খাগাড়াছড়ি জিরো মেইল “হিল ফ্লেভারস রেস্টুরেন্ট” হল রুমত বেন্যা পর্বত কিংসুক চাঙমা খলা পজ্জোনীয়ে খলানানু মাকস এর এজাল জধানানু তাপস ত্রিপুরা।
খলা আরগানিত কোচপানা কধগী মাকস’র এজাল দাঙর কাবিদ্যাঙ সুনানু সৌরভ চাঙমা জধাবো কামানি ইধোত তুলি যারা মাকস সমারে এলাক আ যারা মাকস কায় থেনেই এজাল দি জাদন তারারে পাত্তুরুতুরু জানেয়্যা।
এ খলাবোত মুলুক গরবা ইজেবে এলাক- উন্মেষ’র জধানানু সুনানু বিটন চাঙমা, বায়েপ’র সংস্কৃতি আ শিক্খা বিষয়ক কাবিদ্যাঙ সুনানু বিপর্শী চাঙমা, গরীব শিক্ষার্থীর কল্যাণ সংঘ’র সল্লাদার সুনানু লায়ম দেওয়ান, চাঙমা সাহিত্য বাহ্’র জধানানু সুনানু ইনজেব চাঙমা আ ইন্সপেক্টর (পুলিশ) সুনানু প্রিয়দর্শী চাঙমাদাঘি।
জারা মাকস’র নিআহ্’লচি গরি কাম গচ্ছোন তারা মান দেনার সমারে সমারে খলানানু বেক্কুনরে কোচপানা, ভালেদি আ পাত্তুরুতুর জানেই সভা থুম গরি দিয়্যা।
বেল্যা মাধান ২ টা দি পর্ববো আরগানি গরা অইয়ে। ইয়ো খলানানু এল’ মাকস’র জধানানু সুনানু শান্তিময় চাঙমা। সভা আরগানিত গরবাউনরে ফুল আ খাদি দিন্যাই গরবাউনরে গজি অইয়ে।
শিক্ষাবিদ সুনানু তাতুমণি চাঙমা, পানছড়ি হাই ইক্কুলর সাত্থুয়া বাসুদেব চাঙমা, কবি সুনানু আলোময় চাঙমা, লুদিক’র জধানানু রতœ উজ্জ্বল চাঙমা, কবি আ সাত্থুয়া ভদ্রসেন চাঙমা, বিদিজিয়্যা খাগাড়াছড়ি সদর উপজেলা ভাইস চেয়ারম্যান বিউটি রাণি ত্রিপুরা, মানেই সেবিয়্যা সুজন চাঙমা, কার্বারি এসোসিয়েশন, খাগাড়াছড়ি জেলা সভাপতি রনিক ত্রিপুরা আ কবি রনজিত চাঙমাদাঘি।
তারা বেগে মাকস’র কামানি বাইনি গরি কলাক- “আমাত্তুন মুজুঙে আক্কোই জা পরিব’ লেঙে লেঙে ফোঃবে ফোঃবে অহ্’লেয়্য। ইত্তুন সরে ন’ এবার আ দোল দোল নক্ষত্র জনম দিন্যাই বেক জধাউন এক অই কাম গরিবার আঝা, মুজুঙে উজে জেবার আওচ গরিলাক।