আমি কিত্তে চাঙমা লেঘা শিঘিবং: সুনানু ইনজেব চাঙমা

আমি চাঙমা। তজিমপুর জাত। ধর্ম আর্মা বুদ্ধ ধর্ম। জার নীতি “অহিংসা পরম ধর্ম।” আমার আঘে আহ্জার আহ্জার বঝরর বিজক, ভাচ-অঝাপাত, সাহিত্য-সংস্কৃতি আ চিনপচ্যা। ইয়ানিলোই আমারে কোই জায় তেজী, বলি এক্কো জাত। বিজগত  পোতপোত্যা গরি লেঘা আঘে, এক কালে আমি রাজা এলং, এলং শাসক জাত। চাঙমা জাদর কধা কলে একদিন হুয়োঙ গুজুরিদ আ মাদিত ভুজোল বেদ’।
মাত্তর, এচ্যে!  সময়র গঙারে নানাঙ জাগাত ছিদি পরলং। নানাঙ ঝর-বোইয়ের গমি যেই অলং ছিত্রিংপাত্রাং আ নানু মরা। সে তেজ, সে বল, সে ধক আ সে জধা ভাঙি গেল’। এধক্যা দুগত্তুন আহ্রে ফেলের জাদর সেই বারবো দরপআনি, ভাচ আ অঝাপাত। সিত্তেই এম.এন.লারমার ধুন্ধুক “আমার বার গরিবার কিচ্ছু নেই।” ভচ যার জাদর নিঝেনী, চিনপচ্যা। পঝিম বিশ্ব খাজ্যেক্কোই লুদুপুদু অই আঘি। আমনর ভাচ, ওক্কোর থাগত্যা বাংলা-ইংরেজী ভাচ্ছোই আমনর সাহিত্য সংস্কৃতি চচযা গরির।
কধা আগে, “নিজ’ ভাচ, নিজ’ লেঘা, নিজ’ গীত- ন’ জানিলে ন’ থায় চিত।” চিত ন’ থেলে জাত্তোরে কোচপেদাক নয়; সেনত্তে জাদর মঙ্গলত্তে, জাদর এরানত্তে আমাত্তুন জাদর লেঘা, চাঙমা লেঘা শিঘা পরিহ্বো, চাগরি পেবাত্তে নয়।
চেদন এক্কান এক্কো দাঙর আহ্’ত্যার। আমাত্তুন চেদন নেই। এ ন’ থানা আমি বহুত লেহ্ম পরি আঘি। ১৮৬০ সালত হিল চাদিগাঙানরে ব্রিটিচ সরকারে দঙল গরানার পর চাঙমা আ মারমা ভাচ্ছোই লেঘা শিঘিবার জু গরি দিল’। সক্যে আমা চেলাউন ন’ চানার শেঘানা ন’ অয়। সে পরে ১৯৩৭/৩৮ সালত একবার মি. মিলান সাহেবে চেরেস্টা গরি চেল মাত্তর! সুনানু কামিনী মোহন দেবানদাঘি ন’ চানার মা ভাচ্ছোই লেঘা শিঘি ন’ পেলং। এল’ পাকিস্তান আমল। এ পাকিস্তান আমলতয়্য (১৯৫৯ সাল) সুনানু নোয়ারাম চাঙমা পত্থম শিক্ষা বইবো প্রাইমারি ইক্কুলত পরিহ্ বার ধিঙিরি পেল। মাত্তর! সক্যেয়্য আমা দেবানুনে ন’ চানা আমি এচ্যা চাংলা আ চাংলিশ ভাঝে মাদি। সেনে এচ্যে বদাবোরে কোই ডিম, হ্’েরানরে কোই মাংস। অথচ এচ্যা বাংলাদেচ কেনে জনম অল’, রাঙা হ্ইেল বাবদা কেনে পেল’ বেক বুঝি পারির। ত্যুঅ এয’ আমার চেদন ন’ এযে। ইক্যে বাংলাদেচ তিন পিড়ি/প্রজন্ম চলের। দ্বি’ প্রজন্ম শেজেদি আমি মা-ভাঝর বই পেনেইও আমাত্তুন এধক গরচ মনে ন’ গরির।  
এচ্যে আমা চাঙমাউন নানাঙ জাগাত ছিদি আঘি। ভারদত তিবিরে রেজ্যত, অরুনাচল, মিজোরাম, কক্সবাজারসমুত্তু নানাঙ জাগাত। তারা দ’ বাংলা ন পারন। আন্তর্জাতিক ভাচ ইজেবে ইংরেজী পারন। তেহ্, আমা (হিলর চাঙমাউন) অঝাপাত, চাঙমা লেঘা ন পাল্লে, ন শিঘিলে কেনে তারালোই অত রাঘেবং! এ ধক্যে গরি লারে লারে ফারক অই জেবংগোই। সং সং চাঙমা অইন্যাই কারর কধা আমি বুঝ-বুঝি ন’ অবং। আমি কিত্তেই ফারক অই যেবঙ? অঝাপাত-ভাচ আমারে আমা জাদর ভেই-বোনুন কায় নেজেব। সিত্তেই বেক্কুনরে যাদি যাদি নিজ’ ভাচ, নিজ’ লেঘা শিঘানা গরচ অই পচ্যে। সক্যে জাদর নিঝেনী, মাজারা থিদব্বরী অহ্Ÿ। জাত্তো মুজুঙে আক্কোই জেব’।যারা চাঙমা লেঘা শিঘিবার বই আওচ গরর তারা তলেদি লিংকুত পড়ি আ ডাউনলোড গরি পারিবা।

 https://drive.google.com/file/d/1c0eZls_SDEFiet6dIWU4LRBOhUyu3U-U/view?usp=sharing